2012末日傳奇: 序章(猝死): 誤中埋伏
犁壁山，鄰近竹篙灣，風景怡人，既是遠足的好地方，更是高手過招場地不二之選
"今日要你知道我地既利害!!" 地火風空四魔使來勢洶洶
"我冇時間同你地玩!! 精既就讓路..." 被風使所生強風阻擋去路的鮑文方怒氣沖沖
"想走? 打贏我地先啦!!" 四魔使已擺好架式，隨時出招
"好呀...." 鮑文方心知早著先機之理，雙掌一推便是"震驚百裡"
只見雙龍氣勁遊走山谷之間，空使自知縱有駕御空氣魔力，亦不可完全硬碰，只好暫避其鋒，至於其餘三使已一早隱藏待機而動
"咁快就縮沙嗱!! 咁我走喇!!" 一招得手，鮑文方正欲前去殮房會合眾人，豈料四周忽然起火，一時被困火圈之內，於是一躍而起，然而人未到半空，已被無數氣劍所檔，被迫落回火圈內，甫一著地，即中地使圈套，雙腳被地固術所釘，動彈不得，隨即漫天氣劍飛插而下...
"魚躍於淵!!" 鮑文方雖困烈焰之中，仍不慌不忙出招防護，氣勁如若蛟龍圍繞全身，以氣擋氣，四使陰險奸詐，見一時仍佔不到上風，火使首先催谷火勢，步步進逼，風使再以鮑文方為中心祭起龍捲，配合火勢演化成火龍捲，空使則不斷向中心點潑灑氣劍，務求消耗鮑文方力量之餘，亦儘量拖延時間
鮑文方人在火龍捲中，周遭氣溫漸漸上升，更要連續鼓動氣勁護身以擋由上而下氣劍，時間一長，已感覺疲累，再被迫吸入熾烈空氣，渾身焦灼難耐，漸感不支，四使看準機會，正盤算給予其致命一擊
"辛苦哂!! 係時候了結佢喇.." 四妖身影從地下冒升，並吩咐四使按指示合力誅殺鮑文方，原來四妖意欲待風使驅散火龍捲一刻，即給對方來個措手不及，從四面出爪擊殺，一舉中的
鮑文方此刻因功力虛耗過度已疲憊不堪，全憑無比意志一直支撐，自知已漸到極限，忽覺身邊烈焰突全數驅散，雖仍嚴陣以待，卻感力不從心，任憑四面爪勁湧至，彷似無力招架，正當四妖以為得手之際，一股掌勁以鮑文方為中心由上向下作弧形擴散，震去爪勁，更震飛潛伏地下施法的地使，倒地吐血，隨即一人從天而降立於鮑文方身前
"展....教授..." 地固術已破，回復活動能力後的鮑文方已力竭倒地
"冇...可能...." 三魔使被如此突變嚇至目瞪口呆
四妖已領教過DR.展功力，當下豈敢怠慢，即指示三魔使一同施襲以謀勝機
DR.展雖睹生死之交倒在身後，唯危機未過，只好速戰速決，再予以施救
"~四妖飄忽無定，難以觸摸......有喇!!....一於要班妖孽嘗下苦頭~" DR.展已心生一念
但見四妖三魔使自八方同一時間攻向DR.展，卻同時分別被五招所退
"呆若木雞 " 震退左右夾攻甲丙兩妖
"心驚肉跳" 震傷從旁攻向胸腹的空風兩使
"六神不安 " 火使從側欲用火攻，被連擊六掌重創而退
"想入非非" 乙從前方凌空爪下，遭掌勁轟中頭腹手腳而退
"力不從心" 丁從後而至，被震飛而退
四妖見四使受傷非輕，自知已無勝算，便與四魔使隱去無縱
DR.展同一時間連發五招，一擊得手解困過後，此時亦攙扶已不省人事的鮑文方離開
時近黎明，殮房附近空地，激戰現場已被警方封鎖調查，仍在隱身網內的火美一邊守護仍陷昏迷女眾，一邊等待DR.展和鮑文方出現
"呀.......金...金美..." 土美緩緩醒轉，見金美橫臥身驅之上，忙加以叫喚
"土美!! 妳醒嗱? " 火美見土美回復意識，大感驚喜
"係呀...火美" 土美勉強撐起上身而坐，見躺於地上三女，大驚 " LEADER，木美同Ann佢地.." 再目睹前方不遠處正在搜證人員 "火美!! 我地..."
"放心....我地俾隱身網遮住，佢地睇我地唔到..." 火美連忙安慰 "不過估唔到你地個個都受左重傷..."
"受重傷既唔只佢地..." DR.展攙扶已失去知覺的鮑文方步進隱身網內 " 佢中左四魔使圈套，功力耗盡之餘仲俾火燻傷肺腑，情況唔係好樂觀..."
"Jacky!!" 兩美驚聞DR.展語調黯然神傷，見至愛危在旦夕，不禁激動流淚，已傷重的土美更悲憤過度再次昏倒
"就天光喇...扶哂佢地上車先啦..." 原來DR.展已停泊"鬼車"在旁，即和火美攙扶眾人上車，當攙扶Ann時，見其仍知覺全無，回想昨天仍在車上有說有笑，如今卻......不禁流下兩行英雄淚
"振作D...Ann唔會咁快就掉低你唔理你既" 火美坐在前座微拍DR.展左肩兩下，示意已安頓好眾人上車
"帶我地返愉景灣啦" DR.展語氣沉重，"鬼車"即緩緩開行，待駛離空地後極速絕塵而去，期間無人察覺
中午時分，瑪嘉烈醫院單人病房內，女探員正默默守候躺在床上仍昏迷未醒的Corol Ho，望其甦醒得以了解事件始末
"呀.......呢度係....." Corol Ho睜開重重眼皮，見身處陌生環境頓感驚恐
"Corol小姐妳醒嗱....呢度係醫院病房...唔駛驚...我地會保護妳...." 女探員見Corol露出驚慌神情，忙輕言安撫
" 妳係..." Corol情緒稍為平伏，只覺渾身乏力
"我係警察，隸屬新界北總區重案組既，我地跟據妳入住酒店果陣登記既資料知道左妳身份同埋聯絡到妳外地既屋企人，安排緊佢地過黎....妳啱啱先醒，休息下先....我去通知醫生妳醒左，如果醫生認為妳冇問題先會同妳落口供..." 女探員正欲開門步出病房
"咁Madam ...John呢...佢係咪都入左醫院呀? 下.." Corol開始激動，更欲撐起身軀
"妳瞓番低先啦....我...我地仲搵緊佢...唔使擔心..妳鎮定d先....." 女探員見狀忙跑回病床雙手握Corol肩膊，為安撫Corol，只好對她暫時哄騙
"咦..呢位小姐妳醒左嗱..." 剛巧護士開門步進，見情況混亂即到床邊按鈴求援並加入阻撓 " 妳啱啱先醒想去邊呀...要去都等醫生檢查左先啦...醫生黎喇!!"
同一時間醫生與另一護士進來 " 麻煩madam出去等等，如果病人情緒OK會通知妳地...."
女探員無奈踏出病房在門外守候，同時以手機發短訊通知 James馬