2012末日傳奇: 序章(猝死): 雨過天青
大戰過後，除Sally仍要在醫院守護Coral以防再有突襲外，鮑文方與五美於愉景灣，DR.展和Ann於西貢，均把握短暫的時間休息，做足準備以應付妖孽，皆因他們明白，吸收了小咪千年功力的水魔使，會是一個難纏的死敵，而這個週末夜的國際金融中心二期天台，BOSS正與水魔使研討今後行動.......
"估唔到對手竟然咁利害，令四魔四妖全部犧牲哂......" BOSS始料不到強如妖魔亦難以匹敵...
"BOSS!! 呢個仇我一定會報，我一定要佢地灰飛煙滅!!" 水魔使咬牙切齒，誓要誅滅他們九人
"我知你好憎佢地...我何嘗唔係!! 出黎啦...." BOSS一聲令下，六個黑影閃現水魔使身旁
" 戊 己 庚 辛 壬 癸六妖任憑差遣!!" 六個黑影即時向BOSS下跪
"戊 己 庚 辛，你地接替甲乙丙丁之前未完成既工作，記住暫時唔好同果班人正面衝突.."
"戊，去夜店培養另一個癡女.."
"己，去搵一個好勇鬥狠既做嗔鬼..."
"庚，去搵一個好賭如命既做貪鬼...."
"辛， 你同壬癸先幫我安排下星期英雄宴一切細節，之後既安排過左英雄宴再算 "
"水魔使，你照計劃進行，唔駛再殺果個女仔，等佢地以為已經冇事算嘞...無謂再節外生枝...."
"我地而家最緊要係慢慢重整旗鼓，到有相當實力先再同佢地正面交鋒，明唔明白?"
"一切遵從BOSS吩咐!! " 一眾妖魔俯首聽令，隨即隱去.....
同樣是週末夜，愉景灣山上別墅內，鮑文方與五美稍作歇息後各自準備，金美在書房上網瀏覽有關"英雄宴"的動向，木美與土美到大露台練功，火美在修練房致電"紫霞居"接待員商討調整赴"英雄宴"當日的堪輿客戶預約時間，水美則與鮑文方研討隨後行動策略.....
"四魔四妖已經消滅左，剩番水魔使，而且下星期就係英雄宴，無可能兼顧到再去突襲醫院，相信Sally應該可以順利完成保護任務..." 水美先分析現時形勢
"不過從上次交手所見，水魔使陰險狡猾，手段狠辣，竟然避過中台八葉陣淨化，而且可以抵擋妳地合一掌法，如果佢暗地裡進行緊咩陰謀，我地真係防不勝防..." 鮑文方有感敵暗我明甚難預料
"而且唔止佢，仲有上次條乾屍而家仍然下落不明，靈魂依然被操控住..." 水美不禁憂心
"做緊咩事真係一無所知..."
"所以下星期英雄宴就係我地了解妖孽情況既關鍵，一定要從中搵出端倪，唔可以掉以輕心....." 鮑文方神色凝重 " 畢竟對方後台係咩我地完全唔知....."
"其實我地救番小咪，到底係幫佢定係害左佢，令佢要承受逃避警方追捕呢個惡果...." 水美有點於心不忍....
"Sally係執法人員，都對呢單案有唔同睇法，可能法律立場上有灰色地帶證明唔到小咪殺人呢..." 鮑文方覺事不簡單 " 再者小咪已經唔可以再用果種方式害人....呢件事等Sally放假果陣請佢過來一齊參詳啦...."
"Sally雖然係靈光化生，但同我地唔同，冇深厚修為，黎呢度長途跋涉左d...." 水美嘆Sally未身懷奇術..
"Sally絕對有呢種能力，只係佢未開竅啫..." 火美於此時步進 "不過要佢自己去領悟，旁人只可以係助緣... 至於黎呢度呢個問題....我諗Ann同Simon唔會介意去接佢既....."
此時木美土美剛沐浴完畢，身穿浴衣步進....
"知唔知小咪被通緝情況係點呀? " 木美關切目光詢問眾人
"已經向Sally了解過，警方列為高度機密，緝捕文件只係內部傳閱，仲係今日先發出，冇對外公佈，只要唔出境，唔遇到警察，應該唔會有大問題，詳情等佢放假黎呢度果陣，妳可以再親自問下佢.." 水美婉轉言詞，刻意掩蓋其嚴重性，以安撫木美....
