【英雄系列0】石仔特工系列: 2.6 wink sniper

2.6 wink sniper

「嘿嘿,有野食啦!」阿昇捧住三盒波仔叮飯出黎,擺響飯枱
「喂,做乜得三盒既?你唔食咩?」餓到仆街既我已經坐低,拎起一盒牛肉飯
阿昇再響廚房拎出一塊牛扒:「緊係唔係啦!呢塊西冷牛扒留比新月bb既,嘻嘻」
我食左一塊牛肉:「嘩屌你丫,我地就食飯盒,新月就食扒?」最憎d狗公大細超到出哂面

新月坐埋黎:「唔好叫我bb」並切左一塊牛扒放入口中
「點呀新月bb,好唔好食呀?」
「嗯..」新月點一點頭,繼續品嘗牛扒


我問:「喂阿昇,隻usb入面有d咩?」
「因為佢用左四重加密,我仲解緊,不過聽日應該可以解開架啦」
雖然仲未知道呢隻usb入面既野係乜,但係既然肥仔深千辛萬苦咁攞到隻usb,入面既野仲要加密,咁肯定好重要

食完飯後,已經10點半
新月返左上自己房,而阿昇就繼續響地下室解緊隻usb
成間大屋,就好似只剩下我同airi

「石仔,我走先啦,聽日放左學我就跟你上左果個boss度」airi拎起自己把M24A3對我道別
「我車埋你丫,呢度好難出返去市區」


「好丫,唔該石仔」airi微笑回應

我駛住civic type r,駛出淺水灣
「airi,你住邊架?」
「九龍塘又一居呀」坐響前座既airi答
我:「唔好意思呀,始終我地都係對你..有d戒心既..」
「唔緊要呀,你地咁諗都好正常姐,你都估唔到會響小欖撞到我呢個同學架嘛」
聽到呢句,我地兩個都笑左

「石仔,你由幾時開始做特工架?」airi突然問起我既事


「大約兩年前啦...果陣都係誤打誤撞先做左特工姐,都係貪佢薪高糧準咋」
「哦..原來你同阿昇讀asso都只係掩飾姐」
「我係因為點都要呃住女朋友先讀姐...不過阿昇就唔同啦,佢純粹係因為想過下日神先讀咋,你唔好睇佢個樣kaikai下咁,佢話哂都MIT兩個工程學位畢業」
airi嚇到o嘴:「嘩,真係睇唔出佢咁犀利架喎」

我亦開始問題airi既事:「係呢..你..細個開始就學點用狙擊槍架啦?」
「嗯,不過我daddy淨係教過我用槍,其他果d武術,暗殺術佢都冇教到我..」
「都岩既,我估佢都應該唔想你行返佢條舊路..」我道
airi點頭:「佢都有咁講過,所以我都從來冇殺過人..直到」
「你男朋友既事?」
「嗯,果日...如果唔係我死都要Jonathan請我食飯,佢就唔會去果間銀行禁錢,咁就唔會...」
「當時d劫匪衝入黎,佢驚我有事,即刻攬住我...只不過估唔到佢係比絕對零度既流彈打中頭」講到呢度,airi忽然眼泛淚光
我遞上車內既一盒紙巾:「我諗..你男朋友都唔會後悔保護你既.」
「唔該..醫生話雖然佢經搶救後保得住條命,但係佢..依家仲昏迷緊」airi抹乾眼中既淚水
我拍拍佢膊頭:「唔好咁擔心啦,你男朋友咁愛你,佢一定會為左你醒返既..」我講出tvb先會聽到既對白,自己都覺得老土


「嗯,多謝你呀石仔」


「石仔你送到我呢度得啦,我自己返上去啦,聽日仲要返學架,早d訓啦」到達後,airi除下安全帶
「哦,咁好啦,聽日見啦」我亦向airi道別
雖然只係識左airi兩日,但係我都估唔到
熱情親切既佢,竟然係殺手個女,仲要響一個月前發生左一件咁既事
我拎出手機進入IID既內聯網,8月9號既事件中,傷者名單的確有airi既男朋友Jonathan既相
咁就更加證明左,airi冇可疑

