單先生，你是誰？

父親節，每年一度特別感謝父親辛勞而慶祝的節日，你有好好重視，悉心安排這日的節目，務求可以藉此報答父親對自己的恩情嗎？

二十世紀初，美國多德夫人的父親威廉史馬特先生父兼母職養育六名兒女，最後卻因長年累月的體力透支、過度勞累而病倒，最後不幸辭世。多德夫人為了紀念她的父親堅韌不拔和犧牲奉獻的精神，大力推行成立父親節這個運動，以此紀念自己及全天下偉大的父親。

而我每一年的父親節，從來都沒有慶祝，因為我感受不到像威廉史馬特先生那份父親的恩情，你說我太過不孝？對不起，爸爸在我未出世以先就已經離世了…其實是…想感受也感受不到。

生命中沒有爸爸的生活起初是有點不習慣及不愉快：學校的家長日其他同學有父母陪同，但我只有媽媽出席；小時候跟媽媽逛街如要上廁所就只有去女廁；作文題目「我的爸爸」因寫不出字來而唯有交白卷；經常被同學取笑我是一個沒有爸爸的怪人；看球賽永遠只有自己一個，想找個人揶揄或歡呼都沒有，最重要的是…青春期晚上才出現的「尷尬事」…唉…沒事的，習慣就好了。其實爸爸是個怎麼樣的人我也不知道，這個問題我從小到大也有相當濃厚的好奇….

今日又是一年一度的父親節，雖然在於本人而言沒有什麼可以慶祝，但每年這個時候，我都會到外公家附近的酒樓吃飯，轉換角度來說…我是陪媽媽慶祝她的父親節…





「阿榮，你攪掂未呀？整個頭整咁耐，遲到喇！」是的，這把聲音就是我的媽媽。

我正在房間對著鏡子把頭髮左弄右撥，作出最後的檢查後對客廳大聲回應一句：「得喇，而家出黎喇！」再隨手地在衣櫃中拿起一條牛仔褲穿上，急忙的走出客廳。

「咁大個仔著條褲都衰過人既，整下你條褲腳啦。正一觀音頭掃把腳！」媽媽走過來彎下身把我左腳的褲管弄好。

我也趁機取笑媽媽，「你咁大個人仲化到成個馬騮屎忽咁，等陣阿公以為你整容添呀！」隨後媽媽伸手大力的扭了我耳朵一下…痛死…哼！又用暴力取勝…

我跟媽媽的相處模式就是這樣喜歡用言語互相攻擊，不過…每次取得「勝利」的多數是媽媽，有時我懷疑爸爸是如何忍受得了這樣的女人…還是爸爸比她還要強呢?…





在巴士上媽媽一如以往不停的吩咐我要對外公說「父親節快樂」，要對長輩有禮貌，不要亂說話等等…其實我也已經十七歲，為何還當我是七歲的小孩一樣…

我的「好奇心」又起了…「媽咪，係你眼中阿公係唔係一個好爸爸？」

「當然係啦，細細個果時呢，佢朝朝一早起身就落街買餸煮早餐俾我，你阿姨，你舅父食架。之後先番工，放工又幫你阿婆洗菜，食完飯就洗碗。唔係個個爸爸都可以架。」她望著我神氣地說。

「咁阿婆咪唔駛做？乜都阿公做晒，定係阿婆鐘意恰阿公？哈哈！」

「阿婆接放學呢，打掃呢，煮飯呢，每人負責唔同既野嘛。」





「咁…老豆呢？佢又係唔係好老公，好老豆呀？」我此刻決定挑戰媽媽的底線，以前每次我想問有關爸爸的事情，媽媽都只會跟我說一句…

「多事啦你！」這次也不例外。隨後別個頭來，若有所思抬起頭看著巴士窗外天上的雲...

「點解唔俾我知唧？點解次次問都叫我唔好多事，我自己老豆黎架！想知佢D野有咩問題喎！」我開始有點火大，語氣有點重…

媽媽望著我，閉上眼，緩緩呼出一口氣，溫柔的回答我，「阿榮，信媽咪！唔係唔想話你知，而係適當既時候你就自然會知架喇，乖啦。」

這個「時候」到底是什麼時候…？為什麼要那麼隱晦？

過了一會終於到了外公家附近的酒樓，我們先坐在之前已預約的餐桌等著，不消五分鐘，兩位分別年邁七十多歲的老人就出現面前…

「阿公，父親節快樂！」我扶著行動緩慢的外公坐下。

「榮仔真係乖，有女朋友仔未呀？」外公用半地道的廣東話問。





「讀書拍乜鬼拖，考試成績又唔係好，又冇一門手藝，娶老婆都怕佢餓死老婆瘟臭屋呀！哈哈！」媽媽總是不會放過任何嘲諷我的機會。

霎時我太陽穴的位置感到好像有股熱流刺入，向熱流之處一望，已經見到一枝拐杖頭對著我眉心之處…「我話你知！唔好有樣學樣，學埋你老豆D衰野！冇本事就乖乖地讀書，搵份政府工，渣個鐵飯碗！唔好係度累人累物！」說話如此霸氣的，就是我很少見過她笑的…外婆。

「唉！又講…我去廁所先…阿榮你乖乖地陪阿公阿婆傾計呀下。」

我見時機來到，加上一直以來的好奇心，悄悄地在外公耳邊問：「阿公…其實我爸係咩人，點解次次我問阿媽都唔答我，阿婆一提起佢又會發晒脾氣咁…？」

外公細細聲的對我說：「總之你爸就唔係咩壞人，好識照顧你阿媽，對長輩都好有禮貌…」

「有禮貌可以搵錢呀？有禮貌可以養家呀？果時唔係阿清話死都要嫁，呢類人最多只可以做朋友！而家個衰仔死埋喇！真係難為阿清…都叫左唔好嫁架啦…」外婆越講越激動，開始紅著眼…

