【驚慄】《冥婚：血紅色的裙褂》點解會係我同你？: 十、死亡警告
十、死亡警告
「唔係掛？你琴日先話唔好驚動佢住！」藍朗蕎緊張的說。
「我諗過，就算係Lucas，都只係同我地一樣係受人擺佈，既然係咁不如主動出擊，去搵一搵個罪魁禍首！我總唔相信佢可以隻手遮天！」嘉駿說。
「你都有道理，況且我地只係問佢問題，又唔係要做咩，我諗應該無問題。」汪蔓渟說道。
「咁出發喇！事不宜遲！」嘉駿說，汪蔓渟也同意，不過藍朗蕎心中卻似乎有點驚怕。
-
汪蔓渟帶領兩人走到鎮中深處，那兒就像一個孤僻的莊園一樣，四處沒有鄰居、沒有商店，完全自成一角。穿過木圍欄就是一個廣闊的小花園，然後再走進去就有一間比較大型和華麗的屋子，可是卻不失陰森恐怖的感覺。
「陣間小心，唔好亂講野同亂咁掂佢既野。」汪蔓渟低聲叮囑著二人，嘉駿和藍朗蕎都點點頭。
汪蔓渟伸手欲敲門，可是她卻遲遲不敢敲，嘉駿就知道汪蔓渟仍然對陳影紅有所畏懼，所以便按下汪蔓渟的手，由他來敲。
「咯咯咯！咯咯咯！」嘉駿不緩不快的敲著門。
「請問有無人？」嘉駿揚聲問，站在嘉駿身後的兩女都緊張不已。
可是良久，都沒有回應。
「咯咯咯！」嘉駿繼續敲，可是屋子裡都是沒有動靜。
「請問有無人？陳影紅小姐係唔係到？」嘉駿問，屋子裡仍是一片死寂。
「唔通出左去？」汪蔓渟疑惑的說。
「不如走⋯⋯」藍朗蕎則提議離開。
「請問有無⋯⋯」嘉駿繼續問的時候，門卻忽然打開了。出現在三人眼前的是一個冷豔的女人，身穿黑紅色的旗袍，雖然是上了年紀卻仍是風韻猶存的模樣，只是歲月不饒人，任憑如何冷豔亮麗的她的臉上都出現了點皺紋。
「我就係陳影紅，你地係⋯⋯」她說著，並瞪著嘉駿以及他身後的汪蔓渟。
「原來係你。搵我做咩？你家姐都人死不能復生。」陳影紅瞪著汪蔓渟冷冷的說。
「所以我就要來問清楚你，究竟想點！點解要逼死我姐姐！」汪蔓渟鼓起勇氣的說。
「我無逼死你家姐，係佢唔好彩！」陳影紅說。
「你⋯⋯」汪蔓渟接不上話，嘉駿連忙阻止汪蔓渟。
「紅姨，我叫嘉駿，呢位係藍朗蕎小姐，我地有少少野想問你既其實。」嘉駿有禮的說，陳影紅不以為然的打量了嘉駿一番，然後再打量藍朗蕎。可是當陳影紅對上了藍朗蕎的雙眼後，陳影紅居然露出驚訝至極的表情！
「你⋯⋯」陳影紅看著藍朗蕎，心中似乎受到了很大的刺激而無法答話。
「我做咩？」藍朗蕎問，陳影紅難以置信的看了看藍朗蕎，然後再看了看嘉駿，驚訝的表情仍然絲毫不改。
「紅姨？」嘉駿試圖喚回陳影紅，陳影紅這才回過神來。
「對唔住，我有少少唔舒服，你地走喇。」陳影紅想關門退回屋裡，但嘉駿試圖阻止陳影紅。
「紅姨！請問你識唔識邊個係郭小蘭？」嘉駿決定單刀直入，只見陳影紅聽到郭小蘭的名字後，臉色更加難看。
「我同阿蕎係香港人，我同佢都畀變成女鬼既郭小蘭害到得返半條人命，好彩我及時搵到師父治左佢，但我一日唔知道點解佢要殺我，我都唔會放心！」嘉駿說，陳影紅緩緩抬頭望著比自己高出一個頭的嘉駿。
「既然你地已經收左佢，咁點解仲要查落去？知咁多真係對你地好咩？」陳影紅一改語氣，開始變得陰沉。
「到你地知得越多，就會越後悔點解自己當初咁無聊，要查呢樣查個樣。有得訓你地就好返去香港訓，唔好再留係呢到，呢條村、呢個鎮、呢個地方都唔係適合你地留低既地方，襯個天仲未黑，快手離開呢到喇！」陳影紅說完便關上了門。