「我返黎啦...」我打開大門
只見新月已經坐響梳化上,雙耳帶住耳機:「你返黎啦..」
「新月你唔係訓左咩...你聽緊咩呀?」
「我響度聽緊果個airi有冇問題..」
我已經估唔到佢呢句既意思:「你放左偷聽器入去佢個袋度呀?」


新月點頭:「不過..暫時都冇可疑」
其實新月仲懷疑airi都係無可厚非,不過..
「咁..咁我頭先同佢講既野你咪聽到哂」
「嗯,放心,我唔會講比你女朋友知既」

係喎,唔記得左瞳瞳!
我馬上拎出手機打比瞳瞳
但係,唔通....

「打唔通比佢呀?」新月問
我點頭,之後再打左2,3次

「喂,瞳瞳」終於通
「對唔住呀石仔,頭先我地hall搞緊event呀..冇聽電話」
我馬上道歉:「唔緊要,我頭先都有野做所以冇打到比你,你響hall住得慣唔慣呀..」


「都ok呀,我依家同yuri同房,其他floormate都好好人呀..」
「瞳瞳,得未呀....差你咋...」我聽到瞳瞳身後有一把女聲叫住佢
「石仔我出返去先啦,聽朝再搵你丫,拜拜」
「瞳瞳拜..」「嘟.....嘟.....」

「住hall係咁架啦」原來新月響度聽緊我同瞳瞳既對話
我一臉無奈:「但係..我話哂都係佢男朋友喎,而且ocamp同hall都係我叫佢報既」
「咁你自己抵死啦」新月冷冷既一句,直刺我既心臟「鬼叫你自己唔比心機讀書咩,如果你同瞳瞳一樣都係讀cu就唔會有呢個煩惱啦」
唉...如果當初知道自己會溝到瞳瞳,我就一早比心機讀書啦,有早知冇乞衣


第二朝
一落到樓下,只見新月響度食緊早餐:「石仔早晨」
「新月早晨,阿昇呢?」我捽捽雙頭
「唔見佢喎」



「卡!」地下室既大門打開
「阿昇早晨...嘩你搞乜春呀,你成晚就係解隻usb呀?」響我眼前既阿昇,雙眼被黑眼圈包圍住,精神不振
「隻usb.我尋晚一點解左啦..我係打metal gear成晚冇訓呀..」
「屌...咁隻usb有d咩野呀..」

阿昇突然變得認真

「usb入面既文件...就係8月9號打劫事件入面,劫匪既名單」


「咩話???!!!」我同新月都比呢一句嚇到呆左

「班劫匪全部都係依索比亞,索馬利亞既死刑犯,文件講到佢地每人響完全任務之後將會得到700萬美金既報酬」
新月:「既然佢地都係死刑犯,即係話...假如文件係真既話,佢地係比絕對零度劫獄救出黎...」
我慢慢冷靜落黎,點頭道:「只要我地搵返呢兩個國家近日有冇劫獄既事件,就知道usb既野係咪真」
阿昇:「我尋晚查左啦,的確...呢兩個國家響上個月各有一單劫獄事件,有7個犯人被救走」
雖然我地都有心理準備,知道今次既事有機會係絕對零度自導自演
但係當證據出哂黎既時候,又的確係好難令人相信
如果,airi知道左呢件事既話,佢...會點?