「榮仔乖，唔好問喇，你到時大個就會知架喇！」外公摸著我的頭髮安撫說。





「我而家好大個架喇，十七歲喇，話我知啦！」我對從少就非常疼愛我的外公撒嬌。

外公細細聲對我說：「我地應承左你媽，唔會主動講俾你聽…除非…」

此時媽媽也從洗手間回來，外公也立時封口…隨著簡單的父親節晚飯完結，在歸家的路上我再沒有追問媽媽有關爸爸的事，但今晚確實是令我一直以來對爸爸的探究心爆發出來。
還有…為什麼媽媽總是要這樣收藏爸爸的一切？他又不是什麼國際間諜…

外公評價是正面，外婆是反面。

爸，你到底是一個怎麼樣的人…你又是因為什麼事離世…？

此刻，我決定找一個人，一個曾經見過我爸爸的人，這人嚴格來說，應該算是我的「姊姊」…

我打開電話，發一條簡單的信息給她…「有急事，我爸既墳場門口等」





「亡夫 單凱文之墓…生於一九XX年四月十六日…死於二零XX年十月廿八日…」

對著這冰冷的文字和石碑，我實在沒有半分感受，相中的男人，眼大大，額很高，頭髮蓬鬆的…笑得很燦爛，嘴角張得很開，在面上好像找不到任何一絲苦惱，應該是一個很開朗的人吧。這個是由我懂性以來，第一個對爸爸的印象。

我站在墳場的高山上，享受著炎夏的微風，站著在我旁邊的那個人在爸爸墳前思念默禱。她是我由小到大的玩伴，同樣也是我爸爸的乾女兒 --- 芷睛。

芷睛比我年長七歲，是爸爸生前好友耀叔叔跟雅姨姨的獨生女。這次是我主張約她一同來，我想如果要知道爸爸的事，最方便又快捷的方法應該是向她打聽吧…

「做咩咁好死約我黎搵契爺呀？第一次喎！」芷睛張開眼對著我說。

「冇…咁…咁我好耐冇搵你吹水嘛…又見你好似好耐冇黎，咪叫埋你囉…」

芷睛用力打了我一下肩膀：「你就好耐冇黎，我每隔一兩個月就會黎一次，真係都唔知邊個先係契爺生…」

「咁我都未見過我爸…其實佢對我黎講都好陌生…」





「嗯…咁都係既…點呀？冇事不登三寶殿，約我出黎想傾咩呀？」芷睛猜透了我的用意，側目看著我。

「我…我想知我爸既野…你…話我知得唔得呀？」我用誠心既眼神拜托她。

芷睛對著我呆了半嚮，才說：「做咩咁突然問呢D野？你十幾年都冇問過，你唔問契媽？再唔係問你阿爺阿嫲阿公阿婆都應該問到架。」

「我一問佢地，就叫我唔好多事，又話大個既時候就會自然會知，其實我只係想知…我爸係一個咩人…因咩事會唔係度…」我邊說邊望著石碑上的照片。

芷睛嘆了一口氣也對著爸爸的墓碑說，「契爺點死其實我真係唔知，我父母都冇同我講，只係記得十七年前有一晚我父母突然去左醫院，留低我一個係屋企，過左好耐先番黎，一番黎就同我講契爺去左個好遠既地方，以後都唔會再番黎…」

芷睛停了一回，再說：「至於契爺係一個點既人，我可以話你知，佢係一個好好既男人，雖然我唔係佢親生，但佢對我可能仲好過我父母對我，同埋我記得佢好多鬼主意，好鐘意哄身邊既人開心，我記得佢話過，人地番工已經好慘，有能力咪氹下人地開心囉。」

「咁…你唔會都想知佢死因係咩架？佢咁錫你都冇諗過想知架咩？」 我很驚訝芷睛跟我一樣不知道我爸爸的死因…

「我有問過架，我媽都唔肯講，到我問多幾次，佢先話咩你契爺傻架，咁大個人都仲係咁，咁多方法唔用係要用最唔好既方法…之後就叫我唔好問落去喇。」

「點解個個大人都係咁既…問親就一定叫人唔好問…我真係唔明有咩咁大不了！佢地唔俾我地問，我地就自己搵！芷睛，我地一齊去搵真相！」我很堅定的望著芷睛。

她冷笑一下說，「難得見到你咁積極，又好！睇下班大人攪咩都好！」

「咁我地從邊度入手？」

芷睛從手袋中拿著電話，按了幾下…再來一下奸笑就說：「攪掂！」

「攪掂咩呀？」

「玩呢D野點可以唔預我地另一個老友呀！佢唔係成日自稱全世界最聰明既人咩？」

偉杰，爸爸另一個生前好友齊叔叔跟敏姨姨的獨生子…什麼最聰明的人…根本就是一個自以為是的白痴，我對他並沒有好感…所以至小就沒有太多聯絡，但我知他對芷睛卻有非一般的感覺…

突然電話震了一下，見到偉杰開了一個聊天群組…叫「單先生，你是誰？」

就是這樣，我們三個第二代就開始尋找爸爸的行動…

而偉杰也在群組中傳來了一句：「我記得老豆部電腦有文叔既影片，快D過黎睇！」