【突發】有個巴打PM我，話我聽佢死左。: 參

我真係得閒得滯，我認我犯賤。

我竟然cap曬d pm，仲要print曬出黎
然後帶返去佢學校，等啊朗同Sharon既出現
（p.s.之後我有pm問鋒哥拎佢兩人既中文全名）


畢業禮，係一個好多家長都會出席既地方
我著住便服跟大隊入去，扮係家長既一份子
我拎定手機出黎，因為一陣d畢業生會逐個逐個上台拎證書




到時聽到佢地既名，我就即刻影相，方便一陣放學搵佢地。


「呢位小姐……你係？」
一個坐我旁邊既肥師奶問道，佢上下打量我既打扮同年齡

「我？我係家長？er......類似家長啦！」

肥師奶聽完眉頭一皺，將「你咁後生會係家長？」成句野表露無遺。





「其實我係……我係小學舊同學！返黎睇佢地畢業！」

「哦……原來係咁，不過呢間學校大部份人都係原校直上，唔多人係外校轉入黎架喎。」

肥師奶呀肥師奶，我入黎睇畢業禮咋，做乜要審犯咁樣姐大佬。

「哈哈……係咩……」

「咁你其實係睇邊個架？」肥師奶進一步迫問





死啦，我冇理由唔答架嘛！
但呢級人，我淨係識叫3個人既名。
答鋒哥又冇理由呀，佢人都死左，如果我真係朋友實知件事

即係話，我要係Sharon同呀朗之間挑選一個答佢。


「請第一位學生上台……」
正當我猶疑揀邊個答個陣
突然間，台上間既老師叫左Sharon既中文名
一個矮矮地、體形瘦弱、一頭長黑髮既女仔慢慢走上台。

我本能反應咁款，即刻舉機影相
肥師奶望住我，寬容咁笑左
「原來係佢。其實我係XX朗既媽媽呀！




可惜我唔識個女仔?！仲諗住睇下會唔會係呀朗既朋友！」


乜話？
原來佢係呀朗個老母！
好在我冇答到呀朗，如果唔係實穿煲姐！
同埋，聽伯母口吻，呀朗同Sharon真係唔識
鋒哥可能真係冇呃我，佢兩個唔係串謀策劃件事。


咪住先，咁我坐係佢隔離，咪即係一陣冇得影啊朗相？

到呀朗上台既時候，我手拎住手機，唔知影唔影好。






「拿，呢個就係我個仔啦！好靚仔呀～」
肥師奶一邊影相，一邊哄個頭埋黎同我講。

其實靚仔就唔算靚仔，不過就幾陽光型
黑黑實實，應該唔少mk妹會?個種。
不過老母眼裏出吳彥祖，明白既。


係喎，既然肥師奶覺得啊朗咁靚仔，咁不如……


「我都覺得佢好靚仔呀，你介唔介意我影佢相？」
我拎住手機，不知羞恥咁食住個勢問。






肥師奶雙手舉起繼續影相，但個頭就呆住望向我。

「唔得呀？咁算啦……」我尷尬咁笑左笑，諗住放棄。





「唔係唔得……不過頭先我係話，佢好叻仔呀。」



我心入面忍唔住講左一句粗口。