【突發】有個巴打PM我，話我聽佢死左。: 壹

件事說來話長，有d得人驚，細膽既話可以上一頁先。


件事發生係DSE後一段時間
個陣我比較得閒，等放榜冇野做
屋企唔等錢洗，所以我就日日宅係屋企
個陣上黎高登淨係寫過個爛尾故
除此之外我都冇用過呢個acc做過乜
例如留名、出post之類，都可以話係零。






跟住就黎料啦。


其實呢個acc久唔久都有人pm下我既
主要都係鬧下我上個故爛尾、催下文之類
點知有日我收到一個pm
主題係：「Hi」
然後內容係： 「 」





呢d咁空白無聊既pm，正常人睇到都應該唔會理既
不過我都話左我得閒冇野做啦
心諗： 「pm得我既，應該都係催我文既人啦」

我就好官腔咁覆佢：
「多謝你pm我，唔知你對我個故有咩意見呢？如果你有興趣既可以pm我講多d，或者l係我個facebook page留言講幾句。」

第二日check一check，都冇收到新pm
我以為有人太無聊pm我，只係我認真左，所以佢唔理我。






點知隔左三日，個個人又pm我。

主題：「好感動，終於有人覆我」
內容：「不過唔好意思，你講緊咩故？你寫既故？」


咦？
咁即係呢個人唔係追過我故既人啦？
我心離一離，因為我從來都冇用過呢個acc做其他野
咁點解呢個人好地地會搵我呢？
（拿，我唔係話我有分身acc啊，絕對唔係咁既意思，唔好諗多左。）


咁我就有理冇理，share左自己個故比佢睇




叫做吸引多個讀者啦。

同樣地，佢冇覆我pm
我估佢應該都係對我個故冇興趣，所以唔覆我啦。


點知歷史又重現一次了
佢再次係三日後pm我。

主題：「Sorry」
內容：「多謝你share個故比我睇，不過我搵你既目的唔係咁，我了左心願之後會試下睇你個故架啦。

其實我pm過好多人，我唔想一黎就嚇親人，所以我係pm入面冇打太多野，淨係打左個，希望有人會理下我。可惜，冇人覆過我，你係唯一一個肯覆我既人。其實，我有事想你去幫我做。

啊，對唔住，唔記得自我介紹，我叫啊鋒，我上個月已經死左。」






我當堂打個突，
嚇死人咩，個心離一離啊！
好玩唔玩，玩d咁既野。
因為我覺得係惡作劇，所以我冇覆到佢。

聰明既人應該都估到發生咩事
冇錯啦，佢3日後再次pm我。

主題：「我係講真既。」
內容：「我睇左你個故，你應該都係同我一樣係今屆dse既考生。你唔信，可以去XXX中學查下係咪有個學生死左。我唔知報紙有冇報過，不過全級得我一個人死，只要查下唔難查到。」


睇黎呢條友愈吹愈大，睇完我個心都即刻寒寒地。




睇得驚悚片多，通常女主角愈係好奇心重去查，就愈容易出事架嘛
不過唔覆佢既話，我怕佢會繼續pm我
如果係真既話就更加煩啦
一陣冤鬼纏身我咪更加大鑊 


我知，我呢個行為好白痴，你一定會咁覺得
冇錯，我決定pm覆佢，婉拒佢。

主題：「我幫你唔到」
內容：「唔好意思我近排都幾忙下，因為我要返part time，你有事不如搵第二個幫你啦，我又唔係你親友，或者你搵佢地會適合d。」

其實我勁吹返工架咋，不過我寧願宅係屋企都好過惹禍上身。