奇幻短篇系列: 《港女是怎樣煉成的》
旁白﹕自從上次女天神煉成了毒撚之後，又過了兩天......
天神界again
*************
踏踏踏......
上司走進了會議室坐下。
「各位做得好好，你哋兩組管轄區域嘅預計人口增長已經符合指標。」上司帶頭拍掌鼓勵。
啪啪啪啪......(一陣掌聲響起)
「我聽聞今次係女組長諗到辦法喎，做得好！」上司向女天神點頭示意。
女天神謙虛道﹕「都係多得男組長幫手啫。」
女組員聞言響起一陣銀鈴般的竊笑聲。
男天神及其組員則露出一副悻悻然的表情。
「你哋兩組都做得好好，記得多多合作。係喇，雖然你哋今次達標，但唔好自滿，畢竟呢個都只係預測數據，隨時會有變數，記得隨時要mon住，最好就係再將條數做靚啲，咁就萬無一失喇。呢排上頭睇盤數睇得好緊，大家要繼續努力......(下删一萬字廢話)......好，散會！」
上司離開後，女天神帶著其組員一起離開會議室，在經過男天神時向他笑道﹕「咁次全靠你咋，唔係成績邊有咁好﹖哈！」其他女組員也一起以一個勝利者姿態恥笑著男天神及其組員，男天神臉色陣紅陣白，卻不敢向她們發難。
待她們離去後，組員見習男天神A道﹕「老大！班八婆踩到上心口啦！唔係咁都忍呀﹖」
見習男天神B也道﹕「真係忍屎忍尿都唔忍佢哋啦！」
見習男天神C細細聲﹕「其實......我覺得下面班毒撚同老大都幾......」
他還沒說完，就給見習男天神D封著他的嘴，D道﹕「老大，我有辦法報仇，仲可以做靚盤數比老細睇！」
男天神沉聲道﹕「快啲講！」
他們一行人轉移到男天神的房間商量。
砰！
關上房門後，又拉上了窗簾，男天神問D﹕「你有咩辦法﹖」
D壓低了聲音﹕「隔離team攞咗你啲DNA改造，其實我哋照辦煮碗咪得囉。」
C奇道﹕「吓﹖你意思係偷佢哋啲DNA嚟改﹖改嚟做咩呀﹖唔明喎。」
D道﹕「而家下面有一部份男人變咗做毒撚，女人唔吼佢哋所以生育率降低，咁我哋都用隔離team嘅DNA將啲女人改造一下，令到無變毒撚嘅正常男人憎啲女人，咁條數咪可以再靚啲囉。」
B恍然大悟﹕「係咪將啲女人變醜﹖但隔離team個個都索喎，點改呀﹖」
D輕搖食指﹕「Nonono，唔係將啲女人變醜，反而仲要佢哋啲靚樣基因，當然，佢哋啲八婆基因都唔少得啦。」
A一頭霧水﹕「吓﹖要八婆基因我就明啫，但點解要埋佢哋啲靚樣﹖啲女人靚啲唔係仲多男人鐘意咩﹖」
D嘿嘿一笑，然後將內裏的原因說出來。
這天過了下班時間，女天神組早已經走得一個不剩，聽說是因為甚麼化妝品大特價﹖還是趕回家看泡菜韓星電視劇﹖男天神組已經沒空管了，他們要趁著辦公室空無一人，做些鬼鬼崇崇的事情。
A壓低聲音問﹕「喂，我哋而家要點做呀﹖」
D道﹕「成個office得佢哋係長頭髮，我哋周圍搵吓有無長頭髮留低喺地下，咪可以攞到佢哋啲DNA囉。」
男天神馬上吩咐﹕「你！去pantry搵，你！去嗰邊，你同你！去嗰邊！」
一會兒後，他們真的找到了幾條長髮，經男天神抽取了DNA再分析來源，終於集齊了女天神組所有組員的DNA。
這次只過了兩個地球年，這個地區的女性已經起了翻天覆地的變化。那些有點姿色的，皆以為自己是女神托世，又或觀音轉生；她們輕則鼻孔朝天，看不起一般男性；重則對男性呼呼喝喝，頤指氣使；更有些不知得到了那一位的DNA，竟然動手動腳，巴掌飛腿齊出，頓成了城中一時佳話，「港女」一詞自此誕生。從今以後，此區域的男女糾紛日增，永無寧日。
又一次會議。
「哇哈哈！男組長你今次做得好好！上頭好滿意！」
男天神微笑道﹕「老細你過獎啦，都係全靠你嘅英明領導，當然唔少得隔離team嘅全力配合啦，全靠佢哋我哋先可以咁成功！真係唔該哂你哋喎！」他最後一句向著女天神道，神情有多囂張就有多囂張。
女天神臉黑黑的，但上司在場卻不好發作。
上司道﹕「不過我有個問題，你將啲女人性格改到咁八婆咁黑人憎我就明啫，但係點解要keep住靚樣個基因呢﹖」
男天神道﹕「是咁的，如果我哋將女人改醜，雖然短期內可以嚇走男人，但因為佢哋醜樣無人要，競爭力低嘅佢哋，知道無一副好嘅性格係絕對會孤獨終老，咁樣反而培養到佢哋賢妻良母嘅性格出嚟。一邊係賢妻良母，一邊係孤毒宅男，兩邊都知道自己無資格揀人，話唔埋真係會比佢哋一拍即合，咁就前功盡廢。而家啲女人同女組長佢哋一樣有返幾分姿色，就唔會降低自己要求，但佢哋嘅港女性格又趕走埋啲有質數嘅男人，到佢哋終於醒覺嘅時候，都已經人老珠黃，就算到時佢哋肯紆尊降貴都未必有人吼，就算有人吼，可能已經停埋經，哈哈！」說到最後，他眼角瞄著女天神，眼神極盡揶揄之能事。
女天神眼中已經快要噴出火來。
上司滿意的點點頭﹕「好！你哋兩team人咁合拍真係好！今日下午茶我嘅！」
全體道﹕「多謝老細！」當然，男子team是興高采烈的回應，女子team則是黑口黑面的。
「我要早啲去接我個女放學，走先，呢度交比你兩個啦。」上司說罷就離開了會議室。
女天神領著女子組走到男天神跟前，冷冷道﹕「你好嘢！」然後轉頭向組員道﹕「我哋走！」
「哼！」「哼！」「哼！」「哼！」
一個個悶哼從女組員的喉嚨深處向男組員噴出，A和B是一臉得戚，C是一直傻笑，D則是一副莫測高深的模樣。
待她們走後，男天神問D﹕「你話佢哋會唔會報仇呀喇﹖」
「港女性格，有仇必報，我哋都係小心啲啦。」D輕托眼鏡，望著逐漸離去的背影們。
(完)