《易容師》: 後續
後續
大家好,我劉SIR,劉孝天。
或者咁多位會好奇怪,乜我唔係比人停左職,需要接受調查咩?
甚至乎,更多人關心,我唔係應該好核凸咁死左咩?
咁一切,就要講返汪震開槍時既一刻......
2015年5月8日,11點58分。香港堅尼地城,卑路乍街防空洞裡頭。
依呀呀!!!!!!!!!!!!
一個龐大黑影,從門外撲入黎,一下將汪震撲低,汪震手槍跌落地。
無錯,望到核凸既連環裸體,就知道係以程小蘭為首既人形蜈蚣!
之後既一秒......
況倩宜諗都冇諗,拔刀騎上左人形蜈蚣,雙手握實刀柄,發條式咁,上下
上下瘋狂插落程小蘭身上!
而我就迅速爬向熊教授到,背對背互相解開繩索!
「仆你個街!你個Bitch!你家姐係淫西,你都係炸!我搵幾個大男人輪流
滿足你,你仲唔心滿意足?依家仲黎對付我!」
程小蘭比況倩宜攻擊到體無完膚咁制,佢雙手已經毫無力氣,只餘下中間
個個人既手,捉實左汪震雙腳。
呢個時候,我已經火速執返起支手槍!但當差多年既我,面對著當下既咁
既情況,都唔知應該點樣做.....殺左汪震?抑或合力解決左變成怪物既程小蘭
呢?
「唔好呀!」熊教授一聲大嗌,我先醒覺。
此時此刻,汪震用佢強而有力既雙臂,上下將程小蘭既頭顱同下顎撕開!
血肉橫飛,當下我眼前已經唔見昔日滿臉天真,鍾意傻笑既o靚仔。只有
一個從腥臭鮮紅既血泊中,慢慢爬上黎既魔鬼。
「嗚呀......呼嗄。」
雙眼同身軀通紅......
滿佈殺氣既魔鬼!
「我係創造者,殺我?嘿嘿......哈哈哈哈!!!!」
「Fuck off!」差唔多同一時候,熊教授都忍唔住,一手想搶去我支槍!
我當然唔會咁易比佢得逞,因為我唔想熊教授再受到更多無謂罪孽。
我左手擋著熊教授,右手舉指向汪震:「汪震,投降啦!」
「殺埋佢。」汪震冇理會我既說話,只係指示況倩宜殺埋人形蜈蚣中尾段
既人!
「停手呀!」我槍頭馬上指向況倩宜既一刻,汪震應時迅速衝埋過黎!
砰呀──!!
槍聲一響,汪震腰間中槍倒地。
點解我會射向汪震?因為我估計到,只要汪震有事,況倩宜無論如何都第
一時間都係關心汪震。
要降伏汪震兩人,同時保著兩名受犯者既性命,唯一可行既路,就只有先
解決汪震......岩先既動作,都只不過係誘導汪震進入射擊範圍。
2015年5月10日,下午12點28分。新界屯門,小欖精神病治療中心內。
係羈留室到,我前面坐有一個被白衣包緊既人──汪震。
「況倩宜已經承認所有罪狀,並指稱一切都係你背後指示。汪震,你仲有
咩好講?」
「成王敗寇,有咩好講?」
「歐陽美琪,到底收埋左去邊?」
「都係個句,係我律師黎之前,我唔會再講任何有關案件既野。」
「點解......你會咁架?點解......你要咁做?」
我真係好想知點解,背後有咩動機,為左咩?
結果,佢既答案令我覺得出人意表:
「嘿嘿嘿......點解點解?我問你,你人生到底有冇咩野,係真正擁有過?
係呢個人與人互相欺騙既世界入面,親情係一個養老既投資、友情係互相利
用既遊戲......而所謂既愛情,更加係男女之間,互相欺詐既交易。社會上,
所有人都要跟隨返學讀書供樓既人生,表現上係為左建設社會,但實質係做
政客商人既奴隸。無奈人就要跟著呢個所謂既社會定論生存,邊個唔服從,
邊個就係唔正常。但係所謂正常既你地,又得到D咩?嘿嘿......我就唔同啦!
我可以好自我咁完成我人生計劃,唔受所謂法則矩條捆綁,忠於人類最原始
既──Sex and Violence。你地呢?繼續好似班馬騮咁,跟著大隊打工搵錢,
供死一世樓吧啦!嗯嘿嘿哈哈哈哈!」
認真,我好打佢。
但係,見著好理直氣壯咁講佢上述既見解,我內心不禁泛起一陣陰寒。
「可惜,我已經有野所有人證物證『叉廚』你,慢慢坐啦!」
「劉SIR,唔好唔記得,我有精神病架~」
「就算有又點?係呢到接受完心理治療後,你都一世出唔返去。我真替另
一個你傷心。」講完,我轉身離開。
獄警為我打開門既一刻,汪震忽然大笑:「嘿嘿嘿嘿......死差佬,唔好唔記
得,你死好命炸!不過都好既~如果個陣咁早打爆你菊花,都唔夠放蟲鑽入你
屁股好玩。呀~不如你幫我諗下,放咩蟲好D呢?曱甴?蛆蟲?蜘蛛?定係......
