【英雄系列0】石仔特工系列: 4.9 Champagne Supernova
週日
我,阿昇,新月,阿玲四人揸住車,到黃金海岸參與rina既wedding party
「估唔到你個拍檔rina咁快結婚喎..唔知幾時到我同新月bb呢」阿昇笑道
身穿黑色長裙既新月冷冷道:「你咪痴線啦..」
「新月bb今日扮到咁靚..係咪靚比我睇既呢?嘻嘻」
「唔係」
「係既」
「唔係」
我回頭,笑道「喂..你地可唔可以唔好咁煩呀....」
「鬼叫阿昇一日到黑煩住我咩..識咁耐就煩足咁耐」新月鼓起嘴道
阿昇:「咁我當初對你一見鐘情嘛新月bb...咁我地幾時拍拖先」
「下星期日,9點開始12個鐘」果然係新月,乜都計足哂
「好呀,到時我實比大把驚喜你既」
雖然我把口話佢地好煩,但其實內心覺得
有新月同阿昇呢對歡喜冤家做朋友都唔錯,起碼幾熱鬧先啦
旁邊著住白色裙既阿玲:「係喎..做乜帶埋我黎呀,我又唔識你個拍檔rina」
「咁你識多個朋友都好丫,何況,只要d相仲響我度,你都要聽我講啦」
「你..幾時先比返d相我呀!」
「過埋今日先再算啦..係呢,你同師父點呀?」
阿玲微笑道:「依家咪搬返去同daddy住囉..」
「咁我都放心d..係喎,你還返果幾百萬啦?」
「嗯,依家唔使再做小姐啦」
我一臉失望:「唉..咁班慾海飢民以後就冇得上你呢個靚女啦」
「你...哼!」
由停車場行去會場,只係需要2分鐘
一入到會場果陣,已經人聲鼎沸
「石仔!!!!」
著住純白露肩婚紗既rina,一見到我就跑過黎
「嘩,著高踭鞋都照跑,痴線架啦」
「咁掛住你呢個好拍檔丫嘛」
rina樣貌就冇乜點變到,但係著上婚紗就即刻靚左十幾倍
搞到我都望到眼定定
「做乜咁望住我呀?係咪我太靚呢?」rina奸笑
「痴線..你都就結婚啦.做乜簽字結婚都唔同我講呀?」
rina做起鬼臉:「咁樣先有驚喜架嘛..新月你今日著得好靚喎」
新月笑道:「多謝..恭喜哂你呀rina」
rina與阿昇握手:「呢位就係阿昇啦?你好呀..果然同新月好襯喎」
一講呢句,新月即刻怒睥住阿昇
「嘻嘻..rina都話我地襯呀!」
新月不以為然:「你痴線啦」
「呢位..」
阿玲向rina鞠躬:「你好呀,我叫阿玲,係石仔既..」
「啊..係新任女朋友!」rina奸笑道
阿玲一聽到就臉紅:「唔..唔係呀」
「一講就紅都面哂,一定係啦!你都幾靚女丫,石仔真係識食啦」
「咪玩啦,阿玲係我地今次任務既拍檔黎」我響rina耳邊講:「佢係師父個女黎架」
「哦..」
呢個時候,一個戴住黑框眼鏡既俊男走過來
用英文同rina講:「rina,呢個就係石仔啦?」
「係呀智也」
原來呢個就係智也
智也友善地伸出手:「你好呀,我聽rina講過你既事啦,一直以黎多謝你關照佢」
「唔使客氣,你要對rina好d呀,佢好女人黎架」
智也搭住rina既香肩:「一定一定!」
rina笑得甜蜜:「口花花啦你!」
「我去招呼埋d朋友,rina你地慢慢傾啦」
見到rina笑得咁幸福,我都好開心
「喂,rina好耐冇見啦!你個衰女包著起婚紗又幾靚喎」一把熟悉既聲音響身後傳黎
rina笑道:「boss!我都好掛住你呀」
boss埋怨道「石仔,新月,阿昇..你地返到黎都唔搵我架!」
「咁攰丫嘛..你估去LA好好玩呀」
「總之..今次你地三個都做得好好,我做石仔你師父都好欣慰」
我大笑:「收檔啦你,你幾時做過我師父呀..」
boss指住阿玲:「係喎..你聽Warrick先生講,你好似叫阿玲喎」
阿玲點一點頭:「係..係呀」
「今次既任務你都做得好好呀,不愧為第四代石女郎呀」boss笑道
「咩...咩石女郎呀」我無奈地問
「咁石仔你有四個拍檔嘛..咪叫石女郎囉哈哈」
rina氣沖沖:「哼!邊個要同石仔有關係喎....喂,airi!千柔!」
我馬上回頭
身材高挑既airi同千柔都打扮得花枝招展
不過最令我留意既係,千柔係有伴
就係上次響停車場見到果個James
「rina..恭喜哂你地呀」airi同千柔逐一同rina擁抱
airi攬完之後先至發現我:「石仔,新月,阿昇..好耐冇見啦」
我問:「airi,做乜返黎既?」
airi笑道:「rina話你都會黎嘛,咁我咪特登買機票返黎見下你地囉」
「嘩咁有我心呀?同Jonathan點呀?生活得好嗎?」
airi點頭:「好好呀,今年我地又未入大學,咪周圍去玩囉,嘻嘻,比d相你睇丫」
