異塵餘生香港2277: 94 罪魁禍首
流主、孖根和狗肉進入主樓，然後依照四眼和貓頭鷹提供的地圖和資料，尋找著殘黨首領的位置。可能因為幾乎所有殘黨的主要軍力都被調動到外面，主樓裡面的敵人既沒有動力裝甲，也沒有很強的戰鬥技巧，在孖根手屈一指的槍法下，他們都只不過是會活動的槍靶而已。
「孖根．．．」流主打破沉默
孖根沒有說話，只是默默看著流主。
流主誠懇地說：「一直以嚟，好彩有妳幫我．．．．．．多」「唔好同我講依啲，我唔想死住。」孖根打斷了流主的說話，她續說：「你都係，未好好報答我之前，都唔好諗住死。」
「．．．嗯。」流主點一點頭，然後問：「咁．．．道歉得啦掛．．．？」
孖根好奇：「做咩事道歉？」
「好多嘢啦．．．成日都帶麻煩比妳，妳知我又鍾意多管閒事．．．唔係黃金小子依件事．．．又一直呃住妳同佢地．．．」流主摸摸頭說
孖根笑了一笑：「嘿．．．其實我根本唔在乎你係唔係黃金小子．．．你嘅身份係咩都無所謂，你就係你。」
流主雖然想道謝，但還是只報以微笑。
經過一番戰鬥和尋找，流主他們終於來到了主樓的控制室，這同時也是整個殘黨基地的指揮中心，當然，也就是首領的房間。這房間非常巨大，而且都擺滿了一排排的先進電腦和電子儀器。又高又大的牆上更掛滿了大大小小的屏幕，除子監視著整個主樓，也能夠清楚看到外面各處的戰鬥情況。
然而，這裡卻沒有守衛，也沒有甚麼科學家或工作人員．．．如此巨大但卻冷清得很的指揮中心裡，就只有一個穿著動力裝甲的人背向著流主他們站在房間中央．．．還有他身旁一個收藏著伊甸園創造器的裝置．．．
流主上前放聲問道：「．．．你就係殘黨嘅首領？」
那人慢慢轉身過來，才留意到他身上所穿的動力裝甲明顯與一般的動力裝甲不同，它更高大更強壯，而且看來也更敏捷，跟MR首領大傻的動力裝甲非常相似．．．不過可以肯定．．．這套動力裝甲，一定更強．．．
首領說：「估唔到你地真係嚟得到依度。」
流主直言無諱說：「投降，交返伊甸園創造器出嚟。」
首領笑說：「邊有人會因為一句投降就投降架。」
「．．．你唔想死就唔好反抗，正勢力嘅大軍遲早都會攻到入嚟．．．你係無可能打嬴我地架啦。」流主說
首領嘆息：「我當然知道無可能打贏你地。唔好話以我一人嘅力量打贏正勢力大軍，我相信連打贏你兩位，都無咩可能．．．所以我先叫晒我啲人走。」
流主疑惑地想了一下：「．．．咁你明知會輸就投降啦，無謂再打落去。」
「輸？」首領突然冷笑：「嘿．．．我話我打唔贏你地，但係無話過我會輸。」
「．．．咩意思？」流主不解
「我曾經都好似你咁，膚淺咁以為場仗已經勝券在握就係嬴。」首領說：「我仲好記得，當時我帶住我嘅軍隊去攻擊敵人嘅秘密基地，我地嘅人數甚至係對方嘅十倍以上．．．好明顯，場仗我地係嬴硬．．．．．．但係，最終都係失敗左。」
「．．．你究竟想講啲咩？」流主問
「我失敗，唔係因為打唔嬴場仗，而係打嬴左場仗，但係達唔到我嘅目的。」首領耐心地說：「我吸收左一個好大嘅教訓，就係打贏場仗，唔等於件事完結．．．而件事一日未完結，都仲可能會有意料之外嘅變數。」
「你做咩要同我講依啲嘢．．．？」流主疑惑問道
首領笑說：「嘿．．．因為我要多謝你。」
「多謝我．．．？？」流主有種強烈的不祥預兆
「無錯，多謝你，仲有你阿哥流尚，比我一個捉以攞左我條命嘅教訓！」首領脫下頭盔，他竟然便是二百年前被流尚殺死的香港市長左先生！！
流主和孖根也萬分驚訝，不只是因為他倆都認得這個人，而是因為他的相貌竟然仍然如舊．．．而且，他應該是死了的！
左先生擺出一個詭異的笑容：「係咪好驚喜呢？我嘅舊朋友。」
流主驚訝得嘴巴也合攏不來：「你．．．你應該已經死左先啱架．．．．．．尚明明係對住你個頭開槍．．．點解．．．．．．」
