樓奴: (12)

Gennie:”係…我知…好變態, 我都好耐先接受到佢咁做…不過佢既痛苦我明白, 佢今日擁有既一切都得來不易…佢捱過89年呢一關, 去到海灣戰爭爆發,市場轉持觀望態度, 點知之後戰爭極速打完, 而通脹高企令市民對通脹有左預期心理,引起財富效應, 觸發積累多時的購買力爆發,香港地產市道進入大升浪.尤其是設備齊全的大型私人屋邨更成搶手貨,黃埔花園、太古城、康怡花園、杏花邨、德福花園樓價在短短一個月時間即從每方尺約2 300元急升至約3 300元.. 由於樓市活躍，地產發展商在港九新界推出的多個樓盤瞬即售罄,樓價急速攀升,甚至係尚未進行登記及公開發售的樓盤,售樓處已出現輪候人龍. 有好多人一個轉一轉手, 就賺十幾廿萬, 之後既升勢就由豪宅帶動, 一直升到97, 個個都如痴如醉, 不過之後金融風暴, 911, 沙士, 八萬五, 一單接住一單, 打到香港落去谷底, 好多人真係捱唔過, 跳樓燒炭既不計其數, Eric亦難逃一劫, 差唔多輸晒所有錢, 最後又係得返呢間光華苑52樓G保得住…03年佢本來已經俾樓市嚇到驚晒, 唔敢再投資, 但係唔知咩事, 佢突然將個單位加按, 入市執平貨, 當時既5-60萬既樓仔今日已升到三百幾萬, 佢由樓仔買起, 到後來染指埋豪宅, 商舖, 車位, 的士牌, 粗略估計已經身家有兩三億…”
 
永發聽一頭霧水, 第一次覺得Gennie唔只係靠樣同身材做生意:”得得得, 我知你好仰慕佢既”才”華, 不過個單位唔係佢前妻仲住緊架咩?”
 
Gennie:”果個怪物其實係間屋住左一年架咋,發生對面單位一家3口離奇墮樓案, 之前佢就已經唔知去左邊喇”
 
Gennie講到呢到, 我成身震一震, 我記起當年既野. 當年我親眼見住阿權成家一個又一個跌係我面前, 個情景太恐怖, D影像根本不停係我腦中出現, 我由果日開始, 足足發左兩個星期燒, 點知有一晚, 我發夢見到阿權.
 
阿權:”太太, 太太, 你好呀, 對唔住呀, 係我唔好, 係我當時俾人掟落之後走去麥當奴搵你, 又估唔到你我真係有緣份, 我俾皇氣彈走左, 野都未講完, 而你都竟然識去我死既現場, 不過點講都係我唔好, 攪到你見到我既死狀, 攪到你嚇成咁…”
 




我答:”你你你唔好嚇我, 我真係連你個名都未知, 只係…我係鐘意左你…但你都唔洗咁害我呀, 攪到我而家死死下…”
 
阿權:”對唔住呀, 我叫曾印權, 你可以叫我阿權, 我知你好慘, 我都唔想架…呢D係天意…我想你幫一幫我, 搵返我個仔, 我老婆同阿女都俾個妖怪掟落樓死晒…”
 
我話:”咪住先, 點解會咁架, 究竟係咩事呀?!”