【英雄系列0】石仔特工系列: 2.13 senkou_hanabi
返到去,airi鞋都冇除,即刻趴落梳化上:「好攰呀....我咁大個女都未試過一日做咁多運動架..」
「做多d運動好丫,keep fit呀」我從雪櫃拎出calpis「airi你飲唔飲呀?」
「好丫...」airi接住我拋過黎既calpis
「唔!又幾好飲喎,唔怪之得石仔你成日飲啦」airi邊飲邊道
我拎起手機:「依家飲慣左,好難飲其他野....係喎,新月同阿昇佢地仲未有消息既..?」
卡!
「我地返黎啦...IID班特工已經帶左個槍手返去盤問啦..」打開門既係新月,隨後既仲有面青口唇白既阿昇
「咦返黎啦,阿昇做乜咁既樣呀?」
新月冇理身後既阿昇,直接行入廁所洗面:「佢頭先追完槍手之後,嘔左3次」
「暈船河嘛,由細到大一搭船我就嘔架啦..」阿昇目無表情,攤響另一面既梳化
「咁你地架van仔呢?」我拎住手機上網
「屌你...緊係拎埋先返黎啦..」阿昇既氣息猶如感冒童一樣
「airi..」新月走到airi既面前
「頭先,唔該哂,冇你射中果幾槍既話我地應該追唔到個槍手」
airi有點愕然,畢竟我都好少聽新月讚人
「...頭先我都係搏一搏架咋..最重要都係石仔,諗到呢個策略」
新月轉頭望向我,笑道:「咁又係,呢d策略我估都係石仔先諗得出既..」
「唔好咁講,依家咪搞掂左囉..」
「嗶嗶嗶!!!」屋內既家用電話響起
就近既我拎起黎接聽:「喂..boss..做乜春呀」
「衰仔,開視像會議丫,我有d野匯報返比你地」
我拎起搖控打開電視既視像會議模式,boss一如已往已經坐響自己既office內
「四位辛苦啦,今次既任務入面,我地成功確認韋志輝係收錢安排絕對零度入黎香港,而佢地的確係黎香港搵緊一樣好高價值既野....不過最令我覺得奇怪既係..佢口中既果個A先生」
「A先生應該就唔係絕對零度既人,但係..點解佢要做接頭人呢?佢背後既又係咩?睇黎我地只可以依賴你地捉返黎果一個槍手」
airi問:「個槍手依家點呀?」
「個槍手比我地盤緊,但係仲未肯講野..要d時間啦....今次辛苦哂咁多位,你地抖抖先啦,d善後工作我地會有人搞架啦」
我再追問:「咁韋志輝呢?佢死左未?」
boss吞吞口水道:「佢心口中左槍,醫生仲同佢搶救緊..不過你地唔駛擔心,呢件事我地會好好保密,外間唔會知道係有人想殺佢」
雖然我頭先有一刻覺得佢無啦啦招惹殺生之禍都幾陰公,但係諗諗下...就係呢條仆街放絕對零度入黎香港
無論佢最後死唔死得,都係唔值得同情
今晚,阿昇話要慶祝一下,就去左中環一間大排檔食飯
「為左慶祝今日又成功搞掂一單,飲杯!!!」阿昇高舉啤酒歡呼,一洗剛才既面青口唇白
airi亦舉起手中既透明杯:「飲杯!」
「飲杯..」我同新月就只係敷衍了事
「嘩今日真係有驚無險呀!哈哈」一口都係餸菜既阿昇道「咁刺激先似返做特工架嘛..」
我冷笑一下:「收皮啦阿昇,你同airi都聽到你今日d慘叫聲呀」
「屌你,咁新月bb真係開得好快嘛」阿昇為自己既「柒事」辯護
新月飲住可樂,怒視左阿昇一眼:「阿昇你真係好廢...仲有唔好再叫我bb..」
「嘻嘻對唔住呀新月bb」阿昇依舊嬉皮笑臉,面皮真係厚
「石仔,你今日辛苦啦」airi將一隻乳鴿夾比我
「唔該airi,你都做得好好丫..」的而且確,今日呢個任務airi先係最重要既x factor
airi搖搖手:「邊係呢?石仔你今日揸左成日車先最辛苦呀..」
忽然,阿昇望住我同airi奸笑
我感覺到阿昇諗緊衰野:「你笑乜春呀..」
「你同airi,好似好sweet咁喎!」
呢一句,嚇到airi同我馬上拉開距離
個氣氛比阿昇搞到非常尷尬
「邊..邊係呀,唔..唔好亂講野啦阿昇!」airi馬上臉紅
我都忍唔住話下佢幾句:「阿昇收下把口啦,airi有男朋友架啦..我又有瞳瞳」
阿昇自知講錯野:「sor..ry囉,不過石仔你個瞳瞳都唔搵你既..」
係喎,雖然我呢排忙姐,但係瞳瞳一個call都冇打黎...
