異塵餘生香港2277: 89 感情用事

從戰區回到金鐘的流主他們，接受了正先生的款待。豈料在飲宴過後的深夜，流主和阿寶卻意外撞破正先生竟然想把豆強化成巨獸！
 
 
「你想將豆變成巨獸？？」流主問
 
正先生微笑說：「唔係變成，係強化。」
 
阿寶說：「正先生．．．我地正勢力係唔會製造生物武器．．．」
 
「阿寶，我地係為左大局著想。」正先生說：「為左整個香港廢土上嘅居民，我地有時候係需要不擇手段。為左整體嘅利益，小部份嘅犧牲係在所難免。」




 
流主反駁：「每個人都有佢嘅生存權利，你憑咩嘢去決定犧牲邊個？？」
 
「如果依個強化劑對我有效，我唔介意為左大局犧牲我自己。」正先生耐心解釋說：「面對住戰爭，我地唔可以自私咁以一己私欲行先，我地一定要想盡辦法用盡一切手段去提升勝利嘅機會。一旦我地依場戰爭輸左，我地唔單止浪費左我地戰友嘅血汗同生命，我地仲會斷送左香港廢土嘅未來。」
 
流主和阿寶一時間無從反駁．．．
 
正先生續說：流主，你都好清楚，我地係必須要喺殘黨手上搶返伊甸園創造器。」
 
流主想了一下，否定說：「．．．唔得，如果為左嬴依場戰爭，我地就連人性同人道都可以拋棄．．．終有一日我地都只會變成下一個獨裁者。」




 
正先生搖頭嘆道：「你唔明白，我地如果連眼前嘅獨裁者都打唔嬴，我地講人性同人道，都只不過係徒然。一日你仲比道德綑綁住，一日你都未有足夠決心去嬴，咁樣，你就永遠都嬴唔到。就算比你僥倖嬴到，下一個人亦都一定可以輕易咁將你擊倒。」
 
流主又再無話可說．．．
 
「而且，無生物武器嘅戰爭，就好有人性好有人道咩？」正先生續說：「戰爭本來就係唔人道，有生物武器唔人道，無生物武器都一樣唔人道，根本就無分別。所以，既然決定得要打，就應該用盡所有方法，以最快捷最有效嘅手段去打。戰爭愈快完結，對所有人就愈好，依啲先至叫做人道。」
 
流主無法認同正先生的說法．．．但心底裡卻又不能否定他的見解．．．
 
正先生接著說：「流主，我知道你係一個善良而又有勇氣嘅人，更加係一個必成大器嘅人材，我打從心底支持同欣賞你嘅原則。只不過，單憑善良同勇氣，係唔足夠帶領大家。一個英雄，除左善良同勇氣，仲需要「狠心」。」




 
「．．．狠心？」流主想不通
 
「要為世界帶嚟真正嘅和平，依三樣嘢缺一不可。只有勇氣同狠心，就會變成一個為社會帶嚟混亂嘅獨裁者；只有善良同狠心，無勇氣去行動，就注定係一個紙上談兵嘅失敗者；而好似你咁，只有善良同勇氣，往往都會喺重要關頭比道德糾纏而裹足不前，最終一事無成。」正先生續說：「我相信你嘅生命中，都經歷過唔少需要「狠心」嘅場合。你有無發現，所有正確嘅結果，都係嚟自一個狠心嘅決定？」
 
流主聞言，不禁回想起一路以來自己做過的所有決定和事情．．．
 
正先生看著流主的雙眼說：「每一個英雄，都一定背負左好多好多過往所做過嘅狠心決定，就係依啲包袱令到我地成長，令到我地堅強，令到我地能夠忍辱負重，令到我地有毅力去承受世俗道德嘅唾罵同愚昧良心嘅責備！可能，依一刻，你同好多人都一樣覺得我嘅做法係錯，覺得我嘅做法太過激進．．．但係唔緊要，我唔需要大家明白，亦唔需要大家諒解，我要嘅．．．只係結果。」
 
流主的內心非常掙扎．．．在正先生的道理和與豆的情義之下，流主果然如正先生說，裹足不前．．．
 
「歷史上，唔係都經常出現依啲例子咩？生於和平嘅人，都以為用愛同歌聲就可以感化敵人，佢地屢試屢敗都仍然係冥頑不靈，繼續企喺虛假嘅道德高地上面甘心情願比自己打造嘅枷鎖束縛．．．佢地最終，有無得到啲咩成果？？」正先生續說：「佢地又有無諗過，佢地能夠享有和平，就係因為有前人願意捨棄道德，忍受世俗愚觀嘅白眼去戰鬥爭取返嚟！」
 
 
流主和阿寶完全無言以對，他們不能否認，甚至是十分認同正先生的觀點．．．可是，難道真的必須要犧牲豆嗎？？他倆此刻猶豫不決．．．道德和道理、情義和大義．．．應當如何取捨．．．？




 
「我知道你地一定會明白。」正先生微笑說著，便回頭與其他科學家繼續工作
 
 
流主和阿寶看著豆那無可奈何的眼神，過往日子的一些片段不禁在心裡泛起．．．他們一起闖蕩、一起戰鬥、一起吃喝玩樂、一起出生入死，他們情同手足、親如家人，同時也是最佳拍擋，亦師亦友．．．這難以言喻的友誼早已經締固根深，淨是想像孖根和鎖匙萱知道豆的事會如何悲痛，流主和阿寶的內心便抽痛起來．．．．．．他們真的可以大義滅親嗎．．．？
 
 
「．．．咪住．．．．．．」流主突然說
 
正先生沉默地回頭過來．．．
 
「對唔住，請你放左豆，我唔會比你將佢變成巨獸。」流主說
 
正先生皺起眉頭：「你依然唔明白。」
 




流主說：「我明白．．．但係我唔想犧牲豆。」
 
正先生反問：「即係其他超級變種人就可以？」
 
流主深呼吸道：「．．．．．．係。」
 
「．．．你依啲係偽善。」正先生說
 
「可能我真係偽善，總之．．．我始終做唔到。」流主說
 
正先生失望地說：「面對住戰爭，我地豈可以感情用事？」
 
「對唔住．．．」流主堅持：「放左豆。」
 
「唔得。」正先生語氣強硬




 
這時，一直沉默的阿寶上前說：「正先生，你唔係話要盡力提升打嬴依場戰爭嘅機率咩？如果你想嬴，你就要放左豆。」
 
正先生不屑問：「啊？願聞其詳。」
 
「首先，你能唔能夠確定豆嘅強化會成功？」阿寶問
 
正先生說：「你應該知道科學係無百分百嘅答案，但係，我對我團隊嘅計算有信心。」
 
「計算，咁即係未有實質數據支持啦？」阿寶續說：「如果強化失敗，豆死左，我地就會失去一個擁有強大戰鬥力嘅幫手；就算強化成功，你又能唔能夠肯定變成左巨獸嘅豆會仍然幫助我地？更嚴重嘅，佢會唔會失去理智攻擊我地？」
 
正先生反駁：「如果失敗，我地大不了損失一個超級變種人。但係如果成功，我地嘅戰力就會得到飛躍性嘅提升。到時配合其他組織嘅幫手，我地一定可以贏。」
 
阿寶說：「正先生你搞錯左一件事．．．Bitch Kingdom、鄉土、U記等等嘅組織，佢地並無話過幫助正勢力，佢地只係承諾會幫助流主。」