西灣山女鬼: 第一節

「喂，陣間我地去到東霸，有咩可以影呀？」家俊在的士內把換著手中的相機。

 

「我唔知呀，我只係見到網上有人講個度有好多奇形怪狀既石，而且風景都唔錯，我地可以去東霸影相，之後再落浪茄影沙灘！」力宏說。

 

力宏是今次活動的「攪手」，作為一個攝影愛好者，他喜歡四處到香港不同的地方拍攝相片，而今次我們希望遠離繁囂的城市，拍攝一些風景照，今次我們的主題是日落。





 

「嗱，事先聲明，東霸同浪茄我真係未去過，我上網見人講由東霸行去浪茄，再由浪茄搭的士出返去西貢，的士費大約一百蚊，你地有冇其他意見先？」力宏說。

 

「得啦，你放心啦，你去錯地方我地都唔會話你，總之你負責安排所有野就得啦！不過話時話，其實我地想影風景，可以去大澳或者去元朗大棠都得呀，點解去要東霸？」我說。

 





「我唔知點解昨晚突然之間好想去東霸同浪茄，所以我約埋你地一齊去。」力宏說。

 

「我地而家都搭緊的士入去架啦，冇野影咪當大家出來吹下水聚下舊囉！講咁多做咩呀，你地帶左咩相機出來呀？我就帶左Leica啦！」阿耀把掛在頸中的相機出來炫耀一返。

 

很快，的士已經到達東霸的迴旋處。





 

我們望一望四周的景色，果真令人心曠神怡，美中不足的是，可能冬天的關係，陽光不太猛烈，反倒覺得有一點點陰。

 

我望一望手上的錶，時間為下午二時正。

 

只見力宏立即把袋裡的單反相機拿出來，並更換了一支24mm 至 70 mm 的鏡頭後便四處拍攝。

 

「嘩！你支鏡貴野，買左幾多錢呀？」家俊走過去捉著力宏說。





 

「貴就唔係貴，不過不能否認既係，買左一支靚境，我覺得我影相都好似靚左。」被人誇獎了數句後，力宏有點飄飄然，並逐一向我們推介他新買回來的鏡頭有什麼優點。

 

「咁你而家影相用咩設定模式去影相？」我虛心討教地問。

 

「緊係Auto Mode 啦！仲駛問！」

 





很自然我想起吳彥祖為「黑紙」拍攝短片的一段說話，意思大約是「香港人很喜歡購物，永遠也是買最好和最漂亮的東西，即使有時候買返來之後未必識用。」

 

不能否認的是，現今的香港人已經被物質主義所引導著，而忘記了什麼是Get the basic right.

 

「不如我們開始啦，我們下去影下那些岩石，之後就再去浪茄啦！」我於是沿著鈄路往另一邊走，並開始我們的拍攝之旅。