異塵餘生香港2277: 84 巨大破壞力

巨型變種甴曱的出現使眾人都陷入苦戰，就連巨獸也毫無辦法．．．不過，一個神秘的絕世高手卻在這時出現！
 
非比尋常的暴徒滿臉不屈自信，咬緊牙關，雙臂擋在首級之前，氣勢如雄、勢如破竹地穿過成千上萬的變種甴曱，猶如一頭死盯獵物的野豹，以快如飛箭的速度筆直向著目標衝過去！！
 
 
「受死啦！！」非比尋常的暴徒大吼
 
 
一息之間便來到巨型變種甴曱腳下的他兩手握拳收到腰間，雙腿朝地猛力一蹬，整個人如火箭般向巨型變種甴曱的頭顱彈飛過去！！
 




就在此時，巨型變種甴曱突然張開嘴巴，一些又白又黃的酸液隨即從其口中噴濺出來，那個非比尋常的暴徒不慎被液體擊中，身體頓即在半空中溶解．．．死無全屍．．．．．．
 
現場隨即變得鴉雀無聲、一片沉寂．．．而且更充斥著一股無奈的氣氛．．．
 
然而，巨型變種甴曱看來一旦進入了戰鬥，便不打算停止。它大步踏前，續開始無差別對所有人噴出溶液！
 
 
「弊弊！！」鎖匙萱大驚
 
「匿入啲建築物度先啦！」流主說




 
 
他們都不敢怠慢，立即與狗肉跑進附近一幢建築物內暫避．．．幸好這裡暫時只有少量變種甴曱，鎖匙萱用小太刀星辰，兩三下功夫便把它們收拾了。
 
 
「呼．．．佢噴嗰啲真係胃酸嚟架？？咁勁勁嘅．．．」鎖匙萱偷瞄著建築物外的境況，汗顏說
 
「妳無聽過甴曱嘅胃部係可以分解地球上任何物質依個說法咩．．．？」流主也有點懼色
 
鎖匙萱搖搖頭說：「無聽過喎．．．甴曱有胃胃嘅咩？」




 
流主想了一想：「．．．無嘅咩？」
 
「有嘅咩？」鎖匙萱反問
 
「無嘅咩？」流主再反問
 
「鎖匙萱．．．？」這時，突然一把女子的聲音從後傳來
 
 
流主和鎖匙萱回頭一看，赫見一個比鎖匙萱還要年輕，背著一個大背包的可愛少女身帶輕傷、滿身灰塵，靠著牆壁步履蹣跚地走過來．．．
 
「爆爆子！？」鎖匙萱一眼便認出這個少女的身份，續緊張上前伕著她：「妳無事呀嗎？？」
 
爆爆子並未有回答鎖匙萱的問題，便緊張地捉住鎖匙萱，眼有淚光說：「妳可唔可以幫我啦．．．求下妳啦．．．」




 
鎖匙萱憂心問：「發生左咩事呀？？」
 
「頭先啦．．．我同雪絨姐姐匿埋左喺一幢建築物度跟蹤緊嗰啲超級變種人同暴徒啦．．．點知我地幢建築物突然倒塌啦．．．之後我同雪絨姐姐就失散左啦．．．」爆爆子無奈說
 
「雪絨姐姐？？」鎖匙萱聞言立即緊張地對流主說：「主主．．．我地要幫爆爆子．．．」
 
流主卻汗顏說：「既然係鎖匙萱嘅朋友，我地當然要幫．．．．．．但係，我地都可能自身難保．．．」
 
 
鎖匙萱和爆爆子向建築物外看出去，赫見變種甴曱正開始向她們迫近．．．而且巨獸也早已經滿身溶爛的傷口．．．倒地不起．．．
 
 
「咁啦啦．．．我地先離開依度，然後再諗辦法幫妳朋友！」流主說
 




「我地行依邊啦！」鎖匙萱引路說
 
 
流主他們三人一狗回頭便跑，那群變種甴曱也魚貫地飛進建築物，緊緊追遂著流主他們不放。
 
 
「爆爆子！我地無咩子彈啦．．．」鎖匙萱說
 
「．．．交比我啦！」爆爆子把背包翻到胸前，便伸手進去探索
 
 
意想不到，原來爆爆子的背包裡收藏著不少不同種類的爆炸品！她隨手掏出了數個燃燒彈，便擲向從後追上來的變種甴曱群。燃燒彈著地便隨即爆破，熊熊烈火破彈而出撲向變種甴曱群，瞬間把它們燒成灰燼，並堵住了通道。
 