我馬上拎起電話,打比瞳瞳
「喂,瞳瞳」
「係石仔呀,做咩呀?」瞳瞳把聲有d急,背後仲好嘈
我問:「做咩呢幾晚唔打比我既?係咪有咩事呀?」
瞳瞳帶住有d歉意既語氣,道:「唔好意思呀石仔...呢幾晚都要開會,所以好忙呀」
「吓開乜會呀?」
「我諗住同hallmate做下任hall莊呀,所以呢幾晚都要通頂呀,對唔住呀石仔,我都唔記得你..」瞳瞳講到好慘咁
我安慰住佢:「唔緊要,你開心就得啦,休息多d啦,唔夠訓唔靚女架啦,咁好啦,唔阻瞳瞳你啦,bye」
「嗯,知啦,bye石仔..」
我失望地放低電話.阿昇已經估到咩事:「做咩呀?瞳瞳又掛住玩黎呀?」
「佢話佢黎緊會上莊,所以呢幾晚都開緊會喎..唉我都冇聽佢講過」
airi嘗試為瞳瞳講好說話:「可能..瞳瞳佢驚石仔你會反對姐..」
「可...可能係啦..」我唯有咁樣安慰自己
不過,我心入面始終有條刺,點解瞳瞳唔可以對我坦白,我地唔係男女朋友咩?
第二日,我地三人終於可以如常返學
雖然只係冇上三日,但係眾人都對我地消失左三日不太感到好奇,可能係因為大家都習慣左走堂掛
不過,今日既我真係冇乜心機
「做咩呀石仔?你好似冇乜精神咁既?」坐旁邊既airi拍拍我
我捽捽眼:「冇野..我眼訓姐」
「你係咪..仲諗緊瞳瞳既事呀?」果然,比airi估中左
我點一點頭
「我明既石仔,以前Jonathan有時會瞞住我去同班friend睇波,我都會好似你咁,會覺得佢呃緊自己咁」airi講起自己同Jonathan既事「不過,諗深一層,其實佢都有自己既生活既,我又何嘗唔係成日瞞住佢買衫」
airi呢一番說話,簡直點醒左我
我自己都呃住瞳瞳去做特工啦,點解瞳瞳唔可以有野唔同我講先?
一諗到呢度,我就好似覺得成單野只係好小事
「又..又好似係喎,我都有野呃住佢啦..」我笑道
airi似乎知道我想講自己做特工既事:「咪係囉,石仔唔好咁擔心啦,我知瞳瞳個心仲響你度既..」
講得冇錯,呢一個月對瞳瞳既懷疑,全部都係自己幻想出黎既野
「咁樣講完,係咪舒服d呢石仔?」airi自信道
「嗯,airi你安慰人咁叻,可以轉行做社工啦」我拎起手機,準備打開facebook
一打開facebook,第一個post係一條影片
post呢條video既人我係唔識既,只係因為tag左瞳瞳,所以我先睇到
片中穿住ocamp t恤既瞳瞳,似乎玩緊一個叫「毛毛蟲」既遊戲
雙腳緊蹺住前面既mk仔既大脾,甚至接近下體既位置
瞳瞳響片段中亦玩得不易樂乎
呢一刻,我呆左
「做咩呀石仔?」airi見我定左格咁,亦望一望我電話上面自動播放既video
「咁嘈做乜春呀,唔使訓咩...呢條乜片黎架?」我左邊既阿昇醒來,亦睇住呢一條video「嘩?玩毛毛蟲咁high?咦瞳瞳黎架喎?!!」
airi見阿昇如此口沒遮攔,細聲道:「唔好講啦阿昇」
「呃..我諗瞳瞳都唔係..真係想玩毛毛蟲既...始終都有..群眾壓力丫嘛」
「唉..」我輕嘆一聲,冇講任何野
因為我都唔知仲有乜野好講,事實擺在眼前,瞳瞳有玩淫game,仲玩得好開心
所有我之前同瞳瞳所講既「唔玩ocamp識唔到人」,「唔住hall返學遠」,都好似變成一堆狗屁