唔好玩啦，我係月老個助手？: 1.1

「點呀？今日有冇睇多左愛人之間如何相處？」
呀月突然係我旁邊出現同埋學我捱住個欄杆。

「黎黎去去都係啲mk仔mk妹周街錫下咁囉，冇咩特別喎……月…呀月你係咪玩我架，等我仲以為做月老助手咁好玩……」我揮揮手上既筆記簿，然後又好頹咁垂返低。

「為何你地人間講野咁有趣既，雖然我已經學左好多年，但都仲未明解你地既說話。不過想當年，我參透人類既相處都用了幾百年……」 呀月一路望上個天一路講。

講真個句，話就話月老，原來個樣都係同我地差唔多，好似仲後生過我咁，重點係佢個死人樣又幾溝得下女……可惜，佢已經有成千幾歲，唔係！我實做月老條女！

諗返起前幾個月我個樣，真係連男定女都分唔到




回望過去總是……
……
……
……
「喂，靚仔，今日我地餐廳情侶餐半價呀！」
係一間充滿浪漫氣氛既西式餐廳前面，有個職員向我伸出一張傳單。

「下，我全家都好幸福喎……」我摷左摷成四日冇洗過既頭，然後繼續行返屋企過我既「毒」自生活，情人節？挑，關我鬼事咩。

「喂！靚……仔！我地……」又係啲令人煩躁既宣傳單張，今次我再冇停低腳步，而係口中不停念著「我全家都好幸福……我全家都好幸福……」咁低頭走過去。





「你真的幸福咩？」 頭先第唔知幾個認左我係男既sale屎擋住左我既去路。

「又書面又口語，想點……樣呀你」 當我抬高想鬧佢個陣，佢個靚仔樣令我將個撚字吞左落肚。

我認我爛口架啦，但對住靚仔梗係要收下把口，變返個淑女先係呀嘛，但個陣個樣都唔知邊忽係女人，仲話淑女……我屌……返返正題先，眼前呢個男人就係所謂既月老啦，都唔知邊忽老……

「我地姻緣鎖正在招人呀，唔知呢位兄台有冇興致成為我地既一員呢？為左你既幸福，為左千千萬萬既人既幸福，你一定要參加我地呀！」 個男人都未等我答佢就拉左我入後巷………間鋪頭。

嘩呢個真係不得不提，成間野裝修得古色古香到你呀，直情回到三國咁樣。我係香港土生土長都唔知有間咁既野，我個陣有諗都唔知google map影唔影到呢到。哈哈！不過後尾呀月同我講話咩有緣人自會看到此處，所以就決定搵左我黎搞，呀唔係，係搵我幫手。





「先生，你好放手拿喎，雖然你係幾靚仔，但話哂男女授受不親呀！」 見佢好激動咁拉住我隻手入到間鋪都唔放手，於是我決定要有返少少咁多多既矜持。

佢即刻鬆開手，紅都面哂咁，但下一秒佢即刻反應過黎。「汝…汝……」

如乜鬼呀佢，哂我時間！挑，原來係個痴線佬，仲要岩岩比佢拉住我隻玉手咁耐，靚仔都冇用啦咁。

當我正準備轉身走人既時侯，地下突然有住陣陣既白煙冒出，隨即向四周擴散，令成條後巷煙霧彌漫，而熱鬧既旺角亦竟然變得靜謐，仿佛依家呢個空間入面得返我同呢個男人。