唔好玩啦，我係月老個助手？: 3.5

「唔使跪啦，黎啦，一齊食飯，我老婆去左打牌都唔知幾時返，咁岩聽到有人嗌我所以就過左黎，原來係月老你。」玉皇大帝扶返月老起身，之後就一齊坐低左。 

「小玉你去拎支酒過黎飲下啦。」玉皇大帝點左小玉去拎酒。 

我就呆哂，見到玉皇大帝都唔知自己要講乜。 

「唔使驚，佢好隨和。」洛賢一路係我耳邊講一路拍左拍我嚇到彊哂既手。 

「咦？呢個就係你新請返黎既助手啦，唔錯吖，幾標緻，月老係揀人方面真係無得彈。」玉皇大帝講完之後就直接拎起隻雞脾黎食。 





我，洛賢，月老，仲有岩岩拎完酒返黎既小玉見到之後都呆左，我地隻雞脾！！！！！ 

「嗯～仲有小玉你啲廚藝依然係咁正，唔錯唔錯。」 唔使三啖，已經得返舊骨係枱面。 

乜玉皇大帝既形象係咁既咩，同我想像中真係一個天一個地喎… 

結果成餐飯就得玉皇大帝自己一路食一路飲仲有起勢吹水，當正係佢自己屋企，我地幾個就成程青菜、飯、青菜、飯咁食完餐晚飯。 

「對唔住。」 我坐係張凳到郁都唔郁。 





「唔關你事既，係我唔記得提你，記住以後食飯個陣唔好提佢個名就得…」月老都唉聲嘆氣，睇黎之前都比佢食過唔少次。 

「咁我返房先啦…吖月老你又話有咩注意事項同我講既？」行到一半突然醒起呢件事。 

「你唔講我又唔記得左，」月老拍一拍自己個頭，「就係一日唔好用太多次轉移。」 

見我唔係咁明，佢又繼續講落去，「你既靈力同自身既精神有關，當你用得越多靈力，你既精神就越弱，條手繩亦都幫唔到你發揮更多既靈力，咁到時就一定要訓返一教補足精神先可以繼續用架啦。仲有就係去得越遠，靈力都用得越多。」 

「哦～即係我唔可以一日環遊世界啦。」我摸住條手繩。 





「咁梗係啦！我比靈力你唔係比你環遊世界架！遲啲我仲有好多靈術要教你，轉移只係最低層同最慳靈力既一種。」 月老激動到手指指我條手繩。 

「好啦，大家都攰架啦，今晚早啲訓，抖足精神先做到野架嘛。」小玉特別將精神兩隻字重音左，然後就推左佢呀爺入房。 

我坐係張床到望住個月亮，估唔到會比我撞到月老，更估唔到會遇到個男仔叫洛賢。話時話，洛賢係點成為月老既助手架呢？ 

我帶住呢個疑問慢慢進入左夢鄉……