(青春極少甜)原來曖昧真係最好既階段: 5-小組討論

上堂既時候，我不斷望住呀逸既背影同側面。
佢面形真係好靚，好想用手順住佢輪廓摸佢塊面。

我太專心望，望到佢望左過黎兩秒我先知佢望住我。
我即刻望番住台面，拎起支筆扮寫野。我餘光見到佢個嘴郁左郁，跟住轉番過去。過多幾秒，確認佢冇再望過黎，我先敢偷望多佢幾眼。

「Group discussion，我順次序數到一樣number既一組。」
Miss開始一行一行咁數一至七，四個人一組。

當Miss數左我係七，我忍唔住望住呀逸個方向，睇佢係咪同我一組。



「一、二、三、四、五、六、七、一、二……」

佢都係七！

我瞪大眼，feel到自己個心好用力跳左幾下。 

「順次序坐啦，一既坐呢到，二呢到，咁七就係後面排埋一齊坐。」

我緩緩咁起身，行去後面搬台。我捉住張台兩邊近自己既位置，抬起，然後有D吃力咁行。 



「我黎啦。」

係呀逸。

佢行過黎，拎起張台另一邊，我對手鬆左，佢就好輕鬆咁搬起左。

話咁快佢同同組既男仔已經搬好唒另外幾張台凳，我地就坐低。

 所謂Group discussion都係大家拎住張仿dse試題既紙用中文吹水，等到Miss行過就講一兩句I agree同how about you既時間。



「Hello everyone，今日我地既試題係……中學生可否談戀愛。」同組個男仔扮唒開始咁作左個假既中文題目出黎。

「In my view，中學生係可以談戀愛既，you？」同組既女仔都好合作咁配合「討論」，然後拋個波俾我。

佢地三個都望住我，但我就要控制住自己唔好望呀逸，望住個女仔。

我吞左啖口水，令自己唔好咁緊張。平時我係班上面算係幾開朗幾多野講又唔怕醜，而家一定唔可以無啦啦口窒窒。

「Sure，中學唔拍拖幾時先拍拖……」

死喇，如果按順序，我跟住落黎應該交個波俾呀逸……

「……應該係青春最美好既時候享受戀愛，what do you think？」我懶係自然，笑住望向呀逸。



呀逸都望住我，唔知點講，佢好似眼尾少少上揚，又微笑住咁。
「I agree with you，如果中學拍唔到一次拖，就好似少咁D野咁。」佢繼續望住我。

我記得，呀逸雖然好受女仔歡迎，但佢好似未試過公開拍過一次拖。 
佢望住我既眼神，令我不停亂諗。

「係喎呀逸，呢排同呀張倩泳點呀。」同組個男仔叫呀冼，有D笑騎騎咁問。
「下乜佢地有路咩？」個女仔就叫Sandy，佢好驚訝咁問番呀冼。
「咩呀，唔係個個都知既咩？有次Ronald撞到佢兩個一齊係影印房一齊行出黎既，仲話張倩泳塊面紅卜卜咁係到笑。」

我面上所謂自然既笑容僵住左，聽到影印房三個字我更加笑唔出。

「喂咪亂講啦。」呀逸冇再望住我，而係有D認真咁同呀冼講。
「咩姐，咁你認唔認有呢件事發生先？」



呀逸面有難色咁諗左兩秒。

「我認，係有。」

 我好努力咁制止自己皺眉同扁嘴，係咁咬唇。

其實佢係咪長期捕住個影印房架？係咪我傻更更咁以為個到係我同佢既秘密地方？佢之所以停低係咪因為一開始當左我做張倩泳？佢會避我係咪因為咁？

「哦！話左架啦！識食啦，張倩泳又高又瘦又大波仲要咁靚女。」呀冼拍左呀逸膊頭一下。
「咪咁變態啦你！」Sandy就推番呀冼一下。

「個次我咁o岩見到佢，佢影印完唔小心撞跌左成個架D file，執得好辛苦，我幫佢手，之後一齊行出黎咋。」
呀逸講完，望左我一眼。

佢係咪解釋緊俾我聽？佢講既係咪真？係真都唔奇呀，佢一定會幫手既。 



「我就唔信喇，一執咪唔小心摸到手仔，跟手黎個對望，然後深情擁抱，然……」
呀冼講講下，Miss行左過黎。
「然…… E、Yes！Absolutely！Let's talk about this！」呀冼即刻亂up左一堆英文。
個情況好好笑，Sandy忍唔住係咁偷笑。

而我，就諗番起之前呀逸點樣拉開我條拉鏈，點樣摸我，然後將張倩泳個樣代入去。 諗到呢到，我真係完全笑唔出。

Miss見到呀冼同Sandy係咁偷笑都知咩事，笑笑口行開左。

「好喇，我地認真試一次啦。」呀冼講番真正個英文題目出黎。

「Okay，we'll try again tomorrow。唔該你地聽日同我認真D講一次呀。」
當呀冼想開始正經講既時候，原來已經夠鐘落堂，Miss講完仲扮嬲咁望左呀冼同Sandy一眼。



個個都係到笑，而我就係到假笑。

我地搬番好D台凳，呀逸再次想幫我手。

「我自己黎得喇唔該。」我笑住同呀逸講，然後用力搬走張台。

我知我唔應該嬲，就算嬲都更唔應該做俾佢睇。 

但我唔得。 

我介意。