【驚慄】《冥婚：血紅色的裙褂》點解會係我同你？: 二十四、最後的劊子手
二十四、最後的劊子手
嘉駿、藍朗蕎一步一步走入陰森的瀧山村，雖然仍有陽光，但卻感到不了絲毫暖意⋯⋯整條村充滿陰冷之氣，連藍朗蕎都覺得不寒而慄。
「呢到就係瀧山村⋯⋯」嘉駿說。
「連我都覺得⋯⋯此地不宜久留。」藍朗蕎說。
未幾，兩人穿越過一片小林後，便到達了民居的地方。那兒有很多跟幽山村相類似的小木屋、小石屋，只是⋯⋯一個村民都沒有。
「呢到真係一個人都無⋯⋯仲要⋯⋯所有野都好⋯⋯」嘉駿嚇得不敢作聲。
「整齊⋯⋯」藍朗蕎也嚇了一跳，所有房子的傢俱都十分整齊！就連準備祭祀的用品、碗碟⋯⋯所有所有，都原封不動⋯⋯
「到底佢地係點樣一夜之間全部人無聲無息咁消失曬？」嘉駿心中卻沒有半點頭緒，如果他們是被劫殺，為什麼屍體又會不見，而物品又齊全？如果是匆忙離開、撤離的話，就更沒可能⋯⋯
瀧山村，比起幽山村更具神秘色彩、詭異的味道。
「咦！有人既個到？」嘉駿指著遠方的一間小屋說。
「邊到有人呀？」藍朗蕎問，因為她看不見⋯⋯
「個個人喎，佢揮手叫我過去喎⋯⋯間屋仲有光架喎⋯⋯」嘉駿忽然好像著了魔似的，緩緩走過去，藍朗蕎攔也攔不住。
「喂！唔好呀！伏來架！唔好過去呀！」藍朗蕎在叫喊著，企圖喚醒嘉駿，但嘉駿卻好像聽不見似的，一步一步被那「東西」吸引過去！
藍朗蕎伸手拉住嘉駿，可是她只能穿過嘉駿的手，完全碰不到他。
藍朗蕎慌了。
「點算呀⋯⋯護身咒都唔work既？救命呀！」藍朗蕎大叫道。
-
幽山村那邊，古一、陳影紅、鄺子仁及汪蔓渟都在商討著山妖真身的問題。
「仲有兩日，佢就會再出現⋯⋯算唔算係大把時間？」鄺子仁問。
「會唔會係一隻動物？」汪蔓渟說。
「唔會⋯⋯佢生存左係幽山村好多年，我相信亦係佢由一開始就推動冥婚呢樣野，要推動到呢個儀式同呢個文化，佢既真身一定要有影響力。」陳影紅說。
「即係⋯⋯人？」汪蔓渟問。
「我認為係。」陳影紅說。
「會唔會係班長老？」鄺子仁問，陳影紅搖搖頭。
「佢地老姐，未至於老成咁⋯⋯況且，山妖而家根本唔需要再做推動者，呢班長老極其量都只係班怕死既老屎忽。」陳影紅說。
「下？咁有咩人可以生存咁耐但無人發現呀⋯⋯」汪蔓渟思索著。
「我覺得，呢個一定唔會係顯眼既人，起碼唔會一諗就諗到佢⋯⋯況且，呢隻山妖可以變樣，無論係靚女定靚仔，阿叔阿嬸都有可能係佢⋯⋯」古一說。
「唔會係我地丫⋯⋯」汪蔓渟說，這時一個人緩緩走來。
是敖正宇，他的精神好像好多了。
「正宇？你好似好返好多咁既？」汪蔓渟看著敖正宇說。
「係，多謝大家，無放棄過我⋯⋯」敖正宇笑說，鄺子仁卻以懷疑的眼光打量著敖正宇，似乎想到些奇怪，卻又說不出有什麼奇怪。
汪蔓渟也忽然想到一個怪異的情況！
「唔通，佢就係山妖化身！」汪蔓渟驚叫。
-
嘉駿繼續緩緩步向那正在揮手的人影，藍朗蕎卻只能旁觀而沒法阻止！
正當藍朗蕎極為焦急、又以為叫天不應叫地不聞的時候，忽然一個男人衝了出來！藍朗蕎看著那男人，只感到一陣頭暈，然後開始全身乏力⋯⋯