「哈哈哈．．．」左先生笑說：「其實我都唔知點解，可能係命運掛？命運係唔比你死，就算你喺沙漠比人兜頭打一槍再活埋，你都一樣唔會死。」
「但係．．．就算係咁．．．．．．過左成二百年．．．你點解．．．」流主滿腦混亂
「你想問我點解過左二百年都仲未死？」左先生續回答：「因為我同你位朋友一樣，都係食屍鬼。」
孖根斬釘截鐵否定：「無可能！你嘅外表點睇都只係一個普通人類！」
左先生搖搖頭說：「妳實左太睇少科學啦．．．只要清楚食屍鬼嘅基因排列同異變左嘅．．．算啦，講左妳都唔會明。總而言之，要改變食屍鬼以至任何生命體嘅外表，對科學嚟講都只不過係輕而易舉嘅事。」
孖根頓時沉默下來．．．
「我知妳諗緊乜。」左先生奸笑說：「我的確有能力令妳擁有返人類嘅面貌。妳諗下，人類嘅美貌同滑溜嘅肌膚，加上食屍鬼能夠吸收輻射、長生不老而且免疫於疾病嘅體質．．．．．．我地唔係食屍鬼，亦唔係人類．．．係神呀。」
孖根仍然沉默．．．
左先生續說：「痴孖根，妳已經擁有永恆嘅生命．．．宜家只要加入我地，妳就可以得到埋永恆嘅美麗。」
「孖根．．．」流主擔心地看著孖根，他當然不希望孖根會背叛自己而投靠敵人．．．但他另一方面卻又能理解孖根的心情．．．
左先生看到流主為難的表情，便落井下石：「流主，你朋友一路以嚟幫你打生打死，你係咪都好應該為佢設想一下呢？佢揹住依個腐爛嘅軀殼咁多年，用斗篷遮住自己咁多年，無晒自尊、忍辱偷生咁多年．．．唔通你就唔可以體諒一下佢？」
流主又再無從反駁．．．
左先生續對流主說：「其實我有一個兩全其美嘅方法，就係我將你都變成食屍鬼，然後再幫你改變容貌，咁你同你朋友就可以永遠咁生存落去。」
「痴．．．痴線！」流主斷然拒絕，但內心卻確有猶豫
「只要我公布話你地已經戰死左，一定唔會有人懷疑。」左先生說
流主一時間真的糾結起來．．．
這時孖根看了一看流主，說：「流主，你一路嚟到依度，唔通都唔清楚自己嘅目的係乜嘢？」
流主一臉茫然．．．
「你唔係為左我而嚟到依度，你係為左香港廢土而嚟。如果你嘅意志係咁唔堅定，你注定會失敗。」孖根說
「但係．．．」流主無奈說：「妳對我嚟講都好重要呀．．．」
「咁鎖匙萱、阿寶、豆、四眼、鷹．．．仲有鐵膽，佢地就唔重要咩？」孖根續說：「我跟隨你咁耐，係因為欣賞你有正義感同善良，而唔係其他嘢。」
流主沉默下來。
「你識我嘅時候我已經係咁嘅樣，唔通宜家我會因為外表而失去你同一班好朋友？」孖根續說：「而且，我唔覺得佢會守信用，佢只係想用口術令我地動搖。」
左先生笑說：「你地唔信，係你地嘅損失，我唔會迫你地。」
孖根反駁左先生：「如果你係真係咁好心嘅，就唔會搞咁多嘢出嚟。」
「係咩？請問，我搞左啲咩出嚟？」左先生反問
孖根頓時愣住了．．．事實上，殘黨有做過甚麼嗎．．．？
流主想了一想說：「．．．你同MR同流合污，殺我地嘅人，搶我地嘅伊甸園創造器！」
左先生冷靜反駁：「我嗰啲唔係同流合污，係交易。佢地用錢向我買裝備，大家明買明賣，有咩唔啱？」
「但係你咁樣即係助紂為虐！MR喺九龍一帶嘅所作所為，你無理由唔知！」流主說
「我當然知。」左先生說：「但係九龍唔係我嘅領土，MR喺嗰度做啲咩關我咩事？相反，我地同佢地協議，只要佢地唔喺我嘅領土上面搞事，我就唔會剷除佢地，亦會同佢地做交易。我依一個協議，唔使用一兵一卒就保護到我領土上嘅居民，有咩唔啱？」
流主反問：「即係為左你自己嘅人民，就可以犧牲其他人？？」
「作為一個負責任嘅領袖，當然係會將自己人民嘅地位放得比其他人高。」左先生冷言：「而你呢？二百年嚟都無改變過，「大戰」嘅發生，你都有份造成，但係你就視我係一個罪魁禍首．．．到左宜家，你又走嚟話我搞事．．．你又有無諗過，依場死咁多人嘅戰爭，係邊個發起？」
流主如像被當頭棒喝一般愣怔住了．．．