2012末日傳奇: 序章(猝死): 危機約會
黑色星期五午後時段，尖沙咀區內，行人神色匆匆，為週末的到來作好休息前的衝刺，如此忙碌景象，正好襯托出半島酒店大堂茶座顧客所感受的那份閒適，一邊享用馳名的英式下午茶，一邊談天說地，不禁令人神往，今日，她們正有這個機會品嚐.....
"唔好意思....我遲左....." 小咪氣急敗壞的趕到三人所坐桌前
"唔緊要....坐低先啦.....難得妳賞面啫..." Ada連忙招呼小咪坐下
"難得可以同郭大師Hi-Tea喎，梗係即刻到啦!!" 小咪邊說邊坐下Ada對面座位.."
"呢位Janet，上次咖啡屋度佢走左妳就搵我....呢位唔駛我多介紹啦?" Ada作簡單介紹
"Janet，郭大師妳地好..." 小咪連忙笑臉相迎
"Ada 同我講小咪小姐為左男友Alan主動搵佢做全身護理，同妳傾開覺得可能感情有d阻滯，想我幫妳睇下..." Kitty細意檢視小咪面容 " 妳係咪為左呢段感情感到困擾，好驚對方會受到傷害呢? "
"郭大師真係犀利，我的確有煩惱...." 小咪憂思滿臉 " 我真係好擔心Alan會有事，雖然我會不惜一切保護佢，不過真係唔想呢種情況會發生，望郭大師指點迷津.."
"郭大師真係要幫下小咪..." 金美在銀盤上拿起一件鬆餅 " 妳睇佢個樣幾咁苦惱..."
"我已經同小咪小姐起左支心中卦...." Kitty向小咪解說 " 卦象顯示妳怕如果同Alan相戀，就會令佢招來殺身之禍，但妳又唔捨得放手，所以好困擾係唔係? "
"冇錯...就係咁..." 小咪見Kitty道出心中所慮，不禁佩服 " 郭大師，我應該點做?.."
"其實妳而家接近Alan，都已經傷害緊佢... 妳明唔明我意思?..." Kitty呷了口茶望向小咪
"~唔通佢知道我係....~" 小咪心中一驚 "郭大師...妳意思係....?"
"妳本來受命要對付Alan而接近佢，但妳鐘意左佢，為左唔殺佢而一直拖延，又擔心最後真相敗露，面對唔到Alan之餘仲會俾其他人對付佢...我有冇講錯? " Kitty故砌詞掩飾已知小咪乃妖孽真相
"大師果然神機妙算，呃妳唔到..." 小咪順水推舟 "我原本受犯罪組織差使，要接近Alan呢個銀行經理，誘使佢參與洗黑錢活動，但係我唔忍心害佢，而家一路拖住組織...我又唔可以報警，又驚俾組織發現....都唔知點算...."
"啊.....?" Janet扮作驚訝四處張望 "咁咪好似警匪片咁...佢地會唔會暗中跟住妳架?.."
"Janet唔好玩啦...." Ada望向小咪 "妳可以唔使擔心Alan，我可以搵人暗中保護佢安全，放心，唔係警方人員，妳只要唔再聽人擺佈就得嘞..."
正在此時，一侍應步至四人桌前，忽取桌上餐刀欲插向小咪...
"停手!!" 位置所限，Ada與Janet未及出手，Kitty瞬間揮指彈跌侍應手上餐刀，再朝侍應額前一彈，侍應即時倒下，引起一陣混亂.....
"佢可能操勞過度...扶佢去枓下啦...." Kitty吩咐其他前來幫忙員工扶離侍應後，有感事態嚴重，不再隱瞞，轉而望向小咪 " 事情似乎唔係好似妳講咁簡單喎...? 冷如月姑娘...."
"呀......妳已經知? 咁....佢會唔會去傷害Alan呀? "
"天意難違...好自為之...." Ada不其然向小咪說了這句話
"吓!!......妳係........." 小咪簡直不敢相信眼前曾替自己按摩的Ada竟是大慈大悲觀世音菩薩化身....
還有數小時便完成今週的工作，Alan在經理房內正盤算明天和小咪暢遊澳門的安排，忽然有人敲門....