「走呀！」男人對著空屋子怒吼，然後一陣怪風吹過，嘉駿就忽然好像清醒了一樣。
「我岩岩⋯⋯」嘉駿如夢初醒。
「你係咩人？做咩走來呢到？呢到好危險，即刻離開！」男人對嘉駿說，然後厲眼瞪著藍朗蕎，令藍朗蕎更感虛弱！
「駿⋯⋯」藍朗蕎微聲道，這時嘉駿才留意到虛弱的藍朗蕎。
「蕎！做咩事呀你？」這次輪到嘉駿焦急了，男人卻是狐疑的看著兩人。
「你同呢隻女鬼係一齊入來⋯⋯你地身上仲有一股氣場保護住你地，你地係有備而來既，係咪？」男人問。
「呢個男人⋯⋯佢殺氣好重⋯⋯」藍朗蕎說，嘉駿立刻打量眼前男子，個子中挺，年約三十餘歲，看起來卻是正氣凜然的漢子，絕不像壞人，只是⋯⋯有點落寞的感覺。
「請問你係咪洪亮先生？」嘉駿立刻問，男人臉色有點驚訝。
「你點知道？」男人問。
「我地係古一大師既朋友⋯⋯我地好需要你幫忙。」嘉駿說。
-
洪亮帶了嘉駿和藍朗蕎回去他的家門前，但藍朗蕎的不適有增無減。
「佢唔建議入屋，我入面有多神怪野，我驚佢頂唔順。」洪亮瞄了瞄藍朗蕎。
「你留係外面一陣得唔得？係咪仲好唔舒服？」嘉駿細心、溫柔的問。
「我無問題⋯⋯係到休息下就無事。」藍朗蕎微微笑說。
看著嘉駿和藍朗蕎的真心相待，令洪亮心中不禁泛起了一點漣漪。
嘉駿問洪亮借了把傘，好樣藍朗蕎能在傘下聚陰之處休養一陣子。
「你對佢幾好喎，佢係你老婆？」洪亮問，只見嘉駿一臉尷尬。
「唔係⋯⋯」嘉駿說。
「哦，諗錯左隔離⋯⋯係呢，你地想搵我做咩？」洪亮問。
「係咁既，我地係幽山村既人，我地畀一隻山妖逼到窮途末路，仲好多人犧牲左⋯⋯所以我想問你借刀，解決山妖。」嘉駿說。
「借我太太太爺個把絕命刀？」洪亮問，然後站起來走到屋子角落，打開一個舊箱子，取出一把用黑布包著的刀。
「呢把刀，一樣都係不祥之物。我太太太爺積落既血債，甚至去到我呢一代，都仲清還緊。呢把刀，係被詛咒既刀。」洪亮說。
「之前我唔願意借畀古師父，係因為我怕呢把刀會害死佢。今日同樣理由，我唔會借畀你，你去搵過第二個方法喇。」洪亮說。
「我地無時間喇，求下你⋯⋯我地真係無任何辦法⋯⋯」嘉駿說。
「呢個只會係另一個詛咒。」洪亮說。
「有咁既詛咒，就由我一個人承受，但我唔可以眼白白睇住我既朋友畀山妖逼害，我點都要阻止呢件事發生。」嘉駿說。
「我媽媽因為呢件事而死左，仲有一個好好既女仔無左個家姐、有個女仔當住佢男朋友面前自殺，仲有好多為左呢件事執迷不悟最終走上絕路既人⋯⋯佢地都唔應該死。」嘉駿說。
「有個同我素未謀面既女降頭師，佢為左幫我同阿蕎，即係出面個位女鬼，呢個降頭師犧牲左自己同山妖鬥到底⋯⋯佢大可以唔理，保持沉默，繼續隔岸觀火。事不關己，己不勞心，但佢無。佢幫我地戰鬥到最後，甚至到死個一刻，佢都同我地講，佢無後悔。」嘉駿說著，不禁眼眶紅了。
「今日，如果我仲係貪生怕死，驚呢樣驚個樣，我根本過唔到自己個關。仲記得有套電視劇，我知你可能無睇，入面有個角色為左幫一家人翻案，伸張正義，同惡勢力鬥到底，佢講左以下呢番說話。」
「我，周芳芳，前半世只有兩件事，第一件事係我老公，第二件事係我盤生意。但最近我搵到我人生第三件事，就係公義。我聽完呢番說話之後，我就係到諗，我人生有幾多件事？」