「呢個女人⋯⋯」汪蔓渟一臉不忿的說，嘉駿卻留意到藍朗蕎神色有變。
「蕎？做咩事？」嘉駿問。
「無⋯⋯我只係⋯⋯」藍朗蕎一臉疑惑的。
「我只係覺得佢好臉善⋯⋯唔通我之前見過佢？」藍朗蕎說。
「咩話？你見過佢？」汪蔓渟感到難以置信。
「唔係好肯定，其實都係一種感覺⋯⋯我覺得⋯⋯」藍朗蕎說著，卻是欲言又止。
「我唔識講，算喇。不如我地返去先？」藍朗蕎說道，嘉駿和汪蔓渟都同意，便慢慢離開陳影紅的莊園。
-
兩人送了汪蔓渟回家，然後慢慢步往酒館。
「唔知點解，雖然呢條村既感覺好陰森，而且我只係來左幾日，但係唔知點解⋯⋯有種我好熟悉既感覺。」嘉駿漫不經心的說。
「原來你都係？不過我仲誇張，我覺得⋯⋯個個陳影紅，應該同我有關係。」藍朗蕎說道。
「下？有咩關係？果個女人咁古怪⋯⋯」嘉駿說。
「唔知呀⋯⋯可能我前世識佢？」藍朗蕎說，忽然她靈機一動。
「我地會唔會前世識得？我地係咪搵緊前世既事？」藍朗蕎忽然變得興致勃勃。
「有可能架！我覺得呢個世界，咩都有可能發生。」嘉駿笑說。
「如果Marco佢都可以咁講就好⋯⋯每次同佢講親唔科學既野呀、鬼怪野，佢就會話我諗多左呀、無可能呀咁，其實我都唔係想佢信我⋯⋯我都係想佢支持下我姐⋯⋯」藍朗蕎說。
「唔緊要呀，咁以後咪有我支持你！」嘉駿望著藍朗蕎笑道，藍朗蕎的神色再次恢復笑容。
「你話架！係呢，唔知我前世係做咩架呢？女巫？神婆？」藍朗蕎笑說。
「神婆似喎！」嘉駿笑說。
「似你個頭呀！咁你實係神棍喇！」藍朗蕎跟嘉駿打罵著。
「喂！大人饒命，唔好打呀！」嘉駿笑說。
「知驚喇咩！我饒你一命，咁你點報答我丫？」藍朗蕎笑問。
「報答呀⋯⋯以身相許岩唔岩？」嘉駿開玩笑道。
「你就想呀！咁益你！咁喇，做我保鑣喇，見你高高大大，又大大隻隻，岩曬架喇！」藍朗蕎說。
「你怕鬼，應該要搵師父，唔係搵保鑣喎！」
「我除左怕鬼之外仲好怕死，咁你就要保護我唔好畀我死喇⋯⋯」藍朗蕎頑皮的說。
「彩！咪亂講野喇！」嘉駿緊張的說，藍朗蕎馬上失笑。
「講笑咋，傻佬！咁緊張做咩喎！」藍朗蕎笑說，嘉駿一時不知如何答話，因為嘉駿都不知道為什麼他會有這樣的反應。
兩人就這樣步回酒館休息，可是危機卻真正的降臨⋯⋯
-
藍朗蕎忽然到了一個煙霧瀰漫的樹林，詭異至極。四處沒有小屋、沒有人類、沒有動物，卻有一種令藍朗蕎極度不安的感覺。藍朗蕎望上天空，居然是一片詭秘的紫紅色！
「有無人呀？」藍朗蕎大聲叫道，可是沒有任何回應。
「駿？你係唔係到呀？我唔係應該係旅館架咩？」藍朗蕎感到疑惑，這時她看到遠方有一點異樣，好像是一間屋！
藍朗蕎慢慢撥開樹木，走向小屋，只見那間小屋與幽山村的小屋都不同，比起說是小屋的話，這座建築物更像一座小型的神殿。
藍朗蕎抬頭望向門牌，居然是寫著「山神殿」的字樣！藍朗蕎馬上悄悄進去，裡面很深很大，比起門口所見的更加深不可測！同時危險和不安的感覺也湧上心頭！
藍朗蕎摸著柱子一路走過去，發現裡頭開始有火把用作照明，也有一點聲音⋯⋯
藍朗蕎望進去內堂，發覺裡面居然有著幾個男女正在幹活！但詭異的是，那些男女都是身穿裙褂和傳統成親服飾，仔細一看，就是當日冥婚照中她和嘉駿冥婚時的服飾！
「點解會咁⋯⋯」藍朗蕎驚訝至極，只見他們臉無表情的在工作著，有的在磨米，有的在掃地，有的在抹牆⋯⋯到底為什麼要穿著裙褂？他們是什麼人？
