異塵餘生香港2277: 80 真相
潛入發哥住所的孖根，想著只要找不到隱形裝甲便能證明昔日好友發哥並非真兇．．．可惜，偏偏事與願違．．．
知道這個穿著隱形裝甲的敵人原來便是發哥，孖根大感傷痛悲憤：「．．．點解？．．．你嘅仇恨真係深到．．．不惜要殺害其他食屍鬼？？．．．甚至係我？？」
發哥說：「我只係為左保護鄉土。」
孖根問：「殺鄉土嘅兄弟姊妹，就係保護鄉土？」
發哥氣忿說：「班仆街人類終有一日都會將我地趕盡殺絕，我一定要喺依件事發生之前阻止佢地！」
「傷害我地嘅係上一代嘅人類，唔係宜家依班欣澳嘅居民．．．發哥，過去左嘅嘢，你就由得佢過去啦．．．」孖根無奈說
「你根本唔明白人類嘅本性！！」發哥滿腔怒氣：「佢地宜家肯乖乖合作，係因為佢地都自身難保咋！到佢地安頓好自己，解決晒自己嘅問題，就會開始侵略人地，依啲就係人類嘅本性呀！人類，係永遠都唔會變架！」
「你無錯，人類的確係咁。而睇嚟流主都無錯，我地食屍鬼心入面，都其實係人類。」孖根揶揄
「我唔理妳點講，總之我所做嘅一切都係為左鄉土好，為左要依班人類消失！！」發哥說
「你想班人類消失，咁點解要殺死其他兄弟姊妹嚟陷害人類？」孖根問
「因為宜家鄉土嘅兄弟姊妹甚至係老豆，都已經比人類嘅花言巧語迷惑晒，比物質利益所蒙蔽！佢地只係睇到眼前嘅利益享受，但係就睇唔到將來依班人類會點樣滅絕我地！」發哥露出一副充滿著復仇怨念的笑容續說：「只要我用方法將人類醜惡嘅一面暴露出嚟，鄉土嘅兄弟姊妹就會醒過嚟，一齊同心合力去剷除依班萬惡嘅人類！！」
「殺害自己嘅兄弟姊妹，然後嫁禍比人，就係暴露人類醜惡一面嘅方法？」孖根嘆氣說：「．．．你暴露左嘅，只係你自己醜惡嘅一面。」
「孖根，妳已經無得救。」發哥說著便馬上載上頭盔並再次進入隱形狀態
然而，有違發哥預期，孖根並未有立刻向他攻擊，反而是收起武器打算逃跑！
「孖根！面對我！妳以為妳咁樣走左，事情就會解決咩？？定係妳痴得人類太多，連個膽都細埋呀？」發哥嘲諷說
「我只係覺得你仲有得救。」孖根說
「只可惜妳無！」發哥繼續追擊
不知何故，孖根始終不願還擊，面對身穿隱形裝甲的發哥，她節節敗退！迫於無奈之下，她仍然只堅持以小刀自衛．．．可惜以她的近戰技巧，連保護自己也甚為勉強。孖根此刻倒是有點後悔沒有好好跟鎖匙萱請教．．．
「發哥，你真係要殺埋我？？」孖根狼狽地閃躲著發哥
隱身了的發哥說：「為左保護鄉土，就算再唔願意我都會出手！」
孖根大感無奈，發哥已經走火入魔失去理智，看來為了保命，她只有大義滅親，拔槍殺死這個相識多年的好友．．．
不過，就在此時，一顆手榴彈突然從窗外被拋進來！孖根和發哥也愣了一下，然後孖根不顧一切趁虛破窗跳出屋外！果然，手榴彈隨即爆炸，雖然威力未足以炸毀發哥的小屋，但若然在毫無防備之下被炸到，也絕不可能全身而退！
「大姐！？」
孖根聞聲仰頭看過去，竟然是欣澳那個嘴巴伶俐的乞丐：「係你？你喺度做咩呀？？」
乞丐說：「我頭先一直跟蹤住個隱形人嚟依度．．．然後聽到佢同唔知邊個講嘢，仲打起上嚟，我咪用個炸彈炸鳩個仆街囉！」
