《迷失披頭四》: 第三章

「Sor呀Sor呀，我遲到我衰仔！」

「加多ry都唔肯講，咁叫道歉呀？」

「對唔住！」

「做乜遲到呀？打飛機呀？」

「我……唉。事到如今，我都唯有坦白同你講。」





看到阿梅茫然的神情，我不禁暗自竊笑，因為我遲到的真正原因，是為了送她驚喜── The Beatles絕版黑膠唱片。

「其實……我來自未來。啱啱就係出咗小小意外，搞到喺未來留耐咗。對唔住。」

阿梅圓圓的眼睛睜得偌大，卻絲毫不顯得驚訝，反倒有點雀躍。

「咁你有冇事呀？」

我心想，既然你肯演這齣爛戲碼，我當然要奉陪到底！





「阿梅，你係第一個信我嘅人。」

她立刻面露認真。

「回到過去係好危險㗎。喺未來嘅話，就算有咩差錯都可以返返去自己個時代補救，但係回到過去，做嘅、講嘅每一樣嘢都要好小心，萬一行差踏錯，隨時會改變歷史，分分鐘連自己都會消失！所以你冒住咁大嘅生命危險對我坦白，我點可以唔信？」

「嘩……你係《回到未來》fan屎嚟㗎？」

「回？點解係『回』呀？」





「嗯……冇嘢喇。」

「我有啲嘢送畀你。」

我從袋裡小心翼翼拿出那張黑膠唱片。

「登登登凳！點呀，係咪好Surprise，係咪好滾動，係咪好想喊呀？Come on！使乜怕醜！」

看我莫名自High，徐自梅也顯得很興奮。但突然，她停下了所有動作，並陷入一陣沉思，手指微微郁動，像在心算似的。

「我要走喇。」

「咩話？」

「我要走喇！」





「你要去邊呀？」

「我趕住返去呀！」

「咁早返屋企？六點幾咋喎老細。」

「唔係呀…唔係呀…」

「講啦，女人。」

她深呼吸了一口氣，像要借助周遭的空氣吸取勇氣。

「我要返去1964年。」





我無奈歎氣，她竟用我說過的話來對付我。

「你唔信？」

「同一個gag玩第二次就爛㗎喇，唔好笑呀。講啦你要去邊啫。」

她沉默半响，然後從我手中搶過黑膠唱片，說：
「多謝。」

接著便轉身準備離去。我一時不知所措，伸手去把她捉住，卻又不敢開口。

「嗱我問你嘞，畀你揀，你會揀同我出街，定係睇少女時代演唱會吖？」

「咩呀，做咩問埋晒啲咁嘅嘢啫？」





「揀咗先啦。」

原本聽到她要離去已經一頭霧水，再聽她問這類「你阿媽同我跌落海你救邊個」的選擇題更加令我煩躁不安。

「……演唱會囉。」

「點解？」

「咁呢排同你都幾乎日日見啦……睇吓第二樣嘢都得啩。」

她顯得有點失落，卻又一下子掛上一貫輕蔑的笑容。

「我而家去韓國買飛畀你呀，拜拜！」

那居然是她最後對我說的話。






...（待續）