異塵餘生香港2277: 72 生意
休息了一天，流主他們補充了一些補給品便繼續趕路向下一站出發。他們駕車繞過戰區的外圍，向遙遠的鄉土出發。雖然鄉土的地理位置偏僻，即使他們願意協助，也不一定可以調動太多軍力和資源，但是考慮到這埸戰爭流主他們絕對沒有可以失敗的空間，能得一卒得一卒，流主還是認為有必要招攬他們。
「好期待想睇下孖孖嘅屋企會係點呀！」鎖匙萱十分雀躍
好學不倦的阿寶說：「我都係第一次去鄉土，真係有少少期待。」
孖根說：「咪又係爛地一塊。」
就在他們輕鬆談天說地的時候，數個穿著綠色制服的超級變種人突然衝出路面強行攔截流主他們的載具！眾人立即拔槍打算強行突破，豈料，數台印有燈色U字的裝甲車也在這時緊接從超級變種人身後駛出！流主自知以他們私小型貨車是絕對無可能匹敵如此規模的敵人．．．無可奈何之下，他們只有把車停下來．．．
阿寶無奈說：「不得了．．．」
孖根說：「竟然依個時間出現．．．」
「終於有機會見面啦。」一個穿著西裝的中年男人從裝甲車走出來，他微笑續說：「放心，我唔係嚟殺你地。」
流主從車裡呼叫過去：「你係邊個？你想點？」
「落車講，係咪大家都會方便啲呢？」男人舉起雙手示意自己並無武器，同時他的手下也都跟著放下武器
「．．．點好好呀？」鎖匙萱緊張問道
孖根懷疑說：「信唔信得過？」
阿寶卻說：「應該係我地有無得揀．．．」
流主想了一會，打開車門說：「．．．我過去睇下佢想點，如果真係有咩事嘅，你地即刻開車走先。」
「你覺得我地會走咩？」孖根問
「咁又係。」流主笑說，然後便慢慢下車走向那個西裝男人
流主四周觀察了一下，才發現他們的四面八方都早已佈滿了對方的人．．．看來即使孖根她們想逃，也不容易．．．
「幸會．．．鼎鼎大名嘅流主。」男人雖然一臉親切笑容，但他明顯是那種笑裡藏刀的人
「．．．你係邊個？做咩截住我地？」流主的語氣不太友善
「唔使咁緊張喎，我地只係嚟搵你傾下生意咁啫。」男人客氣續說：「小姓汪，係Ultimate Unit嘅老闆，你可以直接叫我汪，我好怕太過客套虛偽嘅說話。」
「你地唔係一直追殺緊我地嘅咩？宜家無端端又傾咩生意？」流主問
「老實唔呃你，我地Ultimate Unit接到一單大生意，可惜我地評估過，依個任務風險實在太高，單憑我啲手下，分分鐘要蝕返比佢。」汪說
「咁關我地咩事？．．．既然個任務係咁危險，咪唔好接囉。」流主說
「做生意，最忌太過短視。」汪掏出一口香煙遞向流主說：「你知唔知肥彭集團？」
流主舉起手掌謝絕汪的香煙說：「未聽過．．．」
汪點起香煙說：「肥彭集團係廢土上最大規模嘅商隊，佢地啲車上面全部都印住FAT-P依個字。我地Ultimate Unit都經常做佢地保鑣。」
「．．．咁又點？」流主問
汪說：「佢地近排喺西北邊睇中左塊連接新界來往通道嘅地，想喺嗰度加設一個據點，將行商路線延伸到新界。」
「．．．咁又有咩問題？」流主問
「問題就係嗰度近排出現左一批叫做「死亡爪」嘅怪物，根據我地向貓頭鷹買嘅情報得知，死亡爪原來係「大戰」時期美國製造嘅生物兵器。」汪說
流主疑惑：「你話「大戰」時期美國嘅生物兵器？？．．．咁點解宜家會喺香港廢土出現？」
汪笑了一下說：「嘿，咁依啲嘢就真係要問下政府軍啦。」
「．．．點解又關佢地事？」流主不解問
汪抽了口煙說：「老實唔呃你，連我地Ultimate Unit都覺得頭痛嘅怪物，會係邊個無啦啦放喺嗰度？」
