《易容師》: 第九章-亡命逃奔
裸女蜈蚣掹大佢可以咬住一個西瓜咁大既口,係咁尖叫。
叫聲既音波,足以震動到我既髮絲。
聽到如此聲嘶力竭既怪物叫聲,同埋自己心跳到就快彈出黎既警號,我清
楚明白到......
眼前既怪物,已經從我夢境破繭而出!!!!
走呀!起身呀!我雙腳快D郁啦!!
面對著咁恐怖核凸既野,雙腳嚇到無法企唔返起身。
我可以做既,係咁爬地退後。而裸女蜈蚣就係咁高速追上黎!
屌你老尾!救命呀!!!!
一路向後爬,一路爬一路嘗試轉身,比雙腳可以搵到企位,即刻彈起。
依呀呀!!!!!!!!!!!!!
但佢老尾,隻野爬得好快呀!雙手伸到埋黎啦!
佢一手捉著左我左腳,另一手想擒埋黎!
「仆街!去死呀!」我唔理三七廿一,右腳起勢係咁踢佢個死人裂嘴頭,
係咁狂踢落去!
點知佢又掹大個死人口,想咬返我轉頭!
我唔理,右腳轉踢佢捉著我腳個隻手!
砰砰砰!
踢左兩三下,佢終於放手,但另一隻手又繼續撲埋黎!
「救命呀!」走得摩,冇鼻哥呀!!
就係佢另一隻手捉到我既時間,我已轉身踏步起身,捉實部相機,死命咁
往邨內商場,對出既馬路狂奔!
依呀呀!!!!!!!!!!!!!!
哇屌!雖然我係毒撚,又岩岩失左戀,係想比女人安慰姐!都唔洗黎完個
MK妹,又整件咁既野架!我受唔起架!!
天呀!咁啦,比返我MK妹我,我唔要咩女神啦!我知足啦!拿拿聲搵人
救我啦!唔該!!
我用盡畢生打丁之力,係咁向前跑呀跑......忽然醒起劉SIR係GTR到同我
講既野,我望一望我手上部單反相機:
「想同程小芳影相作為紀錄個陣,閃光燈一亮,佢就好似頭先咁發哂癲。
由此推論,犯人......令到本應唔會怕光......遇到閃光燈,或強光就會即時閃避。」
依家唔理真定假,試左先算!
我係咁奔跑既同時,用平時純熟既手法,以九秒九速將相機調教好閃光燈
模式。
然後到一個轉角位個陣,稍有拉遠少少距離既時候「人機合一」!!
電光火石間,我一百八十度轉身,好似D槍械片既角色咁,以鏡頭代替槍
頭,瞄準目標。
以閃光當作子彈,發射!
咔嚓呀──
嗚依呀呀!!!!!嗚呀!!!!!!呀呀......呀呀!!!!
裸女蜈蚣即時好似中槍咁,雙手掩住雙眼,身體瘋狂咁胡亂打圈,又撞柱
跑開,消失左黑暗之中......
我心諗:係咪就咁完左呢?唔會再追黎掛?
你就想呀!!!!
隻野唔知經邊到,好神速到閃到我身後,想從後偷襲我咁!
近到差D同佢錫錫,仲唔拿拿聲走咩!
唔知咁岩定好彩,佢兜後追上我,逼著我跑返自己屋邨方向。
唔洗一陣間,離遠見到屋邨樓下個三層高既車停場。
我記返起,呢D被改造完既怪物,除左閃光燈,應該都怕強光掛?
唔理啦!依家直路咁跑返屋企實比佢捉到,不如就去停車場避避先啦!
又一個轉角位,我好似岩先咁,火速調整鏡頭角度!
咔嚓呀──
點知......隻裸女蜈蚣醒撚到仆街,轉彎入黎前,走到母雷公咁遠先轉入黎!
好一個「直角假身」,避開左我既鏡頭,再迎面衝埋黎!
「仆街!出術呀屌!」
點算,我依家先醒起,隻裸女蜈蚣前身都係個人,有智慧係正常不過既事
黎架嘛!仆街啦!仆街啦!!
我又起勢狂跑,再轉入一個街口。
今次輪到我醒啦!我貼著度牆,裸女蜈蚣照板煮碗,又黎一個「直角假身」
入彎!
距離係遠呀,但係我今次做足準備,要瞄準,其實唔難!
「咪睇少龍友既影相功夫呀!!!!」
咔嚓呀──
依呀呀!!!!!嗚呀!!!!!!呀.......嗚嗚......
中呀!今次你仲唔死?
唔係啵,我仲企係到等佢追?走啦!
經過岩先兩個經驗,我知道我一個人根本應付唔黎。
乘隻裸女蜈蚣係到典下典下個陣,拿拿聲轉入另一個街口,跑入去深夜
時份仲好光猛既停車場入面!
「喂!細路你做乜野呀?」從後聽到個看更大叔係到叫我。
「大叔,快D報警呀!有怪物呀!」
我一邊叫,一邊跑左入去既同時,我從褲袋拎出耳機,快速咁插落手機上
高,然後即時撥個輪出去!
打比邊個?緊係我認識入面,最高戰鬥力,又極之可靠既劉SIR啦!
Do......Do......Do......Do......
劉SIR又話電聯既?接電話啦好嘛?
呢個時候,我走到停車場既二樓,坐在係走火通道門口後面。
「喂?」終於肯接電話啦咩?
「劉SIR救命呀!」
「咩料?」屌,呢個時間仲要Chok把磁性既聲音!
「人形蜈蚣呀!又有人失蹤!我比怪物追呀!」
「你冷靜D先,我唔知你講咩啵。」
「我話我比夢境入面既怪物追殺呀!」
好驚呀我,不斷左望望、右望望,你個差佬可唔可以好似平時咁,兩個字
說完就行動呀?
「吓?呢樣......你搵心理醫生會唔會好D呢?」
「屌你!有個短髮女仔比人捉左呀!我想阻止既同時,有怪物出現呀!」
「咁你依家係邊?」依家D差佬真係唔屌唔得!
「我係○○邨既停車場二樓......你快D黎救我啦!」
「OK,你馬上去個隱閉D既地方,我五分鐘後到!」
「我依家好隱......」當我講到呢個個陣,我抬高左個頭,望到防火門外面黑
漆一片。
只有幾行透明黏液,從上而下流落去。
然後黑色既地方慢慢縮小......我見到既,就只有兩隻通紅既眼睛,充滿殺意
既一雙眼神,凝視著我!!
「呀!!!!!!!!!!!!!!!!!!!!!!!!」
(to be continued...)