【驚慄】《冥婚：血紅色的裙褂》點解會係我同你？: 十五、詛咒
十五、詛咒
這一夜，對不同的人都有截然不同的心情。
對鄺子仁，自然是高興不已。
對嘉駿，卻有一種莫名的心痛。
對藍朗蕎，也是有一種不知是喜是悲的忐忑感覺。
與鄺子仁結成夫婦、安穩生活下去，然後生兒育女過平淡一生，的確是很美好的事，只是藍朗蕎知道自己並不是很愛鄺子仁。
她應該要這麼做，但她並不想這麼做。
【恭喜你，祝你幸福快樂。】嘉駿忽然傳來訊息。
【多謝，到時記住來飲。：）】藍朗蕎的訊息雖有笑容，卻無情。
【嗯！一定！】嘉駿回覆。
藍朗蕎看著訊息，卻沒有回覆，只是輕輕放下手機就入睡。因為她知道，這是她與嘉駿之間的一個句點。
-
翌日，藍朗蕎便與鄺子仁結伴逛街，一來是要搜羅結婚用品，二來也是要讓自己忘掉與嘉駿的事情。
「呢塊廉都幾靚。」鄺子仁欣賞的看著那塊花花窗廉布。
「係喇。」藍朗蕎漫不經心的說。
「做乜心不在焉咁呀？好似返完大陸就咁樣既？係咪發生左咩事？」鄺子仁關心的問，藍朗蕎只是搖搖頭。
「無，只係水土不服姐，無事。」藍朗蕎說。
就在兩人傾談之際，有個熟悉的身影正迎著藍朗蕎處走來⋯⋯
「蕎！」
藍朗蕎看去前方，原來是早陣子送她護身咒木牌的塔拉。
「Tara，又撞到你既？真係有緣。」藍朗蕎笑說，塔拉看著藍朗蕎，卻臉露憂色。
「或者唔係一件好事⋯⋯」塔拉低聲嘀咕著，卻沒有人聽見。
「同你介紹，我未婚夫子仁。呢位係我係泰國識既朋友Tara。」藍朗蕎為鄺子仁和塔拉作簡單介紹，兩人也互相點點頭。
「係呢⋯⋯蕎，我想同你傾少少野。」塔拉說，然後瞄了瞄鄺子仁。
「單獨咁傾。」塔拉補充說。
-
同一時間，嘉駿在前往醫院的路途上，他必須要交代一些工作上的事項，才可以返回幽山村繼續與汪蔓渟調查真相。
他人雖在走，但他的心卻仍在想著藍朗蕎。有一種不明顯的感覺正在嘉駿的內心翻滾著，他知道這次要是讓藍朗蕎跟鄺子仁結婚，就可能真的永遠失去她了，可是他能怎麼辦？去搶新娘嗎？
「駿⋯⋯」
嘉駿忽然感覺到他的背後正有人叫喚著他，是個女人。可是嘉駿回頭，卻沒有甚麼人。
明明是白天的冷巷，雖然是少人一點，卻未至於這麼恐怖吧？
嘉駿沒理會，繼續徑自往前走。可是未幾，背後又傳來怪聲。
「駿⋯⋯」
嘉駿再回頭，赫然看見一名白衣女子正站在自己身後！但那女子臉容慈祥，儘管嘉駿知道她是靈體，卻不害怕，卻倒有一種溫暖的感覺湧上心頭⋯⋯
她正是夢中，嘉駿兒時的媽媽⋯⋯
「你⋯⋯」嘉駿看著女子，覺得十分驚訝。
「我叫柳絮⋯⋯係你媽媽⋯⋯」白衣女子臉容百感交集，欲哭卻無淚。
「媽媽？點解⋯⋯」嘉駿有種強烈的感覺，知道柳絮並不是在說謊，她真的是他的媽媽。
「我無時間喇，你要小心身邊人，你而家好危險⋯⋯」柳絮說。
「你唔好咁輕易相信任何一個人，佢地已經視你為目標，佢地唔會放過你⋯⋯」柳絮說。
「佢地？邊個佢地呀？我唔好信邊個？到底發生咩事呀？媽媽？你係咪知道咩內情呀？」嘉駿緊張的問，正當柳絮要回話之時，她忽然好像很害怕似的，然後尖叫一聲就消失了。