airi係咁比手機上同Jonathan既恩愛相我睇,閃死我咩
「千柔,冇見一排,靚左喎」
「嘻,咪玩我啦,石仔,響LA辛苦哂你啦」
「係喎,點解James...?」
千柔臉紅笑道:「我同James..好返啦..」
「吓?!!」我大喊:「唔係掛?佢..」
「佢改變左好多啦,依家腳踏實地左好多,又冇去成日玩,仲日日陪我tim」
響千柔隔黎既James向我90度鞠躬:「石生,上次既事,對唔住!係我對唔住千柔!我保證...我一定會對佢好好架」
「睇你既款,應該係真心改過架喎...不過如果你再對千柔唔住既話,我一定唔會放過你架」
「嗯!」
「係喎..千柔你..」
千柔笑道:「緊係記得啦,buffet嘛」
rina拉住阿玲同airi:「咩話?!buffet!我地又食?」
「千..千柔話請我咋..」我無奈道
「喂,話哂我地四個都係石女郎丫!何況我同airi下星期先走..」
千柔微笑:「好丫..我地五個,就後日食丫」
rina高舉雙手:「yeah,千柔真係好人既姐,到時我地四個就可以girls' talk啦」
「你結左婚仲girl?咪玩啦陳小妹!」
airi聽到嚇一跳:「咩話?」
rina衝過黎想掩住我個口:「唔准講呀石仔!」
「rina佢真名叫陳小妹呀..哈哈哈」
「唔准笑呀,死仔!」
真係估唔到,我呢四位性格有別既女拍檔,竟然會成為好友
後日,下午1點
四季酒店blue bar
「嘩,d羊排好好食呀!」rina毫無儀態地將美食塞入口
「比d table manner啦,你結左婚架啦陳小妹!」
「話左你咪叫我真名囉,我叫rina呀!」rina氣沖沖道
「千柔,今餐真係唔緊要丫嘛?呢度lunch buffet都成5百蚊一個人頭喎」
千柔搖搖頭:「唔緊要呀,最緊要大家開心姐!」
「千柔呢d就大方啦,好過你丫石仔,食餐飯都要問boss claim數,樣衰到丫!」
airi遞上一盤盤美食比我:「石仔,我拎多左d沙津,比你食丫」
「唔該airi,都係airi對我最好!好過你丫陳小妹!結左婚就心胸廣闊d!」
rina:「對住你呢d衰人一定要心胸狹窄d架..阿玲,石仔佢響LA有冇蝦你呀」
阿玲怒視住我:「佢..睇過我全相...」
「吓!!!!」佢地三人一同大喊
「咪住先,果陣係阿玲沖涼冇鎖門,我訓醒以為廁所冇人咋..」
rina一臉鄙視:「原來你係痴漢黎,好變態呀你..果陣仲拎我d bra黎打飛機..」
「喂,你咪屈我喎陳小妹!」
當然我地都知道呢d係講笑架啦
「喂,不如我地四個整個whatsapp group囉...以後都可以一齊傾計嘛」食食下野rina提出呢個建議
「好呀....」佢地四個女仔馬上堆埋一齊
「group名就叫...『四大美人』啦!」
我忍唔住笑:「屌..唔係掛!?」
「笑咩呀你!唔預你呀!」rina拎起手機同airi,千柔,阿玲自拍:「一,二,三,笑!」
食完飯後,佢地四個一齊落中環行街
仲要逼我跟埋去,悶死人
更離譜既係,阿玲竟然同佢地講我收左果2千萬,逼我請佢地買野
「嘻嘻,今日真係好開心呀!我諗聽日一定更加開心既姐,係咪呀石仔太郎?」兩手拎住一袋袋戰利品既rina滿足道
「你緊係開心啦,夾硬屈左我咁多錢..」我無奈道
rina伸住脷:「你咁多錢都用唔哂架啦.」
「丫死啦,我約左James食飯架,夠鐘啦..我要走啦」千柔睇一睇錶
「咁好啦,搵日再約出黎啦千柔,今晚whatsapp傾啦,拜拜」
「拜拜啦..石仔」千柔既笑容依舊迷人
「千柔,拜拜」
「airi..我知尖沙嘴開左間西班牙餐廳呀,不如我地去試下囉?」
「嗯..好呀」一講到食airi就雙眼發光
「咁我地行先啦..拜拜阿玲,拜拜衰人石仔!」rina同airi向我地揮手道別:「阿玲..加油呀,今晚whatsapp記得report比我地聽呀」
睇住rina,airi,千柔三個都有好歸宿,我都好欣慰
希望佢地三個都幸福快樂
我同阿玲行去拎車期間,經過中環海傍
「阿玲,做乜你唔跟埋rina同airi去食飯呀?」我問
「吓...冇.冇野呀..daddy煮左飯嘛」
「頭先佢地話叫你加油,加咩油呀?」
阿玲繼續支支吾吾:「冇..冇野呀」
我問:「做乜口質質咁既?」
「石仔....」阿玲臉紅紅,低住頭
「...做咩呀?」
阿玲行到我面前,深深吸一口氣
「石仔...我...我....」
「我鐘意你呀!」