蜈蚣呀啦?嘿嘿......哈哈哈哈!!!!」
我捉緊拳頭,忍住忍住,無理到佢。
之後,我地警方正式落案起訴汪震,綁架、非法禁錮、性侵......等等十多條
罪名。正式將佢關入左小欖精神病院,並同佢起左個file,稱佢為──
「易容師」
汪震既犯案手法,完美地利用左心理催眠,先後將況倩宜調教成奴隸,再
利用佢去尋找合適既替罪羔羊──
同樣有著特別性癖,及與失蹤人士有關聯既熊德倫教授。
收集左所有有關熊教授行為習慣,包括熟悉心理學,對九子飛星有一定認
識。設下左謎底,再於密室入面,強光之下虐打已被改造了既程小芳姐妹,預
先使她們害怕閃光燈和強光。
當一切準備就緒,最後一步就係催眠自己,成為一個會發惡夢,軟弱無
能、卻經常拿著相機,鍾意拍攝既宅男......身先士卒,先行入局。
所有野如同汪震所講,如果唔係改造後既程小蘭及時來到,佢既計劃可能
已經完美終結。
* * * * *
五個月既一日,小欖精神病院入面既人提出,汪震心理治療已經接受完成
既90%。
而汪震開始每日監房到痛哭,喊著想同受害者道歉。
經我地警方同小欖精神病院既心理治療師商議後,決定答應已康復既汪震
既請求.....
先後搵黎:因被主犯人逼害,最後撤銷控罪,關入青山醫院既況倩宜。與
及,現正就禁錮及性侵少女一案,官司纏身既熊德倫教授見面。
經歷風雨,信任到利用,最後去到出賣。戴返眼鏡、頭髮胡亂既汪震,依
家就同況倩宜相隔一度玻璃。
「Wendy......對唔住呀......」我望到,汪震眼泛淚光,明顯強忍著淚水。
然後,汪震對著玻璃呼左一大啖氣,係玻璃上一邊讀出,一邊寫上左右顛
倒既句子:「Never forget.......Love you very much......」
呢個時間,一直呆滯既況倩宜終於有反應,目不轉睛望著汪震。
「一二年二月十一號,晚上十一點十分......我永遠唔會忘記,要對你九烈七
貞,至死不渝。」
汪震一講完,況倩宜雙眼既淚水,就唔停係咁滴落將枱到,不斷點頭。
見到咁既情況,我都無謂插嘴,笑毒男格既汪震,講錯「七貞九烈」。
送走左況倩宜後既半個鐘,到熊教授黎到。
熊教授同汪震傾計個緊,熊教授表現得異常冷靜。但因為佢地兩人對話聲
音唔大,根本聽唔到D咩完整內容。
唔洗一陣,企係背面既我,見到熊教授身軀震左一下。想上前了解咩事個
陣,熊教授就企起身,轉身準備離開。
當佢走到我身後距離一兩步個陣,佢呼左口氣,講左句:「唔該哂。」
同時,我望到汪震雙膝放枱上,雙掌起塔狀,貼近臉頰。只係見到佢眉頭
一皺,望唔到佢成張嘴臉。
「唔好呀!救命呀......唔好殺我!我乖啦!呀......」跟手,我就跟著熊教授
後面,一同離開左充滿癲叫既小欖監房。
我同熊教授道別之後,我個人拍左係車門到,點起支煙。
諗到咁多個月黎,除左歐陽美琪仲未搵返之外,案件都算一一解決。
如釋重負之際......我見到小欖內面既職員慌張起黎!
咩事呢?聽到好似有犯人自殺,莫非係......!?
Do......Do......Do........
呢個時候又有電話既?
「喂?」係老頂。
「阿天,你係咪係小欖?」
「咩事?」
「唔夠半個鐘前,一輛乘載青山病人既小巴,係小欖前往青山醫院途中,
係屯門公路近三聖邨失事,走甩左個......」
「收到!」未聽哂老頂講,我腦海好似已經預料到咩事。
小欖既野,之後再問。我二話不說,衝入車箱。
Do......Do......
「又咩料呀!」實在太急,人都興過火屎咁。
「劉SIR......」原來係陳仔,我馬上Say個Sor,陳仔:「唔緊要.....打比你
係想話你知,大鍋啦!又有短髮少女離奇失蹤呀!」
咩話?點解......會咁架?
「得,你同其他手足做野先!我轉頭好快返!」冇得理咁多野,我即時決
策,去左屯門公路。
係倒後鏡到,我望著小欖烏雲蓋頂既天空。車內既播放器,唔知巧合定其
他因素,呢個時候播起左《Serenata Immortale》。
而我腦海同心跳,亦隨著烏雲同音樂,再次進入胡亂既思維領域。
(第一部曲 ~完~)
(to be continued...)