「．．．點解一定係政府軍呀？」流主仍然不解
「因為如果肥彭嘅商隊路線延伸到政府軍管轄嘅新界，就會影響到佢地嘅管治。」汪說
流主皺起眉頭：「點解呀？．．．有商隊過去．．．有咩問題？」
「依個係管治方式嘅問題。」汪解釋說：「政府軍管治新界嘅方式同九龍、香港島唔一樣，九龍係無政府狀態，無規矩無制度無公義，所以先會有咁多土匪同Bitch Kingdom，甚至係我地依啲組織出現。」
「咁香港島呢？」流主問
「正勢力管治嘅香港島表面睇落比較好。」汪說
「．．．表面？」流主疑問
「正勢力會無條件幫助同接濟廢土居民，甚至教佢地求生技能。雖然佢地擁有同政府軍不相伯仲嘅各種技術知識，但係因為佢地崇尚民主自由嘅光環，所以佢地從來都唔會主動招才，導致長期缺乏技術人員，直接令佢地嘅科技比政府軍落後。老實唔呃你，我地唔加入你地，唔幫你地打仗，你地都會保護我照顧我，咁有幾多人會咁抵得諗加入你？正勢力依個管治方式嘅好處係加入得嘅人都會百分百忠心，但係壞處就係辛苦左自己人，仲養懶左班居民。」汪抽了一口煙，把煙蒂掉在地上，輕輕用他亮麗的真皮皮鞋將其踏熄，續說：「統治新界嘅政府軍就啱啱相反，佢地用強權式管治，獨裁壟斷新界嘅資源。佢地唔會迫你加入，但係只要你肯加入，就可以共享依啲資源，而且表現愈好，分到嘅就愈多。另一面，佢地唔單只唔會將資源分比唔肯加入嘅人，仲會不斷搵理由將佢地驅逐。雖然，佢地嘅成員無正勢力嘅咁忠心，但係佢地嘅人只要肯遵從政府軍嘅規則，就保証豐衣足食。半威迫利誘之下，佢地嘅人自然多，發展亦會更快。」
流主消化了汪所說的話，得出結論：「．．．所以，如果肥彭嘅行商路線延伸到新界，就會打破政府軍壟斷資源嘅管治方式．．．」
「無錯啦。」汪說：「老實唔呃你，政府軍管唔管治到新界就唔關我事嘅，總之，只要幫到肥彭延伸行商路線，我就一定發達。」
「．．．咁關我咩事？」流主其實知道汪的用意，不過卻偏要裝傻
「咪玩啦。」汪笑說
「．．．點解要搵我地幫手？我地應該係死對頭先啱。」流主說
「哈！」汪禁不住笑了一聲，續說：「搵食啫，唔好講咩死唔死對頭！你問我點解要搵你地，其實好簡單。首先，你地殺左我幾多人？超級變種人搞你地唔掂、Mad Raider又比你地搗破埋．．．群埋痴孖根唔夠，宜家仲有個貓頭鷹前成員、正勢力科學家、超級變種人．．．甚至連Bitch Kingdom都比你冧掂埋．．．．．．你咁招積，唔搵你搵邊個？？」
「咁又點？點解我要幫你？」流主有點不屑地問
汪笑說：「問得好，你唔問我反而擔心你會跣我。理由有三個：一，你唔係四出招攬緊組織喺正勢力同政府軍嘅戰爭入面幫你手咩？」
流主沒有回應。
汪續說：「二，只要你幫我，我保證我地Ultimate Unit從今以後唔會再追殺你地，亦唔會再接任何針對你地嘅生意。」
流主仍然沉默．．．
汪凝重起來：「三，我已經接左肥彭依單生意，如果你唔幫手嘅，我就唯有拎你地嘅人頭嚟填氹。」
流主反駁：「如果你地係對付得到我地，又點會對付唔到你話希望我地幫你對付嘅嗰啲死亡爪？」
「可能係我講得唔清楚，我唔係對付唔到佢地，只係對付佢地可能會令我損失慘重咁解。老實唔呃你，對付你地都一樣，唔通你以為我會無做足準備就親自嚟搵你咩？」汪雖然沒有武器在手，看起來也不擅長戰鬥，但他的眼神卻表現出他絕對是一個不好對付的人物．．．