「咁...usb入面仲有冇其他野?例如,絕對零度既目的咁呢?」我問
阿昇於雪櫃拎出一樽可樂:「冇,usb入面得一個file..不過....」
「你唔記得,肥仔深同airi都係前晚跟蹤絕對零度既車咩?」
新月:「冇錯,肥仔深同airi都係深夜跟蹤住佢地架車,咁既話就似乎唔係巡邏...」
「佢地,可能係『搜索』緊」我咬左一口方包

新月:「石仔呢個假設似乎係最有可能性,但係佢地到底搵緊d咩呢....」
阿昇飲左一啖可樂:「唉算啦,呢d野留返比坐office果d仆街諗,我一陣會send份文件比boss架啦..」說罷就行返去地下室既大門
「喂,返學喎阿昇」我道
阿昇搖搖頭:「太耐冇通頂打機啦...好眼訓,唔返學啦..」一起身連佢個新月bb都唔關心下,我就知佢真係攰

我順便八掛下:「喂,新月,你覺得阿昇份人點呀?」
「狗公..」新月冷冷道
「屌咁呢樣我都知...」我笑道
「佢既唯一優點就係夠聰明」新月盯住我「你唔係想,叫我接受佢下話..」
「唔係..」
睇黎阿昇想得米,仲有一段好長既距離啦


由於今日早起,所以我可以準時返到學校
課堂開始左冇幾耐,airi先返到黎
「石仔,早晨呀」airi向我打招呼,並坐響我旁邊
「airi早晨」
四周既同班同學都對airi呢個舉動不明不白
有咁多靚仔唔理,係都要痴埋黎我度

airi拎出自己印製既筆記:「咦,阿昇呢?」
「佢話尋晚打機打通頂攰得濟喎」
airi:「尋晚見你同阿昇都幾fd丫..」
「食屎啦佢,成個小白臉咁,份人又狗公...」

「佢..鐘意果個好cool既新月呀?」airi不禁問
我用自己部notebook上緊網:「係呀..我都唔知點解佢d口味咁奇怪既..我同新月識左咁多年都唔覺得佢正囉」
「唔係丫,新月呢d女仔溫柔起上黎應該都幾可愛既...咦,你識左新月好多年架啦?」
「嗯,我同佢細個都比我師父收養,所以都同佢一齊住左十幾年啦」
「嘩咁你地咪好似兄妹咁囉?」
「咁又未至於咁親既..」
我不知不覺咁同左airi傾左成堂
自從經過尋晚既事,我對airi既感覺好似唔同左咁,不知不覺咁,覺得佢..好似吸引左
係咪因為同瞳瞳好似疏遠左呢..我都唔太清楚

食完飯後
我帶住airi走去平時泊車既停車場:「airi,就黎3點啦,我帶你上去boss度丫」
airi:「嗯...咦係喎你女朋友瞳瞳今日冇黎搵你食飯既?」
「可..可能佢唔得閒掛,大學咁多野做咁多野玩」
「咁...你唔會覺得悶既咩..」
我打開車門:「會呀...但都要尊重佢架...」

其實我睇住瞳瞳每日facebook都比人tag新相,感覺真係幾無奈
又要驚佢比d狗公食,又驚保護得佢太緊要佢會反感
我終於明白,come on james係幾咁難做

十幾分鐘後就到達中環畢打街告羅士打大廈
我響lift禁下35樓,airi問:「石仔,就係呢度嗱?平時經過以為係呢度只係商業大廈咋喎」
「呢度只係我地個boss既office姐...」

lift門打開,又係呢個中年阿姐
「boss響入面等緊你地啦,入去啦」中年阿姐依舊係眼尾都唔望我一下,低頭玩住手機

我同airi行到盡頭既房間,打開門
身穿恤衫既boss已經一早坐響度
boss似乎對於我想拉攏既人係女仔感到意外:「咦..就..就係你呀小妹妹?」
airi點頭示好:「嗯,你好,我叫張愛莉,airi」
boss笑淫淫道:「石仔,你出返去先,我有d野要問下airi先睇下可唔可以比佢臨時加入你地」
「但..但係...」
「但乜春丫,你出去先啦...airi小姐,坐低先啦..」boss一手推我出門口,就「砰」一聲關門
唉,一見到靚女就咁,鬼唔望airi一陣暗殺你呀....

大約等左30分鐘,門口終於打開
boss向我微笑道:「冇問題,airi將會加入你地既小隊,你地要好好合作呀」
我轉頭望望airi,airi亦報以善意既笑容,道:「咁..多多指教啦,石仔」