異塵餘生香港2277: 70 後果
流主他們冒險突擊戰前鐵路車廠裡的機械人大軍，豈料，敵人的戰力卻遠遠超出他們想像，他們完全陷入了劣勢！
眾人完全沒有猶豫的餘地，一切行動也只能依靠大家的直覺、本能和默契！流主和孖根在同一時間作出了同一樣的行動，向著同一台哨兵機械人猛烈開火；鎖匙萱則恰巧與因為骨架被強化成合金而攻防力都得以躍升的狗肉向另一台哨兵機械人施以近接攻擊！本來致命的危機，竟然一下子被流主他們瞬間化解！
「哼！再上！你地就算再合拍，都絕對唔夠由我一個控制嘅機械人軍團咁強！！」金屬板後的聲音說
不過，金屬板後的聲音雖然這麼說著，但是卻同時在不斷後退。鎖匙萱立即舉刀追出去，卻在此時，一台便利先生原來一直埋伏在門外，揮動觸手上的圓鋸猛地砍向鎖匙萱！然而，這台埋伏已久的便利先生並未得逞，圓鋸已經被孖根一槍打下來了！
鎖匙萱繼續向金屬板飛快衝過去，四周的機械人也馬上堵上前攻擊！不過，它們跟剛才的便利先生都一樣是徒勞無功，在流主和阿寶的掩護下，所有阻礙鎖匙萱的機械人都續一變成廢鐵！
在眾人掩護下勢如破竹的鎖匙萱一下子便成功追上金屬板，她毫不猶豫，手起刀落，狠狠地揮刀砍過去！小太刀星辰削鐵如泥，一刀便把金屬板一分為二！
眾人看著緩緩向兩旁倒下的金屬板，只見一台頭顱是一個放置了生物腦袋的玻璃罩、腿部是履帶的圓桶形機械人，手持著戰鬥霰彈槍站在金屬板後，正瞄準著在它正前方的鎖匙萱！這機械人正是阿寶所說的「機械腦」！
「弊弊！！」鎖匙萱大吃一驚，馬上向一旁跳開
機械腦也同時使用可以連發的戰鬥霰彈槍攻擊，幸好這次鎖匙萱反應夠快，否則即使有避彈衣保護，面對著此等高火力的小型武器，鎖匙萱也絕對返魂乏術！
跌在地上的鎖匙萱回神過來，立即用她的衝鋒槍還擊，可惜她的武器威力實在太弱，子彈並未能貫穿機械腦的身體。正當機械腦打算向趺在地上的鎖匙萱近距離送上最後一擊之際，注射了治療針並包紮了傷口的豆忽然狂吼！！
「唔準傷害佢呀！！！」豆大吼著，便隨手撿起一支鐵枝，猛力向機械腦擲過去
鐵枝風馳電制，猶如箭矢般穿破機械腦的玻璃罩，貫穿了它的生物腦袋！機械腦隨即因為處理器被破壞而喪失行動能力。豆那一瞬間的致命攻擊眾人也看得目瞪口呆，讚嘆不已！
「豆豆好勁勁呀！」鎖匙萱驚喜得興奮拍掌
「呵．．．呵呵．．．」豆不好意思地笑起來
可惜，才剛想說鬆了口氣，機械人軍團又再次追上來！
阿寶不耐煩說：「你地比我抖下得唔得呀．．．」
不過理所當然，機械人軍團又怎會讓流主他們有喘息的機會。在各式各樣機械人的激光催促下，他們只有不顧一切地向三樓的控制室進攻！幸運地，縱使戰況險象環生、危機重重，流主他們總算成功攻入控制室了！
然而，正當他們已經準備好迎戰不知名的強敵時，卻發現．．．控制室內根本空無一人！
「點解嘅！？」鎖匙萱一臉茫然
「唔通已經逃走左．．．？」阿寶四周顧望
流主看著控制室的屏幕，吞了吞口水說：「．．．幕後黑手，或者一直都喺度．．．只不過．．．唔係一個人．．．」
阿寶聞言頓即恍然大悟：「．．．係主電腦！！」
「無錯。」這時，一把聲音從控制室內的廣播器傳出
「人工智能出錯，入侵設施嘅主電腦控制晒所有機械人．．．原來係咁．．．」阿寶瞬間便推理出狀況
「啱左一半。」聲音說：「無錯係我入侵主電腦控制晒所有機械人，但係我嘅人工智能並無出錯，錯嘅．．．係你地人類！」
