異塵餘生香港2277: 50 線索
經過一番苦戰，超級變種人的侵略戰終於在阿寶駕駛GP-01擊倒巨獸後劃上句號。
第二天的早上，經過了一晚充足的休息，流主他們精神飽滿地跟著守衛，前往位於主要大樓內的會議室拜訪正勢力的頭領。
穿過一些通道，乘搭過升降機，流主他們來到了會議室。守衛推開眼前一雙雅緻的大木門，率先出現眼前的便是放在會議室中央的一張修長桌子，它足以讓十多人安坐而不覺擠擁。而桌子的左方便是一大扇上接典雅雕刻裝飾的天花板，下接綠茸茸地毯的落地玻璃窗。雖說裝潢不算金碧輝煌如玉樓金殿，但仍然不失莊嚴氣派。
透過落地玻璃窗，大半個香港廢土的景色盡收眼簾。一幢幢倒塌損毀、破碎崩裂的高樓大廈，襯托著即使在微微日光下仍然寂若死灰的頹垣敗瓦和污泥土垢。怎麼看，這個香港都不過是一具屍骸而已。
「係咪好似兩個世界咁呀？」一把老邁的聲音從後傳來
站在窗邊的流主他們回頭一看，說話的是一個穿著簡單洋服、衣不兼采、胸口袋放著一塊黃金色口袋方巾的老人。他雖然柱著拐杖，步行時一瘸一簸，但挺胸疊肚的他看來身體仍然壯健。
阿寶見著老人，立刻恭敬地點一點頭：「正先生。」
「得啦得啦，坐啦，唔使客氣。」正先生笑說
於是流主他們便隨便坐下來。
「首先，我要多謝你地幾位拔刀相助。尋晚如果唔係有你地喺度，後果真係不堪設想。」正先生說
「唔好咁講，我地都係盡我地所能啫。」流主客氣說
「你地嘅事，麗雅已經講晒比我知架啦。」正先生說：「好高興有生之年可以見到黃金小子，當然亦都好榮幸見到鼎鼎大名嘅痴孖根同埋貓頭鷹嘅前成員啦。」
流主和鎖匙萱不習慣這種場面，一時間也不知如何反應，只是不好意思地點一點頭．．．
正先生微笑問鎖匙萱：「原諒我無禮，麗雅無話我知妳嘅名字。」
「吓．．．呃．．．叫我鎖匙萱得啦．．．」鎖匙萱有點尷尬
「鎖匙萱．．．果然後生可畏，年紀輕輕就有如此膽色去同巨獸作戰．．．如果我地正勢力嘅人有妳地幾位咁犀利，同政府軍嘅戰爭，就必勝無疑。」正先生說
「呵．．．呵呵呵．．．」鎖匙萱不禁沾沾自喜起來
「好啦，回歸正題。我知道你地係為左兩件事而嚟，流主嘅記憶，同埋傳說中嘅伊甸園創造器。」正先生說
流主緊張地說：「你係咪知道啲咩？請你一定要話我知！」
「唔瞞你，其實我地都唔知道伊甸園創造器喺邊。」正先生搖頭說
流主聞言頓感失望。
「相反，你係黃金小子，其實應該係你先知道伊甸園創造器嘅位置。」正先生說
流主無奈說：「我就係失左憶先唔知喺邊．．．」
「無錯，所以最快捷簡易嘅方法，就係幫你恢復記憶。」正先生說
「你地有辦法幫我恢復記憶！？」流主大喜
「咁我唔敢妄斷，不過我地有充足嘅醫療設備，或者得都唔定。」正先生說
既然有一絲希望，流主當然欣然接受。與此同時，好學不倦的阿寶也帶著流主的嗶嗶小子和狗肉到實驗室作研究和檢查，希望可以學習到嗶嗶小子的科技和找出狗肉能夠隱身的原因。
「．．．原來咁樣。」配載了實驗室護目鏡的阿寶正在用顯微鏡觀察著狗肉的血液樣本
「．．．啊？有咩發現呀？講嚟聽下。」悶得發慌的孖根正在清潔手槍的部件
阿寶解釋說：「狗肉嘅血液入面有隱形裝甲用嚟產生反光磁場嘅液態電池，所以狗肉先識得隱形。」
「咁點解肉肉啲血入面會有隱形裝甲嘅電池液嘅？」鎖匙萱抱著狗肉問
阿寶除下護目鏡，聳肩說：「咁我就唔知啦。」
這時，剛好正先生一拐一拐地和流主一起來到實驗室。
「阿寶，可有收穫？」正先生問
「分析完架啦，啲資料已經儲存晒喺主電腦嘅資料庫入面。」阿寶說
「做得好。」正先生滿意地點一點頭，然後卻又眉頭深鎖說：「不過我依邊就唔太順利。」
阿寶他們都放下手上的活兒，諦聽正先生解說。
「流主佢並唔係失去左記憶，而係腦部因為長時間陷入睡眠狀態，導致記憶解體。換言之，佢嘅記憶一直存在，只係無法讀取。亦因為佢嘅記憶唔係「隱藏」左，所以我地根本無可能幫佢「喚醒」返啲記憶。」正先生說
阿寶問：「咁．．．即係唯有等流主嘅記憶自我修復？」
正先生點頭說：「依個係其中一個方法，但係要用幾多時間自我修復，就無從考究。可以係一秒，可以係一年，亦可以到死嗰一刻都未得。」
孖根問：「咁另一個方法呢？」
「另一個方法就係「記憶重組」。」正先生說
阿寶聽到便頓即面露難色：「記憶重組．．．我地邊有咁先進嘅器材．．．」
「我地的確係無。」正先生續說：「不過有一個地方好有可能有。」
流主問：「係邊度？」
正先生凝重說：「黃金力量基地。」
根據正先生所提供的資料，黃金力量的基地位於金鐘對開海域的西北邊、九龍西南邊海岸線上的一個貨櫃碼頭內。而依照歷史資料推測，黃金力量基地很有可能在「大戰」時受到破壞而石沉大海，這也解釋了為甚麼冷藏著流主的裝置會在那一帶的海岸出現。
有了新目標後，流主他們也急不及待出發了。流主、狗肉、孖根、鎖匙萱、阿寶，還有鷹和鐵膽一行六人一狗，駕駛著正勢力的巡邏艇從金鐘渡海向黃金力量基地出發。
「V.A.T.S.？」流主一臉疑惑
「嗯。」阿寶點頭說：「Vault-Tec Assisted Targeting System，附助瞄準系統，即係你所講可以減慢時間嘅能力。但係其實佢唔係減慢左時間，而係用一個特定頻率嘅電流刺激你個腦，令腦部運算速度加快，所以你先會有時間減慢嘅錯覺。」
「啊咁樣．．．」流主雖然對科學不至於一竅不通，但對如斯先進科技，仍然是一知半解，消化不了
「係嗰度啦。」鷹指著遠處海岸上的破爛建築物說：「如果資料無錯，嗰幢溶溶爛爛嘅建築物就係啦。」
眾人眺望過去，在海岸上的只是一幢不起眼，而且破爛不堪的建築物，圍繞著它的也只有一些生鏽破損的貨櫃和貨櫃吊機。
「唔講真係唔知嗰度就係黃金力量基地．．．」流主說
「你有所不知啦，其實．．．」就在阿寶解說時，海上突然翻起一個巨浪！！