「我無女朋友，我更加唔在意自己份工有無得升，我亦都無屋企人，到底我生存左咁耐，係為左咩？愛情、親情、事業都無，但最近，我先開始搵到我人生既意義，搵到我所愛所珍視既野，然後為呢樣野奮鬥。」嘉駿說這話的時候，還不禁望了望屋外的藍朗蕎。
「我唔怕死，我只係怕保護唔到我重視既人。」嘉駿說，聽得洪亮也呆了。
「哈⋯⋯哈哈⋯⋯」洪亮居然笑了，嘉駿狐疑的看著洪亮。
「你笑咩？」嘉駿問。
「無⋯⋯我只係⋯⋯開心。開心終於搵到一個有意思既朋友。」洪亮說。
「我一生人多災多難，連朋友都無⋯⋯因為接近我既人，多數都無好事發生。為左唔想累到人地，又或者係所有人都怕見到我呢個天煞孤星，所以我先一個人搬來呢一到。」洪亮說。
「我同你一樣，想解決詛咒，我想解決我家族既宿命⋯⋯等我自己一個老死係呢到，無兒無女無牽掛，令呢把刀同最後劊子手既命運，長埋瀧山村。」洪亮說。
「難得今日有個唔怕死既傻仔走來問我借刀⋯⋯令我一片空白既人生，好似忽然有左意義同色彩⋯⋯你唔怕死？」洪亮問。
「唔怕。」嘉駿堅定的說，洪亮會心笑了。
「咁怕唔怕做天煞孤星既朋友？」洪亮再問。
「大家咁話。」嘉駿也笑了。
「好⋯⋯我同你地一齊去。」洪亮說。
「好危險架，你借把刀畀我得架喇。」嘉駿說，只見洪亮搖搖頭。
「你以為咁簡單可以出返去？你地身上既護身咒力量已經減弱左好多，如果唔靠我把刀既殺氣震懾住呢到某一隻野⋯⋯我諗我地三個都唔使旨意出返去。」洪亮說，嘉駿感到驚訝。
「你以為山妖係最得人驚？你錯喇⋯⋯連古師父都唔知道，住係瀧山村既野，比你地幽山村既山妖，可怕得多⋯⋯」洪亮說。
「所以我地要一齊離開呢到，你地既氣場比較弱，由你拎住把刀去開路，照返原路出去。」洪亮說，然後將刀交給嘉駿。
嘉駿接過刀，一陣奇怪的感覺傳遍全身，然後三人準備離開瀧山村。
-
「唔好周圍望，照行出去就無問題。」洪亮再三叮囑嘉駿和藍朗蕎，他們小心翼翼的在走。
回程路比起來的時候好像要長要黑，一種不安、神秘而且危險的感覺籠罩著他們。本來好像有無數雙眼睛在注視他們，現在他們都沒了這種感覺，但隨之而來的⋯⋯是一種更可怕的感覺。就好像有一雙邪惡陰暗的眼睛在瞪著他們，靜待一刻⋯⋯然後撲出來，把他們都要撕成碎片似的⋯⋯這傢伙，比起山妖，更加可怕和恐怖。
洪亮臉色一變，神情變得凝重起來。藍朗蕎留意到洪亮的樣子。
「洪亮，做咩事？」藍朗蕎問，只見洪亮搖搖頭。
「無，無事，繼續行。」洪亮說。
三人繼續走，藍朗蕎卻感到恐懼在背後傳來，藍朗蕎回頭一望，發覺背後的山路、花草樹木、小屋全部都被黑暗吞噬了！一股無盡的黑暗正追趕著眾人！
「哇！」藍朗蕎叫了起來。
「走呀！快！」洪亮說，三人拔足就跑，頭也不回！
「只要跑出村口就無事！」洪亮叫道。
三人奮力狂奔，明明已經很累，卻不可以停下半秒休息。
「就到喇！出左村口過左塊牌就無事架喇！」洪亮說，三人就好像看見光明的出路一樣！
（係出路⋯⋯）洪亮心想，看著盡頭，就好像自己的人生即將得到救贖和解放一樣，他居然不由得有點興奮、開心。
