那些年，當香港仲係百鬼夜行既時代 II: 1.陰陽術

1943年，香港仲係日佔時期。百姓民不聊生，好多人食唔飽，著唔暖，餓死凍死既人不計其數。當然，死既人絕大部份係香港人而唔會係高高在上既日本人。係呢個動盪既時代。想大富大貴，不妨考慮下做漢奸。係當其時，做漢奸既人不計其數。但係又唔想出賣國家，卻又要掙扎求存既人，咁可以做乜? 高街日本憲兵部總部後巷。 「老豆老豆!睇下，我執到本書呀!」一個衣不稱身，全身上下衣服都係補釘既乞兒仔一邊揮揚手中既一本書，一邊興奮地踩著滿地垃圾大叫。本書內頁已經發毛變黃，而封面上邊寫著既字都已經化開左，只能勉強認到最尾個字係個術字同埋有個中國數目字。點解個細路執到本書會咁興奮呢?其實係因為當時，有得讀書係身份既象徵，代表住有一個向上流社會進發既機會，所以基本上大部份香港市民到處籌錢，供自己仔女入學校讀下書，出黎有個皇家警察做下。當然呢個細路都唔會例外啦。你估執垃圾真係咁開心咩!有得讀書的話梗係讀書好啦! 就係呢個時候，一個中年人走到去佢身邊，綸起手，毫不留情地敲左佢個頭一下。「衰仔，執書黎做咩呀!?書換唔到軍票架!至少都要爛銅爛鐵先得呀!你係咪想今晚食樹皮呀!?」呢下敲擊，唔單止敲痛個細路，仲敲碎左佢個讀書夢，敲碎埋佢既心。 小乞兒聽到後，無再講野，只係憐惜地摸一下書上封面，用一個依依不捨既眼神將執返黎既書向路邊隨意掉走，然後又再埋首於垃圾堆中搵佢老豆所講既寶物。書中自有黃金屋，個細路同佢老豆咁就錯過左間黃金屋。 黑暗中，有一個衣著醒神，每邊肩膀上各邊頂住兩粒花既人行左出黎。佢小心翼翼地執起左本書，輕輕掃走書上既灰塵。「喔..下...嘩!真係得來全不費功夫，踏破...踏破...呃....嘿嘿哈哈哈...是但啦!哈哈....香港人真係唔識貨，陰陽術遺本都唔要。好彩執得返...磯谷廉介你竟敢掉左我去，我今次就要親身證明比你睇，你唔信陰陽術威力係你既無知!嘩哈哈哈....」 衣著貌似日本軍官既個個人邁步走左，佢仲邊走邊笑，笑聲係冷颼颼既空氣中不停迴響，笑得人更加有寒冰刺骨既感覺。