「仆街？」孖根不明白乞丐為甚麼會認識隱形人，也不明白為甚麼要如此稱呼隱形人，但她未有深究：「算啦，唔好講咁多啦，趁宜家快啲走。」
非常戲劇性地被乞丐所救，孖根火速回到欣澳。可惜，才剛回來，孖根便再受到另一個強烈的心理衝擊．．．．．．老婆婆上吊自殺了。
流主他們和程天也大感惋惜和悲痛，特別是才剛趕回來的孖根，她既傷心，同時也十分失望．．．自己的一個好友，殺害自己的兄弟姊妹，再間接害死數個人類．．．甚至迫得一個老婆婆哀痛自盡．．．而他做出了這麼多過份的事，目的就是為了挑起紛爭．．．曾經相信發哥的孖根．．．此刻徹底地無言．．．
然而，事情並未完結，孖根還未來得及交代剛才所發生的事情，數輛大型軍車便載著上百個重裝備的食屍鬼守衛搶先把欣澳給重重包圍！！流主他們立即跑到街上查看，其他的村民也因為深夜出現如此吵鬧的聲音而走出來一看究竟。
程天一臉茫然：「做．．．做咩事呀？？」
上百個看來不懷好意的食屍鬼守衛都紛紛舉槍把流主他們圍起來，還有一些守衛把村的出入口封鎖起來！
然後，食屍鬼之父在受傷了的發哥陪同下從軍車下來．．．
食屍鬼之父說：「你地都好事多為啦．．．枉我仲咁信你地。」
程天大感疑惑：「究竟咩事呀？？」
發哥沒有理會程天的疑問：「就近日所發生嘅事件，我地經過商討，為左保護鄉土嘅兄弟姊妹，決定由宜家起正式同欣澳解除同盟關係！」
「咩話！？」事情發展的速度快得連流主他們也大感意外
發哥續說：「欣澳嘅居民你地聽住，宜家你地只有兩個選擇！一，就係離開欣澳！二，就係成為我地嘅一份子，或者死亡！」說畢，食屍鬼守衛們立即拿出大量被改裝過的手榴彈
眾人聞訊也一片嘩然．．．
發哥高舉一顆改裝手榴彈說：「依個係輻射手榴彈，如果你地唔離開，我地就會用佢地嚟攻擊欣澳！！」
因為同盟的原故，欣澳大部份的武器圴交由鄉土保管，此刻，手無寸鐵的欣澳居民可謂完全無助。他們根本沒有議價的籌碼，甚至是沒有選擇的餘地．．．
程天萬般無奈：「究竟發生左咩事？？如果係因為有人殺死食屍鬼依件事．．．啲犯人同個女人都已經比你地處決左啦．．．就連佢阿媽都上吊自殺左．．．．．．都算係對你地有個交易代呀．．．你地仲想點呀．．．」
發哥轉身向著其他的食屍鬼說：「點解我同老豆喺依啲咁夜嘅時間叫大家全副武裝出嚟，然後仲突然宣佈同欣澳解除同盟關係．．．就係因為啱啱發生左一件事！」發哥說著，忽然舉手指著孖根：「痴孖根，我地曾經嘅姊妹．．．佢串通欣澳嘅居民，行刺食屍鬼之父！！」
眾人聞言又再次嘩然，食屍鬼們更憤怒得起哄！孖根則一臉難以置信的表情．．．
「雖然，好彩比我及時阻止左佢地嘅奸計，但係我自己亦都差啲無命，我間屋亦都比佢地炸毀左．．．」發哥說
其他食屍鬼得知「真相」後無不怒髮衝冠，對這群忘恩負義恩將仇報的混蛋恨之入骨！
發哥乘勢火上加油，挑起群眾怒氣：「佢地一而再再而三咁殺害我地嘅兄弟姊妹，我地都一再讓步包容．．．宜家佢地仲居然大膽到行刺食屍鬼之父，我地仲點可以忍！？」
食屍鬼們都叫囂和應，甚至更亮出武器，準備一雪仇恨，伸張正義！只要食屍鬼之父一聲令下，無數的炮彈和輻射手榴彈便會把欣澳夷為平地！！