忽然前方一聲巨響，好像是巨獸憤怒的咆哮的聲音，總之不是任何一種人類能發出的聲音！藍朗蕎再望前一點，發現一個「人」正坐在內堂的當家位置，觀察著一眾冥婚新郎新娘幹活，還有兩個新娘正在替那個「人」按摩。不過那個「人」肯定不是人，因為牠雖然有人的身體，有手有腳，但頭部很大，而且沒什麼頭髮，最可怕的是牠不但沒有五官，而且還滿臉都是大大的綠色眼睛！還有一個血盆大口，長著獠牙！他沒穿衣服，一身都是潰爛的皮膚，男性性器大得可怕！他手執鐵鞭，然後⋯⋯
然後牠忽然怒吼一聲，揮動鐵鞭打向前面正在磨米的男女！那個新郎只有一隻手，看來是獨臂的；而新娘則蠻漂亮，一頭黑色長髮中卻有一縷白髮，非常顯眼。
只見那對男女痛得跪地求饒，一個正在為怪物按摩的新娘也忽然停手，一同跪向怪物求饒！怪物再發出震動人心的可怕叫聲，然後居然一口吃掉那個不按摩的新娘⋯⋯
怪物吃完新娘後，繼續鞭打那對磨米男女，充滿悲慘的哀嚎，以及怪物邪惡可怕的叫聲！
這時怪物忽然停手，緩緩轉個頭的方向，望向正在偷看的藍朗蕎，跟藍朗蕎對望⋯⋯
那怪物緩緩起身，想步向藍朗蕎處！藍朗蕎想拔足就逃，可是她卻動彈不得！她拼盡全身力氣都動不了，一眨眼，自己居然已經穿上了血紅色的裙褂！
「救命！」藍朗蕎無法張口發聲，只能在心中祈求有個人救她⋯⋯只是那怪物一步一步走來，越來越近⋯⋯
-
「救命呀！」藍朗蕎猛地坐起身，滿頭大汗。她看了看周圍，不是那陰森恐怖的山神殿，沒有那滿臉是眼的大頭怪物，而是酒館的房間而已。
「做咩事？」嘉駿連忙走過來看看藍朗蕎的情況，原來他早已醒了，而現在已經是早上的十時多。
「我岩岩發惡夢⋯⋯我見到⋯⋯」藍朗蕎正要跟嘉駿說的時候，忽然房門傳來急促的拍門聲！
「嘉駿！蕎姐姐！出事喇！」原來是汪蔓渟在大叫。
兩人連忙開門，只見汪蔓渟神色慌張。
「做咩事？」嘉駿問。
「寶賢佢⋯⋯你地跟我來！」汪蔓渟一時三刻也不知怎說，兩人也只好簡單梳洗，便匆匆跟著汪蔓渟便走。
-
嘉駿、藍朗蕎跟著汪蔓渟走到校門，只見圍觀了一堆人，汪蔓渟擠開人群，好讓嘉駿可以看到裡面的情況。
只見寶賢身穿紅衣，沒穿鞋子，手還拿著切肉刀。
「寶賢！唔好呀！」人群最前方的是敖正宇。作為寶賢的男朋友，敖正宇就想不顧安危的衝過去，可是一名同學拉住了敖正宇。那同學是他們的同級同學，不過成績外貌都不出眾，十分平凡，也沒什麼好朋友，就是死了也沒什麼人關心的那類「毒男」學生，叫李樂。
「正宇唔好呀！咁好危險架！」李樂拉著敖正宇的說。
「唔好拉住我，死開！」敖正宇試圖掙脫李樂，李樂快要拉不住敖正宇，嘉駿和藍朗蕎及汪蔓渟馬上幫忙阻止敖正宇。
「唔該曬！咦，你地係⋯⋯」李樂這時才發現嘉駿和藍朗蕎是村外人。
這時，寶賢忽然大哭大笑。
「哈⋯⋯哈⋯⋯嗚⋯⋯嗚⋯⋯對唔住⋯⋯我知錯喇⋯⋯」寶賢叫道，拿著刀的手正在顫抖。藍朗蕎看著寶賢一身的裝扮，竟讓她想起郭小蘭！
「我知錯喇⋯⋯祝你地百年好合⋯⋯我知錯喇⋯⋯」寶賢眼神放空，然後收起笑容。
「無人可以阻止冥婚⋯⋯」寶賢說著，居然笑了，笑得讓人心寒⋯⋯
「我要付出代價⋯⋯」寶賢嘀咕著。
「咩⋯⋯咩代價？」藍朗蕎輕聲說。
寶賢忽然眼神掃向藍朗蕎身上。
「死！」寶賢大叫道，嚇壞了在場所有人，不過下一秒更讓人感到震驚！
寶賢提起刀子，一刀插進自己的太陽穴！
未完待續