那些年，當香港仲係百鬼夜行既時代 II: 48. 運頭塘村XIX — 河北何家

好明顯地，兩個鈴係十分相似，但係又未係同一個款式。我知道，唔同派既煉屍人都會有自己特製既工具，例如最傳統既湘西派就會有形狀特怪既七角攝魂鈴。而呢個神秘女子拎住既攝魂鈴呎吋有成人手掌般大，外型酷似一個風鈴，但係外面則以一道又一既符包裹住，甚至係佢搖個時，攝魂鈴獨有既聲音都傳唔到太遠。
 
而回顧戰場上，兩隻屍一聽到主人既搖鈴聲立即行動，雙方氣勢各不相讓，令旁觀既我都感受到個兩股銳不可擋既力量!然而，福伯控制既殭屍就係沖鋒其間，突然身影一閃，竟然避開左佢既對手，目標反而直指早已經訓係地下奄奄一息既何村長!
 
場中既變化，該名神秘女子都盡收眼底，只見佢面色一變，更加大力地抖動手中既攝魂鈴。佢所控制既屍立時以更快既速度飆向軟弱無力，靠坐係墓室角落既福伯!就係一瞬間，啪既一聲!昏迷不醒既何村長人頭比福伯既殭屍一掌擊碎，鮮血有如噴泉般激射而出，身旁既女子首當其衝，全身浴血。而另一邊廂，福伯既人頭亦被身負怪力既殭屍單手擰甩，佢臉上表情極其怪異，雖然眼睛睜得極大，彷彿好似唔甘心命喪於此，然而咀角卻帶住自滿既微笑，就好似好滿意自己所做既事般。失去福伯既殭屍係何村長無頭屍體旁邊倒地不起，而神秘女子則大口喘氣，以慘烈既代價黎迎接今次既勝利。
 
師父見到福伯同何村長已死，當下立即提高戒心，一手持鏟，一手持符，以凌厲既目光望向場中既女人。大家互相對恃左一陣，師父決定打破沉默，朗聲問道: 「小姐，未知是敵是友?」
 
「呸!區區一個盜墓賊竟然敢問我何三娘是敵是友!?我何家早已經改過自身，唔再淪為盜賊!我以本家既名聲發誓，我要你地同個條仆街一樣，」何三娘以手指畫福伯屍首所在既角落，續道: 「見唔到聽日既日出!」語畢，佢竟然抽出一道黃色靈符，包住攝魂鈴，口中唸唸有詞!成個場景似曾相識...係我既腦海記憶中都有過類似既一幕! 我記得啦!
 




「啊!你係河北何家既人! 」
 
係殭屍札記中有一章曾經記載過各家所用既道具，其中，最令我難忘既就係何三娘手持既河北何家攝魂鈴!呢個攝魂鈴係以屍皮製成，內裏放有殭屍既指甲或頭髮及普通鈴鐺等，故此佢無其他既攝魂鈴咁響。有一樣野係其他各家既鈴都無，個樣野就係鈴上一層又一層既符!呢啲既符取代左貼係殭屍額頭上既控屍符，其他各派既操屍人最怕就係對手撕走道符，但係河北何家就完全無呢個憂慮，所以河北何家係清末民初時期盛極一時，除左湘西主流外未逢敵手，基本上個段時期被盜既墓十之八九都係由佢地包辦!估唔到佢地同錢家一樣，都要流落到香港，做啲偷雞摸狗既小賊!
 
「呵呵~哥哥仔睇黎都識唔少野喎!一眼就知我係邊家邊派!不過好可惜，知道我係邊個都無情講，我地何家守既陵係無人可以攻到入黎!」說罷，身邊既殭屍又再次被催動，夾住狂暴既氣勢直轟過黎!河北何家係以鉛屍聞名，其屍屍身重逾百斤，一拳有撼動墓牆之說!我提醒師父，隨即分頭閃避，右手掉左無用既鐵鏟之後，順道抽出幾道神雷火符去抵擋有如坦克般既鉛屍!但係就係我幾道符要甩手之際，我身邊竟然飄過幾縷輕如白羽既頭髮，飄過瀰漫住濃重血腥味既墓室，直插入鉛屍既眉心!
 
滿身怪力既鉛屍竟然瞬間好似石化左咁，郁都唔郁，猝然停低!