如果這次積下來的功德，可以抵消血債，他能重過新生，他有很多東西想做⋯⋯他要找一個老婆，生一兩個孩子，養一隻小動物，可能是貓可能是狗⋯⋯然後去旅行，他還想見識這個廣大的世界⋯⋯
「到喇！」嘉駿跑出了村口，藍朗蕎也跑出了，最後洪亮也踏出了。
他，終於走出來了。
「我終於⋯⋯」洪亮開心的想叫出來，可是一瞬間，背後的黑影忽然伸出了一隻黑色的手，拉住了洪亮的腿！
「洪亮！」嘉駿大叫，想拉住洪亮，可是黑影已經開始扯走洪亮。
「唔使救我呀！」洪亮用盡力大叫，他不要嘉駿和藍朗蕎為他冒險，因為他們有更重要的使命。
「洪亮！」藍朗蕎叫道。
「完喇⋯⋯一切都完喇⋯⋯」洪亮合上雙眼，然後四肢都被黑色手扯著，慢慢被淹沒在黑暗之中，回去了瀧山村。
原來剛剛的憧憬，只能是空想⋯⋯
洪亮臉帶微笑的慢慢被黑暗帶走，當黑影褪去，瀧山村依舊，只是洪亮再也不在村內，再也不在世。
嘉駿拿著刀，跪在地上，向村口跪拜，扣了三個響頭。向洪亮致敬。
「嘉駿⋯⋯」看著嘉駿的心靈這樣受創，藍朗蕎也不知該說什麼。
他們事實上也做不了什麼，歎世界太多怪異事情，他們也無能為力，他們只能承諾，好好完成自己的使命，不要辜負洪亮，以及其他人的犧牲。
-
他們一路回去幽山村都沒有怎麼說話，可能是因為大家心情都很沉重。最近經歷了太多的生離死別，已讓嘉駿很疲累。
寶賢、塔拉、藍朗蕎、洪亮⋯⋯
「我地今次一定會成功。」嘉駿忽然開口說。
「係，一定會。」藍朗蕎看著嘉駿笑說，給予嘉駿無形的支持。
兩人並肩走著，嘉駿很想拖著藍朗蕎，可是他不可以。他忽然想到，解決了這件事以後，他和藍朗蕎又怎麼辦？藍朗蕎會去投胎嗎？他們的結局又會是怎樣？
嘉駿忽然不敢再想。
如果一開始就知道沒結果⋯⋯他們又應否去開始？
「蕎⋯⋯呢件事完左之後⋯⋯我地會點？」嘉駿問，藍朗蕎一悜。
兩人都停下了腳步，大概他們壓根兒也沒想過這個問題。
「我⋯⋯無諗過⋯⋯」藍朗蕎說，正當嘉駿要回應之時，他忽然感到天旋地轉⋯⋯
然後就沒了知覺。
-
「駿！」是藍朗蕎的聲音，嘉駿緩緩張開眼，他正躺在剛剛的山路邊。
「蕎⋯⋯？我岩岩係咪忽然暈左？」嘉駿問。
「係呀⋯⋯我都係暈左一暈就無事，唔知點解會咁⋯⋯」藍朗蕎說。
「個天咁暗既？我暈左好耐？」嘉駿看去上空的說。
「唔係好耐姐⋯⋯不過你講開我先覺⋯⋯暗左咁多。」藍朗蕎說。
「嘉駿！搵到你就好喇！」忽然遠處傳來另一個人的聲音，是久未露面的李樂！
「李樂？做咩事？」嘉駿問。
「你要救下我呀⋯⋯幽山村既人，忽然唔見曬！」李樂說，嚇得嘉駿和藍朗蕎都呆了。
「你意思係⋯⋯蔓渟、子仁、紅姨同古師父都⋯⋯唔見左？」嘉駿問，李樂點點頭。
「唔係掛！我即刻返去！蕎，快呀！」嘉駿情急之下，沒有理會看不見藍朗蕎的李樂，一手就拖著藍朗蕎就走！
「駿！點解會咁？」藍朗蕎一邊走，一邊好奇的問。
「點解會點？我唔明。」嘉駿牽著藍朗蕎跑著。
「點解⋯⋯你會掂到我？」藍朗蕎問，嘉駿這時才發覺，自己是真真正正觸碰著藍朗蕎冰冷的手，實實在在的！
未完待續