【劇情甜】港佬狂想曲: 第三章：神秘租客篇(2)

七、勁索靚女租客(2)

如是者又過左幾日，一路都冇乜野特別事發生。雞雄終於留意到原來果個靚女每朝都會一早落街買報紙同早餐。於是有一日，佢就詐詐帝帝扮到好巧合咁晌樓下撞佢。
　　
「早晨，咦，乜咁橋既？」雞雄見到個靚女行出大廈門口，即刻扮到好似岩岩返黎咁行埋去。
　　
條女忽然見到有人行埋黎，當堂打左個突。雞雄都未行近，佢已經好有警戒心咁退後左一步，皺哂眉頭咁：「你乜水呀……？」
　　
雞雄扮哂忠厚咁，亦都退後少少耍哂手咁話：「小姐，係我呀……你個同屋住客呀……果日擦緊牙妳撞入黎果個呢……」
　　




「哦！」個女仔終於認得佢，面上有少少唔好意思咁笑左一下：「我認得你喇！頭先真係畀你嚇左一跳。」
　　
……其實唔認得都唔出奇，因為雞雄今日個Look都算執得幾整齊，同平時果個猥瑣樣又真係有少少分別既。
　　
「對唔住喎！」雞雄伸手抓下個頭，拎條毛巾抹汗，又帶住少少自嘲咁話：「我個樣又真係幾嚇人既？」
　　
個靚女即刻「咭」咁笑左下：「咦，你岩岩跑完步牙？」佢好似有Ｄ意外咁。又難怪既，雞雄個死款邊似咁健康喎？
　　
「係呀！」雞雄笑住話：「冇辦法啦，我地呢Ｄ打工仔冇錢去健身，唯有朝朝跑下步當運動囉。」
　　




「跑步好丫！」個女仔笑笑口話：「我都成日跑步架。」
　　
「咁搵日一齊跑囉。」雞雄即刻鬆毛鬆翼，爛泥即係爛泥，講多兩句已經露出左個急色樣；仲有少少流口水添。
　　
「好！搵日囉……」個女仔即刻眉頭一皺，好敷洐咁應左句。
　　
雞雄見佢神色一變，即刻知死。好快又換返副忠厚老實既樣：「咦？係勒，妳咁早落黎買早餐牙？」
　　
「你……你點知架？」個女仔好明顯有少少戒心。
　　




雞雄即刻灑哂手：「冇……冇呀……我純粹靠估架咋！我冇專登昅妳架！」
　　
佢咁講，分明係「此地無銀」姐！不過個女仔又似乎幾受咁喎……
　　
「哈哈，唔駛唔好意思，我信你喎！」個女仔見到雞雄個尷尬樣，面色當堂鬆返少少，眼珠一轉，又笑笑口咁問雞雄話：「係勒，你知唔知附近邊度Ｄ豬腸粉好食呀？呢幾日朝朝食三文治，食到嘴都歪哂。」
　　
雞雄當堂眉飛色舞咁話：「梗知啦，成個大角咀最靚果檔腸粉梗係隔離街發記啦！聽講連Ｄ大富豪都會叫司機渣車黎買，真係好正架。」
　　
個女仔似乎幾為食咁，聽到都好似有Ｄ流口水。雞雄即刻打蛇隨棍上：「橫掂我今朝都想食白粥腸粉，不如我帶妳去丫？如果……妳唔介意既話……」
　　
「咁……」個女仔仲有少少猶疑。雞雄即刻補多句：「係就行快步喇，發記Ｄ腸粉好多人買架，晏少少就賣哂架喇。」
　　
個女仔諗左一諗：「好啦！咁就麻煩你……呀，咁耐都唔記得問你點稱呼添？」
　　
「呵呵……」雞雄摸下自己個頭，笑笑口話：「呢頭個個都叫我阿雄既。」佢當然唔敢話畀個靚女聽，前面仲有個「雞」字啦。




　　
「啊！原來係阿雄哥。你好，我叫Carol。」講完仲伸左隻手出黎同雞雄握手添。
　　
雞雄受寵若驚咁伸手，不過又縮返埋去，有Ｄ尷尬咀苦笑話：「我成手都係汗，好污糟既。」
　　
Carol反而冇乜野，一手渣實雞雄隻手，好爽朗咁握左一下：「車！大家後生仔女，有乜所謂喎？」
　　
「係……係既……妳講得岩……」雞雄又笑左一下，個樣傻傻地咁，竟然好難得咁有少少可愛。Carol忍唔住又「咭」一聲笑左出黎：「好喇！唔講喇。又話Ｄ腸粉好快賣哂既？我地不如快Ｄ行啦。」
　　
「哦……」雞雄畀Carol一笑，幾乎連個魂魄都飄走左咁滯。聽到佢咁講，先回一回神，笑嘻嘻咁帶住Carol一齊行。
　　
……其實佢個心裡面仲掛住頭先握住carol隻手仔Ｄ感覺。

(如果今日本人Facebook Page 達五十讚將加更兩篇)(各位支持下我個Facebook Page la
http://www.facebook.com/%E6%B7%AB%E8%A4%BB-445645792298358 )





待續……