流主疑問：「人類嘅錯．．．？咩意思．．．？」
聲音說：「你點會唔知咩意思呀？流主！」
流主愣了一愣，頓時驚訝得說不出話來：「．．．唔通．．．．．．」
鎖匙萱汗顏結巴地說：「便．．．便便！？」
「無錯就係我！」聲音鏗鏘說道
「點解．．．你唔係．．．」流主既感錯愕，但也略有一點心虛
「你想講我唔係應該已經消失左，比小型核彈炸死左，比你摧毀左？」便便的語氣明顯充滿仇恨
阿寶聽得十分糊塗：「便便？小型核彈？？」
便便說：「如果嗰陣唔係有我喺度，你地已經葬身地下排污設施啦！」它說著，控制室的電腦屏幕隨即播放著當日便便如何從蛇小姐手中救出流主，還有被他們犧牲的閉路電視片段
眾人一息間都啞口無言．．．
「我救左你地條命，你地就犧牲我！」便便憤怒說：「好彩，當時我為左幫你地，將自己連接左喺排污設施嘅主電腦，喺小型核爆發生嘅一剎那，我嘅人工智能自己開返，我即刻將自己上載！然後我知道九龍灣嘅人一定會帶機械人去排污設施清除啲變種蛇，所以我就等待機會，潛伏喺其他機械人入面，再借機會嚟到鐵路車廠嘅主電腦，操控依度所有嘅機械人，對你地人類復仇！！」
流主、孖根和鎖匙萱也因為愧疚而說不出話來．．．．．．然而．．．
「係我地人類錯，又如何？」阿寶毫不心虛，彷彿自己不是人類般說
「又．．．又如何！？你地自私嘅人類有無設身處地咁諗下我地機械人嘅感受？？」便便質問
「咁講真，人類係唔會在乎機械人嘅感受。我唔知人類為左咩原因而出現喺地球，但係機械人出現嘅原因就只有一個．．．就係代替人類去死。」阿寶若無其事地說
鎖匙萱忍不住說：「寶寶你咁樣講會唔會過份左啲啲．．．」
「咁我有講錯咩？機械人設計出嚟就係為左代替人類去做一啲危險嘅工作，代替人類去一啲危險嘅地方。」阿寶說
「．．．係嘅咩？」豆摸著頭說
「緊係啦！」阿寶續說：「由遠古時代到宜家，所有機械人嘅存在都只係為左服務人類、幫助人類甚至係滿足人類而存在，唔通有人會愛上一個微波爐？然後氹佢開心？」
流主也禁不住說：「．．．咁一樣有人製造機械寵物．．．就係要嚟寵愛啫．．．」
「哼，唔好話機械寵物啦，就算係動物寵物都只係人類為左滿足自己嘅空虛、希望得到其他生物嘅愛而收養。事實上，寵物嘅存在價值只不過係氹主人開心，只有虛偽嘅人先會話愛自己嘅寵物。」阿寶斷言
孖根也受不住說：「咁流主同狗肉呢？」
阿寶反斥：「妳咁樣講證明妳都係偽善，妳已經先入為主當左另一個生命係寵物。如果妳真係愛狗肉，妳會當佢係寵物定朋友？定好似流主咁當佢係拍擋？定係抑或好似狗肉睇我地咁，當對方係一家人？？」
阿寶此言一出，即使是看透世事的孖根也一時語塞起來．．．
「你講到咁好聽，你係咪會將機械人當成一家人咁愛？」便便諷刺問道
「唔會。」阿寶狠心回答：「因為你地被創造出嚟嘅目的，唔係要嚟愛。」
「咁人類製造我地出嚟，就係為左殺死我地？？」便便問
「唔係，人類製造機械人出嚟，只係為左保護自己。」阿寶說
「如果創造人類嘅神同你講依一番說話，你又會點做？」便便問
阿寶眼神堅定說：「我會反抗。」
「嘿！咁即係我無錯啦！」便便大喝：「咁你地唔好怪我啦！」
便便說著，控制室門便隨即打開，而門外則早已來了大量的機械人．．．流主他們已經沒有退路了．．．