西灣山女鬼: 第二十九節

「冥婚！」細輝哥說。 


我聽到之後，心又寒了一寒，雖然我們已經確認這個世界上真的有鬼這回事，可是聽到「冥婚」這兩個字，我的內心還是寒了一寒。 


可是即使是「冥婚」，大前提也是要有「男方」和「女方」，既然個男既一早已經去世，咁佢既魂魄仲響唔響到？又或者男方已經一早投胎做人，那麼這場「婚事」又如何成立？ 


細輝哥把車停在了一旁。 






「師傅，我地到左富山村啦！」細輝哥叫醒熟睡中的高人。 


「到左啦？」高人慢慢的張開眼。 


「我地上去搵個男人既屋企人先啦！」高人說。 






「就咁上去？唔係話女鬼只係想見下個男人咩？不如我地響佢地家企樓下，等佢地出入就可以俾女鬼見到個男人一面啦。」家俊說。 


我也很好奇，既然我們現在就行上去，豈不是違背了女鬼的承諾嗎？ 


我們下車後，就找了個位置抽起煙來。 






「響你地返左屋企冇耐，我好快就收到細輝既通知，我先知原來女鬼鍾意個男人一早就已經死左，即係話想見返情人呢個心願一定了唔到，於是我再一次問女鬼，問佢想點，佢話可唔可以搵得返個男人，即使佢投左胎又好，點都好，佢都想知個男人點。」高人說。 


「咁如果個男人真係投左胎，咁隻女鬼咪死唔眼閉？」


「我問左佢個男仔個名，於是我又開壇去求地府裡面既鬼差幫手搵一搵有冇女鬼想搵既人，鬼差終於都搵到，而且個男人仲未投胎，響陰間生活緊。」 


「即係好似問米咁？叫鬼差幫手搵鬼。」我說。 


「係，意思差唔多。」 






「個男既響陰間生活？唔係死左就去投胎架咩？仲有陰間都可以生活架？即係好似我地既生活咁？」我們連珠炮發向高人提問，因為對於我們來說，陰間實在一件未曾接觸過的事，我們十分好奇。 


「唔係個個死左都可以即刻投胎，有好多原因，我講唔到俾你地聽，陰間同陽間係兩個不同既空間，人死左但係仲留戀現世既就會一直響我地陽間徘徊，所以好多時人死之前我地通常會同佢講，叫佢安心咁去，枉死既就會打齋，超渡佢地俾返條路佢地行返去陰間，落到陰間都仲要生活，所以陽間既人定時燒野俾佢地，佢地係收到架！再過一段時間，就可以去投胎做人。」 


我聽落還是不太相信，感覺好像和佛教所說的陰間地府有點出入。 


「原來個男仔同女鬼一樣，佢都忘記唔到生前既女鬼，佢嗰時仲未知女鬼死左，所以佢落左去陰間之後都係唔肯投胎，想等女鬼死左之後落陰間，再搵返佢；我同佢講佢等緊既女仔家寶都已經過左身，佢於是叫我問下女鬼冥婚好唔好，女鬼一口答應左，所以我地而家要幫佢地安排。」師傅說。 


「咁佢地既屋企人知唔知？唔係我地就咁上去人地一定唔信我地。」我說。






「你放心啦，我已經安排返佢地既魂魄去返陽間，佢地會報夢架啦！」 


問世間情為何物？一對戀人在生時不能在一起，而死後大家也在尋找對方，三十年之後，尋尋覓覓方再次遇上。 


我想起我的夢中情人，她是一個品學兼優的女孩，而我只是一個中五會考零分，而現在月入八千的九十後，沒有事業沒有錢，過的是月光族的生活，我有資格愛她嗎？我配得上她嗎？現今的環境告訴我，我和她的距離有著一條萬里長城咁遠！所以，我把愛意藏於心底，而我則只能在面書像毒能一樣，不停留意她的更新，因為我連一個在她的status 或相片「讚好」的勇氣也沒有。 


「做咩能野呀？你條能樣喊呀？」細輝哥指著我說。 


「唔係，唔係，有沙入眼！係呢，我地而家去邊先？」我很快的便拉開了話題。 






「我地而家上去啦，個男人應該已經報左夢俾佢屋企人聽架啦，我地而家上去幫佢攞帖，之後再去搵女鬼既屋企人同佢提親。」高人說。 


抽完煙後，我們便前往那男人的家。