"點呀 Nancy? " 思潮被打斷，Alan連忙回復心情應付專責基金投資櫃檯的同事
"Alan，有個客想開個大額投資戶口，你要唔要見下佢? " Nancy靜待Alan回話
"好，請佢入黎..." 有關大額投資，必先經Alan審批方可開戶
"兩位請入黎...." Nancy領客人引見後，隨即離開
"我姓陳，係呢間分行經理，未請教..." Alan向兩人遞上名片
"我姓鮑...佢係我私人財務顧問..." 鮑文方邊接過名片邊介紹
"我姓岑，呢張係我咭片.." Connie與Alan互相交換名片
"鮑先生唔知有興趣投資邊類基金咁呢? .." Alan直接探問
"我都唔係太清楚，就想聽下陳經理有咩推介..." 鮑文方微笑回應
"咁我就推介呢個精選計劃俾兩位參考下..." Alan隨即拿出基金單張向兩人講解內容......
半島酒店大堂茶座內，三美和小咪表面閒談嬉笑，享用美點，實則互相以傳心術對話...
"~冷如月，妳知唔知妳親近Alan會損佢陽氣，增加佢陰氣?同埋吸精延命會對佢身體有害?~"
"~郭大師，我當然知...但係我唔捨得離開佢....我可以點做?~"
"~冷如月，妳當初唔聽本座勸告，先至有今日煩惱，一切係妳咎由自取.......~"
"~Ada，我一見妳就感覺好親切，我知道妳係衷心想我好，只可惜我而家半人半妖，被情所困，恕我辜負妳一番好意，亦枉令觀音費心..~"
"~其實我都好同情妳，亦知道自從妳同Alan一齊之後都冇再害其他人，可見妳本性都唔壞，只要可以幫，我地都會盡量去幫妳....~"
"~Janet多謝妳，如果唔係命運安排，我諗同妳地都會係好姊妹，不過我知道剛才只係一個警告，佢地會去對付Alan，只要佢冇事，我咩都要服從~"
"~妖孽要牽制住妳，暫時都唔會傷害Alan，況且我地有人而家同佢一齊，佢都會好安全，妳可以放心，仲有妳知唔知果條乾屍而家既位置?.....~"
"~Ada，條乾屍我真係唔知佢地收左去邊，只係知佢地操控住條屍既魂魄幫佢地做野，至於做咩我就唔知嘞....~"
如是者四人一直傾談至黃昏，直至小咪收到Alan來電.....
"你有朋友撞左車入左瑪嘉烈醫院要去睇佢..想我去等你? ..哦...好啦...到時見啦!!"
小咪臉上泛起一絲不安，向三美告別離開...
"我諗我地都要去醫院一次喇..." 金美察覺有異，待小咪走後即向二美提議
"咁我先去病房，妳地暗中跟住小咪..." 火美說罷，三人即結帳離開................
Alan一直推介基金資料予鮑文方，水美在旁觀察，其溫文談吐，專業自信的確令人印象難忘.......
"估唔到傾下傾下辦埋手續都差唔多黃昏..唔知佢地果便點情況呢? " 鮑文方剛踏出銀行大門，與水美到附近咖啡室挑選面對銀行方向卡位，剛坐下即向水美探問
"三美仲陪緊小咪，開始果陣一直都冇表露身份，到小咪遭受待應襲擊，先至唔再隱瞞出手拯救....." 水美與三美心神互通，雖不在現場亦瞭如指掌
"待應襲撃? 又係妖孽操控...可惡!! 咁佢地都會打Alan主意，要小心留神..." 鮑文方提示水美留心四周有何變化
"暫時都冇咩動靜，Jacky..." 水美呷了口咖啡 " Alan條件咁好，難怪小咪對佢一往情深..."
"不過人魔殊途，除非我地諗到辦法，如果唔係到最後佢地都係要分開..." 鮑文方顯得無可奈何
"Jacky!! 小咪啱啱離開左...話Alan約佢去瑪嘉烈醫院等...." 水美向鮑文方匯報 " 火美會直接趕去病房，金美木美會暗中監視小咪...咦!! Alan都啱啱離開左銀行噃...."
"咁我地都走!! ..通知土美做好準備!!... 仲要聯絡展教授同Ann即刻去醫院會合我地.."
鮑文方滿腔自信 " 如果冇估計錯，今晚八葉蓮華要成陣降魔嘞......"