(青春極少甜)原來曖昧真係最好既階段: 19-周銘逸

放學之後，我叫呀逸留低係課室，俾佢知道我既決定。


「呀逸，我已經清楚自己……係鍾意魏天培……對唔住……」

「唔洗對唔住，呢D野淨係分鍾唔鍾意，邊有分o岩定錯。由妳今朝既舉動，我諗我都或多或少估到。」

我見到呀逸好似好努力咁撐起嘴角。

我冇出聲，總係覺得我對佢唔住咁……



「好啦，快D番屋企啦傻妹。」

佢摸一摸我個頭，就拎起個袋轉身走。

我繼續企係原地。 







「祝妳幸福。」

佢走出門口之前，冇回頭咁講左一句，然後踏出課室。 




「祝你幸福。」



我都向住佢既方向輕輕講左一句。



——————————————————————

終於俾佢拒絕左。

呢個結果，我唔驚訝。

佢要既應該係一個會為左佢而同全世界作對既人，一個個心淨係分俾佢既人。 


由細到大，屋企人都教我一定要對人好，即使人地對你唔好，你都唔應該對佢差。
因為呢樣從小學既野，我俾人冠上「男神」既稱號。


但係我根本就唔想做咩男神。有時就算再嬲，我都要忍住，唔可以爆，其實都幾辛苦。 

以前，林侑淇呢個女仔係我印象中係幾靚幾多野講。除此之外，我對佢都冇乜太大印象。

直至對上個個暑假，其中一日補課，突然落好大既雨，佢有帶遮，但就借左俾一個住得幾遠既女仔用。
佢話自己住得好近學校可以唔洗擔遮。

但我記得，個個女仔雖然住得遠，但行去搭車一路都有瓦遮頭，一落車就到屋企樓下。而林侑淇係就係住得近，但全程行路，要淋既雨多好多。

第二日林侑淇就冇番學，好似話係發燒，但跟住個日問佢係咪淋雨淋病，佢又話淋雨之前已經有少少唔舒服。
不過我記得前個幾日佢都好精神好多野講。

於是我開始覺得呢個女仔幾好，對佢有好感。




影印房個兩次，俾佢咁引法，我真係忍唔住，但好彩我收到手，如果唔係我一定好後悔。

之後，呢個傻妹就成日偷望我，又成日想扮自然扮唔留意我，我又要扮番唔知，但又忍唔到笑。佢咁傻，有時真係好想整蠱下佢。

書局個次，我知張倩泳對我有D好感，但我覺得陪下佢買書真係冇咩問題，所以先同佢去買，點知俾個傻妹見到。唔知點解，我諗都冇諗就跑左出去同佢解釋。

同佢出街，我好開心，不過佢真係太唔坦率，但又控制唔到自己面部表情，係我眼中，都幾得意既。

不知不覺，我已經鍾意左佢。 


點知，我知道左原來自己有情敵。 


籃球比賽個陣我見到魏天培有同我一樣既毛巾，所以先咁搏命去打，打到自己受傷。


見到侑淇關心左我先，其實有種慶幸既感覺。 

侑淇俾呀魚佢地話既個一次，係侑淇黎之前，我真係好嬲，嬲到幾惡咁話左佢地幾句。
我從來冇試過咁樣同同學講野，為左侑淇，係第一次。

然後我聽到，原來毛巾係侑淇親手俾魏天培，不禁呆住左。
當我再聽到魏天培話佢地係雞個陣，有一半係真係覺得佢過份左，有一半係同佢鬥氣。

佢拉走左侑淇，我就俾人群圍住。


我其實一D都唔擔心侑淇，我知道侑淇同佢一齊既安全。但我唔想佢地獨處，於是我係咁搵係咁搵，終於見到，俾魏天培攬住、喊緊既佢。 


個次，係我第一次為左一個人心痛。 




我默默咁走左。 



我知道，侑淇係佢身邊先會有安全感。



番到屋企，魏天培打左個電話俾我。我先至知，原來侑淇為左我而俾邱sir侵犯，
但我就咩都唔知，咩都冇補償過。 


我冇資格要侑淇鍾意我。 


惟有對佢冷淡D，等佢可以一心投向魏天培。

只係，到佢面對面問我冷淡既原因，我已經忍唔住講出一句「我等妳」。


好彩等待既時間都唔係好耐，咁快就知道我一早預想到既結果，都算係好事黎。 

魏天培，

你一定要對呢個女仔好D，

你一定要雙倍咁愛佢， 




你地， 




一定要幸福。