「媽媽？」嘉駿試圖呼喚柳絮，可是他卻再沒有感覺到柳絮的存在。
「嘉駿，你無事呀嘛？」
這時一個意想不到的人出現在嘉駿眼前。
「王師父？」嘉駿驚訝的看著眼前人，正是當日幫助他和藍朗蕎制服郭小蘭的大師王玄天。
-
「做咩咁緊張？要單獨同我傾？」藍朗蕎與塔拉走到一旁悄悄話。
「上次見完你之後，你係咪去左咩地方？做左咩來？」塔拉凝重的問。
「你點知⋯⋯」藍朗蕎問。
「我感覺到有股邪惡既野係你身邊⋯⋯」塔拉說。
「係咪污糟野⋯⋯？我前幾日搭車畀鬼壓⋯⋯去公園仲見到另一個自己⋯⋯」藍朗蕎驚慌的說，可是塔拉居然搖搖頭。
「靈體有善惡之分，但就算係最惡既紅色靈體，都無咁強大。纏繞住你既唔係靈體咁簡單，而係一種邪術⋯⋯或者可以話係一種好古老、好強大既詛咒。」塔拉說，藍朗蕎完全嚇壞了。
「你最近會好容易見到靈體，因為個詛咒不斷減弱緊你既生命力，令你同靈體既頻率越來越接近。你前個排到底去左邊到？」塔拉問。
「我⋯⋯我同一個朋友返左佛山，一個叫幽山村既地方⋯⋯個到真係有好恐怖既野⋯⋯」藍朗蕎說著，又想到了甚麼。
「唔通係果個叫陳影紅既女人向我落咒？」藍朗蕎問。
「唔係。」塔拉卻斷然否決。
「點解你咁肯定？」藍朗蕎問。
「因為呢個詛咒唔係人類向你施行既⋯⋯而係一種比鬼更加邪惡既野，我稱之為惡魔，又或者⋯⋯中國少少咁講，係妖。」塔拉說。
「鬼、精、靈、魅、妖、神、仙、怪都係真有存在既野，而妖就係力量比較強大既一種。妖會依附係地方或者物件上面，所以會聽過枕妖、河妖既故仔。而幽山村呢個地方我都略有所聞，絕對唔係一個吉祥既地方。」塔拉說。
「妖？但我又唔覺⋯⋯」藍朗蕎正思考著在幽山村經歷的東西，這時她想起了夢境中，那個大頭怪物⋯⋯
「妖既外貌可以好可怕，但佢地多數唔會用真面目示人，佢地會有足夠既法力去幻成一個人，可能會係你地身邊任何一個人，你唔會知道佢係唔係妖。」塔拉說。
「咁我可以點？我仲有個朋友都可能有危險，我地會唔會有事？」藍朗蕎緊張的問。
「絕對會⋯⋯而且你地會比死更慘。」塔拉說，藍朗蕎臉色變得異常慘白。
「你地既情況已經係水深火熱，長此下去你地就玩完。我三番四次遇到你，或者就係一種緣份要我幫你地，其實我係師承泰國黑龍王既降頭師。師父教我學法就係要幫人，我試下幫你地。」塔拉說。
「真係？你可以幫我地解除呢個詛咒？」藍朗蕎問。
「唔可以⋯⋯因為個隻野既力量太大，甚至連我當日畀你既護身咒都爛埋，所以我唔可以解除佢。」塔拉說，藍朗蕎馬上臉如死灰。
「不過，或者我可以逆轉佢。」塔拉說。
-
「王師父，點解你會係到？」嘉駿問王玄天。
「我感覺到有靈體係附近，而且都係一隻幾老練既鬼，所以就來呢到趕佢返陰間，點知見到又係你。」王玄天苦笑說。
「係呢，你地去幽山村，無事嗎？查成點？」王玄天問。
「幾有進展，不過仲未查完⋯⋯」嘉駿說，王玄天卻打量著嘉駿。
「但你望落唔多好⋯⋯有股黑氣圍繞住你喎而家⋯⋯」王玄天說。
「黑氣？咁⋯⋯」還未待嘉駿說完，嘉駿便已收到藍朗蕎的緊急來電。
「駿！我地要見面，即刻！我搵到救星喇！」藍朗蕎興奮的說。
未完待續