異塵餘生香港2277: 87 勇氣

流主他們嘗試說服康師傅派出援兵營救雪絨，可是卻突然內訌起來．．．作為半個局外人的爆爆子不知如何應對．．．
 
 
孖根大怒：「係我親手殺死佢架！！！」
 
「寶寶你講嘢使唔使咁過份呀！」鎖匙萱指責說
 
「我過份？」阿寶說：「妳就好好啦係咪呀？妳其實係咪知道左我地好多嘢啦？我地沿路遇到咁多危機，會唔會就係多得妳班貓頭鷹朋友一直將我地嘅情報賣比人呀？？」
 
「又關我事？？」鎖匙萱大感無辜




 
「咁點解妳唔話我地知？我地宜家連有幾多嘢比貓頭鷹知道左都唔知．．．」流主也忍不住說
 
「連主主你都唔信我？？」鎖匙萱十分無奈：「孖孖夠咩都唔講啦，你又唔懷疑佢？？」
 
「我無懷疑任何人，我亦都唔會懷疑你地．．．」流主說
 
阿寶聞言立即諷刺說：「扮咩清高呀，偽黃金小子！」
 
「阿寶，你好啦喎！」孖根反喝




 
豆慌張起來：「你地一人少句啦．．．」
 
這時，康師傅見流主他們內訌得火熱，便火上加油：「你地根本就各懷鬼胎，仲話想去救人？唔係個個都好似你地個超級變種人朋友咁蠢，你地講乜就信乜架。」
 
「．．．係嘅咩？」豆摸著頭說
 
康師傅說：「你以為佢地真係當你自己人呀？你嘅存在價值只不過係幫佢擋下子彈，代佢地以身犯險。你又知唔知正勢力做咩要抽取你嘅基因樣本？」
 
豆聞言便低頭沉思起來．．．




 
康師傅續說：「你不如問下司徒寶，睇下佢會唔會話你知？再唔係咪問下流主，係咪次次都搵你擋子彈？一句「豆豆」就可以令你命都唔要咁保護佢地，你話你自己嘅角色係咩嘢？」
 
豆依然沉默．．．
 
「佢地只不過係利用你咋，你自己諗清楚係咪啦，垃圾豆。」康師傅嘲笑說
 
這時，豆慢慢抬起頭．．．然後一臉茫然說：「．．．我都唔知你講咁耐其實係講緊乜．．．」
 
康師傅聞言頓時呆了一下．．．
 
「你講嘅嘢太複雜啦．．．而且都係得你講咋嘛．．．你又唔係佢地肚裡面條蟲．．．你又知佢地點諗．．．」豆說
 
康師傅一時間沉默下來．．．
 




豆續說：「同佢地相處左一段日子．．．我又唔覺得佢地係利用我．．．咁．．．我就緊係信自己睇到嘅嘢．．．多過信你啦．．．」
 
「但係，所有嘢都可能係佢地扮出嚟呃你。」康師傅說
 
「咁你都可能係扮出嚟呃我地啫．．．而且呀．．．就算係真咁又點喎．．．全部都已經過去晒啦．．．」豆說
 
這次反而是康師傅無言以對．．．
 
豆摸著頭說：「可能有啲嘢佢地係無講出嚟．．．但係我相信佢地一定有佢地自己嘅原因．．．而且．．．佢地係咩人唔重要，最重要嘅係佢地係咩人．．．」
 
眾人一時間也呆住了．．．就連康師傅想再說話挑撥離間，也說不出話來．．．
 
「．．．哈．．．」流主會心微笑：「豆講得啱．．．我地相處左咁耐，大家係咩人，其實大家都好清楚。」
 
阿寶冷靜下來說：「．．．咁又係，其實．．．好多嘢我地自己有眼睇嘅。」




 
孖根也不禁自嘲：「生存左200幾年，估唔到自己都仲係咁膚淺．．．」
 
鎖匙萱笑說：「豆豆好叻叻呀！聰明豆！」
 
「吓．．．係咩？．．．呵．．．呵呵．．．」豆摸著頭，害羞起來
 
「康師傅。」流主上前說：「話比廢土知貓頭鷹係唔好蝦，定係由得大家繼續睇唔起你地，慢慢侵蝕你地．．．你自己選擇。」
 
康師傅猶豫起來．．．．．．
 
「康師傅．．．請你保護我地．．．」鎖匙萱誠懇說：「唔好比悲劇再發生．．．」
 
 
．．．．．．．．．




 
 
