Forever Beloved Friends: 1.1.2a

　　「咁我地而家有咩玩呀？」

　　回到宿舍後，組爸媽著我們先回到各自的房間卸下行裝，然後再到某一樓層的Common Room集合。

　　「啊……頭先食飯有個阿女冇嚟，不如我地輪一round講多次自己個名先啦！我開始先，再順時針傳過去，我係組媽Angel。」

　　「Hello ！我係組媽Candice。」

　　「我係肥Roy，組爸。」





　　「我叫阿一。」

　　「Hello，我叫雅琪，或者你都可以叫我Aki……」

　
　那個遲來的女生，身型高瘦，五官精緻，某些角度和神情看起來有點像Angelababy（整容版，Of course！），只是她的膚色是健康的蜜糖色，而身材……很不好意思地，由於她穿了件貼身T裇，所以我沒辦法不留意，不過其實也沒甚麼好留意的，因為像鄭秀文。

　　「我叫Louise。」最後，她說。

　　「喂，哩個都幾靚喎。」肥Roy在我耳邊悄悄地說。





　　「你又啱呀？又話有女朋友。」我偷笑。

　　「大佬，望下啫，又冇話要溝。」他說：「你覺唔覺得佢有啲似Angelababy？」

　　「You got it.」

　　自此之後，每當我跟肥Roy的對話裏提及Louise，均以「小AB」代稱。

　　「好！而家大家都識哂大家個名喇，咁我地不如就玩……」





　　「我想問係咪有個Game 叫一生人一次？」Aki問。

　　提到這個在大學迎新活動的著名遊戲，有些人睜大眼睛，一臉好奇；有些相信已經在其他O Camp玩過這個遊戲的人，則在賊笑，或露出不屑的表情。

　　「係有呀，你想玩呀？」Candice說。

　　「我有個同學話佢大O 有玩，但係我嗰組就冇玩到，問極佢係咩嚟佢又唔肯講，其實係點玩架？」

　　「因為哩個Game講明玩完唔可以講出去，不過我見頭先大家嘅反應……我諗有好多人都已經玩過或者聽過，你想知嘅我可以講你知，不過我地哩組就唔玩喇，還掂哩隻Game其實冇咩好玩。」肥Roy說。熟知遊戲玩法的我，一開始還以為他是個獸父無誤，頓時卻對他另眼相看。

　　「型唔型？」話畢，他回頭問我，好不神氣。我笑，對他比了個大姆指。

　　然後，肥Roy把「一生人一次」的內容以及可能出現的狀況告訴了大家。那天晚上，我們當然沒有玩這個遊戲，但玩了估領袖、超級估領袖、強姦犯、耍盲雞、First Impression等熱門房Game。






　　「搞錯啊！我睇落似蒲精咩？」在互相猜測的結果公佈後，Angel忿忿不平地大叫。

　　「First Impression姐、First Impression姐……」Aki連忙搭著Angel的肩安慰道。

　　「係咪因為我個頭呀……」Angel邊說，邊拿起一撮長及腰際的紫紅色曲髮端詳。

　　「組媽你洗唔洗咁認真呀？嗱，你地夠估我係情場殺手啦，但係我都冇拍過拖。」長得挺拔秀氣的Ivan笑。

　　「你冇拍過拖？」大家都難以置信。

　　「我冇呀，」面對十幾道目光，Ivan顯得有點尷尬，「都唔係好出奇啫。」

　　「喂喂喂，玩左成晚，不如輪流報status嚟聽吓。」Candice提議。





　　由於在場有人第一次參與O Camp，不明白何謂「報status 」，因此組媽們耐心解釋了一次「A」、「O」、「C」、「OBA」的含意以及它們與跟在屁股後的數字的關係。

　　「仲有『U』呀！」此時，某個組員突然興奮地接話。他——很抱歉，在我參與過數個迎新活動後，一些個性沒太大特色、外表沒太大特徵的組員在我腦海中很快就會變得面目模糊（尤其是男組員），我實在想不起他的名字。

　　「乜有咁多架？咁『U』又係代表咩呀？」小AB問。

　　「Urgent囉！」又有人大聲說，然後大家都笑了。
　　

　　其實，剛才吃飯的時候，肥Roy問我有沒有女朋友，我已經有點想逃避這個問題。

　　「我……Er……O1。」我支支吾吾。

　　「唓！諗咁鬼耐，我仲以為你太多女朋友，要慢慢數添！」





　　非也、非也。只是連我自己也不太確定，我的感情狀態到底是Available、Occupied還是Complicated。
　　

　　到了凌晨一時半，Candice說不想我們在O Camp還未開始便精神透支，於是宣佈散會，催促我們去洗澡、睡覺。
 
　　我回到自己的房間，躺在床上，不想去洗澡卻也睡不著。良久，起來從背包拿出一個杯麵，到Common Room沖熱水。
 
　　在等待乾麵餅被熱水軟化的三分鐘內，我反復拿起手機看、再放下、再看、再放下。

　　我打開Whatsapp，以往，聯絡人列表中的第一位幾乎永遠都是Suki，但是我已經兩天沒有收到她的訊息了。我往下滑，找到她的名字，按下去，她的名字下方顯示她在線上。

　　猶疑兩秒後，我還是致電給她。


　「喂……」





　　電話另一端只傳來很輕、很輕的呼吸聲。

　　「喂？」

　　那頭仍是沒有答話。

　　「做咩未訓嘅？」

　　「……啱啱返到屋企。」

　　「啱啱放工？」

　　「嗯。」

　　「咁你快啲沖涼瞓啦。」

　　靜默了幾秒，她悻悻地問：「其實你打嚟做乜野架？」

　　「咁……我見你兩日冇搵我吖嘛。」

　　「所以打嚟睇下我死得未？」

　　「講乜呀你？」

　　「講咩唔好？」

　　「又嬲乜野呀？」我有點不耐煩。

　　「我點敢嬲你呀？」

　　「冇嬲又要用問題嚟回應我嘅問題？」

　　「如果唔係我應該點呀？你想我點呀？」

　　「哈，我諗哩個問題應該我問返你。你到底想我點呀？」

　　「我冇想你點喎。夜喇，你早啲休息啦。」

　　「喂。」

　　「點呀？」

　　「做乜野啫？」

　　「我冇阻住你咩？你唔係又去左O Camp咩？」

　　「咩又去呀？」

　　「唔係咩？你自己數下你哩兩個禮拜去左幾多個O乜O物。」

　　「你仲介意緊哩件事？」

　　「我冇。我憑咩介意啫？」

　　聽到這兒，我知道再說下去又是吵架收場。我有點後悔撥了這通電話，挑起這場即將來臨的罵戰，此刻，我只想把戰火澆熄。

　　「唔好咁啦……我都解釋過，只係哩一排架啫，開咗學就唔會咁樣……」

　　「丁一一，你解釋過唔係大哂！無論你講幾多次都係說服唔到我，不過是但啦，還掂你都覺得我唔明你架啦！我都唔想再嘈落去，仲有，我地分咗手架喇，你唔好再打嚟！」

　　媽的，又提分手。

　　「咩分咗手？係你自己講架咋，我冇講過！仲有，我去Camp都係學校活動啫，好過你成日同啲同事落bar飲野吖！」

　　滴答、滴答、滴答、滴答……

　　「Sor——」

　　「算啦，我同你冇野好講。」

　　嘟一聲，電話掛線——正確來說，是我「被」掛線。