"希望佢從今之後再無牽掛咁生活落去啦....." 土美衷心作出期盼......
馬鞍山雅典居高層單位內，小咪與Alan自早上被DR.展和Ann送返，並在他們協助下替Alan換上睡衣後，直到黃昏時份，小咪在床前靜靜守望仍未甦醒的Alan，腦海中回憶今早在車內與他倆的對話..............
"小咪，妳之後有咩打算呀? " Ann表現關切
"未知啊，只要可以同Alan一齊，我點都冇所謂.." 坐於後座的小咪一直情深望著身旁昏迷的Alan
"不過警察好似搵緊妳...妳自己要小心d..." Ann提出忠告
"咁..Alan會唔會有麻煩呀，我又可以點隱瞞佢呢?...." 小咪開始面露憂思
"警方冇通佈俾傳媒，只係內部通緝妳啫，只要妳唔出境，唔撞到警察就冇大問題 " DR.展如實相告 " 一日未搵到乾屍，都只可以當失蹤案處理，而且妳已經係普通人，更加證明唔到係妳做，我仲知道佢地冇妳認識Alan既資料，所以唔會主動去搵佢，只要妳行蹤冇俾警察發現就冇事 嘞"...
"我即使冇工作，憑Alan份工都絕對可以維持我地兩個既起居飲食，不過之前我係晚晚等佢放工一齊食完飯先至返屋企...." 小咪憶述與Alan生活細節
"妳冇煮過飯俾Alan食? " Ann略感驚訝
"我都好想..." 小咪臉有悔意 "可惜自幼接觸既就係武功，一直冇入過廚房...而家都好後悔..."
"我有時間去妳度教妳吖..." Ann表現雀躍 " 我唔算好叻，不過暫時仲未有人投訴我煮得難食既...."
"係唔敢話唔好食....." DR.展從中插了一句
"咩話....? 再講多次~?" Ann右手拑住DR.展的頸項一握...
"哇...唔敢喇...." 看到兩人在前座打情罵俏，小咪重現久違了的嬉笑.......
"啊....小咪...." 彷彿聽到Alan的輕呼，小咪重回現實...
"Alan !! 你終於醒喇...." 小咪喜極而泣
"唔....我瞓左幾耐呀.." Alan漸漸意識明朗...
"唔係好耐啫....而家先係夜晚7 點幾.....你醒番就好喇...." 小咪俯身擁抱Alan，兩人在床上互擁..
"小咪....好肚餓呵....落樓下商場食飯咯..." 擁抱了一刻，Alan感覺飢腸轆轆
"啱啱先瞓醒，不如叫外賣啦...." 憂慮解除，小咪重新領受飢餓的感覺，並因擁有此感覺而滿心喜悅............
週末入夜時分，西貢一幢別墅天台，Ann伏在DR.展懷裡，遠望附近建築物天台上一眾正燒烤男女，沉默不語.......
"Ann，仲諗緊小咪d野呀?.... " DR.展輕撫Ann秀髮
"雖然同小咪相識好短日子，但唔知點解同佢一見如故..." Ann語氣自然 " 好想快d幫佢適應普通人生活..."
"妳咁隨和，又冇機心.." DR.展笑臉倚近 " 係人都鐘意接近妳啦!! "
"衣~~!!......口花花....." Ann迎唇相向，兩人深深熱吻.......
"希望小咪呢段時間唔好俾警察搵到啦....." Ann仍在陶醉剛才感覺 "佢好辛苦先可以同Alan一齊....."
"其實呢....如果Alan可以配合就最好不過....." DR.展不禁輕嘆 " 睇黎小咪始終都避免唔到要向Alan坦白喇...."
"咦!! Simon...有SMS喎...." Ann忙拿起手機一看...
"係喎....我都收到....." DR.展同時察看手機顯示內容 " 原來英雄宴改左落荃灣愉景新城商場一次過開五十圍，仲係冇預先劃位，唔似上次咁分幾日去私房菜館食.....咁即係我地八個可以坐埋一圍囉!!.... "
"係呀!!..水美姐仲即刻通知我話阿哥叫我地去佢度一齊商量下喎..." Ann剛收到水美以"傳心術"通知..
"咁我地而家行嘞..." DR展與Ann即步離天台，驅車前去.....