片刻之後，整裝待發的流主他們已經來到殘黨所躲藏的建築物外．．．
 
 
孖根說：「妳朋友就係比殘黨捉左入去。」
 
爆爆子擔心說：「姐姐．．．妳唔可以有事啦．．．」
 
流主緊握手上的M72高斯步槍說：「咁我地依計劃行事啦。」
 
「．．．記住，你地嘅目標係引開佢地注意，我地會搞掂佢地。」康師傅說
 
流主笑說：「有你親自出馬，我地就放心啦。」
 




康師傅冷冷道：「費事我唔出手你地當我係病貓。而且，我都唔想比人話我淨係識離地觀察。」
 
「師傅．．．」鎖匙萱既感尷尬，也感感動
 
「哼．．．你地唔好拖累我地貓頭鷹呀。」康師傅說
 
 
成功說服康師傅出手幫助拯救雪絨的流主他們小心翼翼地潛入到建築物內．．．並沿著樓梯往上走．．．
 
 
孖根靠著牆壁，探頭從轉角看出去：「我地唔知佢地會匿喺第幾層，大家唔好大意，續層搜上去。」
 
 
眾人由戰鬥經驗最豐富的孖根帶領，步步為營地前進。然後，終於在三樓發現了殘黨的行蹤．．．
 
 
「．．．十三個，唔肯定係咪全部。」孖根偷瞄了一下
 
「雪絨姐姐呢？」鎖匙萱憂心問
 
「比人綁住左，應該未死。但係．．．睇嚟都差唔多。」孖根說
 
 
現場只見十數個穿著深藍色動力裝甲的殘黨成員都手持先進武器四周巡邏著。而在遠處的角落，一個脫下了動力裝甲頭盔，看來是部隊隊長的男人正在拷問著被牢牢綁在牆壁上的雪絨．．．
 
 
隊長說：「屌，妳都係乖乖地將妳知嘅所有情報、仲有臨時據點嘅位置講出嚟，咁我地可以考慮即刻殺左妳。」
 
滿身損傷和灰塵的雪絨沒有回應，只勉強地喘著氣．．．
 
隊長舉著一柄木棒續說：「屌，其實妳自己都心照啦，口硬係無意思。做得貓頭鷹嘅成員，妳都預左唔會有人嚟救妳．．．屌，我都唔係好想虐待妳架咋，妳無謂迫我呀。」
 
雪絨依然保持沉默．．．
 
「屌．．．」隊長高舉木棒說：「隨妳鍾意啦。」
 
就在隊長打算揮棒之際，數顆炸彈狀的物體突然噹噹作響掉到他的面前！
 
「屌！」男人心知不妙
 
 
在眾人趕及作出反應之前，數道強光便已經破彈而出！強光瞬間便奪走了眾人的視力，尤其是脫下了頭盔的隊長，他的雙目更被閃得疼痛萬分！
 
然後，一輪子彈和電光球的掃射便緊接而來，雖然他們都穿著裝甲厚重的動力裝甲，但在不清楚對手來頭的情況下，也慬慎地尋找掩護物自保。
 
 
「隊長！」其中一個殘黨的動力裝甲戰士把隊長拉到一旁的掩護物後
 
「屌！睇唔睇到係咩人？？」隊長狼狽地載上頭盔
 
因為一直載著頭盔，視力很快便恢復過來的動力裝甲戰士說：「咩都睇唔到呀隊長！佢地放左煙霧彈呀！」
 
「屌！」隊長勃然大怒
 
 
可是，即使他如何不忿也無濟於事，強勁的彈幕穿過濃濃的煙霧撲面而至，他們也只有躲起來等待反擊的時機。
 
就在此時，四周子彈穿梭和撞擊的聲音開始慢慢減弱，換來的卻是同伴的慘叫聲！由於事情發展得太過迅速，隊長一時間也混亂不已！