成功擺脫變種甴曱群，他們從建築物的另一邊出口逃跑。然而原來變種甴曱群早已經漫延到這一邊了！！
 




 
「大獲！」流主心知不妙
 
 
此時，一群變種甴曱從旁向流主他們蜂擁襲來！可是，流主他們早已用盡彈藥，而這種距離下爆爆子也不敢使用爆炸品，能作戰的就只有使用小太刀星辰的鎖匙萱。
 
 
「主主，你地走先，我頂住！」鎖匙萱緊握武器準備迎戰
 
「頂妳個頭。」一把熟悉的聲音說著，一道烈焰便從旁掃向變種甴曱群，阻擋了它們的攻勢！獲救的流主他們看過去，拯救他們的原來便是孖根她們！
 
「孖根！」流主喜出望外：「妳地無事就好啦！！」
 
「大家咁話。」抱著火焰噴射器的孖根笑說
 




「孖孖！仲有寶寶同豆豆！！」鎖匙萱高興得跳起來
 
「萱萱！」豆也十分雀躍
 
不過爆爆子看來被豆這個超級變種人嚇著了．．．
 
而阿寶則反被爆爆子嚇著：「頂！做乜又多個女仔架！？」
 
孖根問鎖匙萱：「朋友？」
 
鎖匙萱回答：「係呀！佢係爆爆子，佢都係貓頭鷹成員嚟架。」
 
流主續說：「爆爆子同佢姐姐失散左，希望我地．．．」
 
「喂喂喂．．．」躲在豆身後的阿寶打斷了流主的說話：「宜家點睇都唔係時候傾偈．．．」
 
 
就在他們談得興高采烈的同時，變種甴曱群又再次追上來！流主他們無可奈何，只有繼續逃亡．．．
 
 
「我地係咁逃走都無用喎．．．不如諗下辦法點殺死隻巨型變種甴曱啦．．．」流主說
 
「哼．．．你唔係講緊頭先我地見到嗰隻巨獸咁大隻嘅變種甴曱掛？」孖根說
 
眾人沉默了一陣子．．．看來答案顯而易見．．．
 
「如果有GP-01喺度．．．對付佢就易過借火．．．」阿寶說
 
「就算唔理嗰啲普通變種甴曱，以佢嘅體積．．．我地手上嘅武器都無咩用。」孖根說
 
流主說：「頭先有個傻佬話咩隻巨型變種甴曱咩．．．以柔制剛．．．咩反作用力．．．話用瞬間產生破壞力嘅攻擊先有效．．．」
 
「．．．聽落有道理，但係有啲咩可以瞬間產生大破壞力？」阿寶想了一下說：「我淨係諗到豆嘅拳擊同鎖匙萱把刀。」
 
流主擔心說：「但係隻巨型變種甴曱咁大隻，仲要識得噴胃酸，近戰會唔會太危險．．．」然後他看了一看面色灰白，作嘔作悶的豆說：「而且豆嘅狀態唔多好．．．」
 
阿寶不耐煩說：「依樣唔得嗰樣又唔得．．．咁仲有咩方法呀？」
 
「爆炸品、手榴彈嗰啲咪可以瞬間產生巨大破壞力。」孖根說
 
阿寶想了一想說：「．．．但係對付體積咁大嘅目標，可能要用到好多爆炸品．．．或者小型核彈。忽然間邊度嚟咁多炸彈？」
 
流主和鎖匙萱對望了一眼，異口同聲問：「爆爆子！妳會唔會咁啱有小型核彈喺身呀？」
 
爆爆子慌忙在背包裡尋找：「唔．．．．．．啊，啱啱好有一個啦．．．」