異塵餘生香港2277: 37 Queen of The Bitches
為了拆除流主頸項上的狗帶炸彈，流主他們三人和狗肉冒著隨時被殺的風險，來到了Bitch Kingdom的大本營。但是出乎意料之外，BK的守衛竟然沒有留難他們，更為他們引見BK的領袖。
流主他們跟著BK守衛，來到一所宏偉的醫院前。它整個外牆都被塗上了可愛的粉紅色，更寫著巨大的「Bitch Kingdom」字樣。而醫院門外則放置了一張大石椅，還有不少雄糾糾、氣滔滔、坦蕩蕩的男性雕像．．．
這時候，一個豐姿冶麗、眼神高傲嫵媚、擁有一副讓人看著便不禁面紅耳熱的身軀的中年女人，在兩個裝束完全一樣的近身護衛和數個幾乎赤裸的壯健男丁陪同下，拋眉送眼地從醫院步出來，並優雅地坐在石椅上。
BK守衛悄悄說：「佢就係我地嘅女皇，Queen of The Bitches。我勸你地小心啲講嘢。」
女皇安坐後便放聲問：「一個年輕嘅男人，咁夜嚟到我嘅Bitch Kingdom，一定係有好貴重嘅事。」
流主聞言頓時眉頭皺起，然後女皇身旁其中一個近身護衛在女皇耳邊悄悄說：「．．．係重要嘅事呀女皇。」
女皇想了一想說：「是但啦，點都好啦。」
流主見對方溫文有禮，也不期然客氣起來：「咁夜嚟到打擾大家休息，我深感抱歉。其實我山長水遠嚟到，只係希望女士妳可以幫我解除我頸上嘅炸彈。」
女皇問：「拆炸彈，點解要嚟依度拆？」
流主俯首說：「因為個炸彈，係女士妳嘅手下裝嘅．．．」
女皇點一點頭，想了一下說：「．．．原來係咁。．．．咁我啲手下呢？」
流主此刻才感不妙，他絕對不可能告訴女皇她的手下已經死在自己的槍下．．．但若非她的手下以死，又怎樣解釋自己能活著來到這裡？
女皇嚇眉唬眼說：「我同你講緊嘢，答我啦。」
流主一時間未能想到藉口：「．．．佢地．．．死左．．．．．．」
女皇聞言，眼神立刻變得更加兇惡：「點死？」
常言說，人的說話愈簡單，表示他愈憤怒，流主此刻深深地體會到。他嘴巴微微發抖說：「．．．佢地．．．．．．．．．係撞車死嘅．．．」人急懸樑，苦無藉口的流主只有蠻幹
鎖匙萱緊張得雙眼睜大，壓著聲音說：「你傻傻嘅咩！！講大話都講個好啲架啦！」
孖根小聲說：「睇嚟硬碰係在所難免．．．」說著，她已經摸著自己的槍袋
女皇想了一下，嘆道：「．．．咁真係可惜．．．姊妹們，所以我成日話開車要小心啲，唔好比啲男人睇死我地嘅駕駛技術．．．妳地真係要引以為榮呀．．．」
流主聞言頓時眉頭皺起，然後女皇身旁其中一個近身護衛在女皇耳邊悄悄說：「．．．係引以為戒呀女皇。」
女皇想了一想說：「是但啦，點都好啦。」
流主不禁鬆了一口氣，竊笑說：「咁都過到骨．．．」
孖根汗顏說：「我未見過有人好似你咁好彩．．．」
女皇揚手示意說：「咁你過嚟，我幫你拆左佢。」
流主慢慢走過數級階級，來到女皇面前。豈料女皇突然拿出一支金屬棒，猛力揮向流主頸上的狗帶炸彈！！雖然威力不大，但流主卻嚇得跌在地上，面色頓變死灰！！
然而，炸彈竟然真的鬆脫下來了．．．
「點解嘅．．．」流主滿臉疑惑
「哈哈哈哈．．．」女皇突然大笑起來：「所以我話我地Bitch Kingdom係真係好叻，一個大話，就呃到個後生仔山長水遠，冒住生命危險嚟到依度自投羅網！」
「大．．．大話！？」流主雙眼睜大，他不敢相信女皇的說話
「條狗帶只係一個探測器，當佢同控制器距離過遠，就會發出響聲，用嚟防止奴隸逃走．．．哈哈哈哈．．．如果你對爆炸品熟絡啲嘅話，可能就唔會中計．．．哈哈．．．」女皇放聲嘲笑著
流主聞言頓時眉頭皺起，然後女皇身旁其中一個近身護衛在女皇耳邊悄悄說：「．．．係熟識呀女皇。」
女皇想了一想說：「是但啦，點都好啦。」
「竟然係咁．．．．．．」流主大為震驚，他不惜一切，闖入戰區，甚至犧牲了便利先生，原來就是為了一個謊話．．．
孖根插話說：「妳話比我地知依件事，妳唔怕我地會傳開去咩？」
女皇咧嘴奸笑說：「哈哈哈，唔怕，我又無話過比妳地走。」
流主知道大事不妙，立即打算拔槍挾持女皇。可是，在場的BK早已紛紛舉槍指著他們！！兩個近身護衛更把流主按在地上！
女皇一腳踏著流主的臉說：「你以為你嘅大話呃到我咩？你以為你殺左我嘅人我會放過你咩？你以為就憑你地三個人就可以對付到我地Bitch Kingdom咩？？哈哈哈哈！！你真係好傻好天真囉！」
流主既悲傷又憤怒地瞪著女皇：「我．．．一定會比顏色妳睇！！」
「哈哈哈哈！我好驚呀！．．．我聽朝就用你嚟做早餐，你又奈得我咩何！」女皇一副真的想把流主吃下肚子的表情說著，然後便對著兩個近身護衛說：「聽朝我瞓醒，我要見到佢沖乾淨晒涼，赤裸咁喺我房等我！」
「係！女皇。」兩個近身護衛點一點頭，便指示其他BK把流主押走．．．
然後，女皇看著孖根和鎖匙萱說：「之後到妳兩個啦。」
孖根說：「要殺就快，妳依一秒唔殺我，下一秒死嘅可能就係妳。」
女皇卻微笑起來：「啊係咩？咁妳唔開槍？．．．係咪因為個後生仔喺我手上呀？痴孖根。」
孖根說：「既然妳認得我，妳應該知道妳宜家嘅處境好危險。」
「唔夠佢危險。」女皇說著，數個BK便立即把鎖匙萱挾持著
「．．．妳到底想點？」孖根瞪著女皇
女皇慢慢走近孖根：「妳嘅事跡，我細細個就聽過。正常嚟講，我地Bitch Kingdom係只接待人類。但係如果係妳嘅話，我絕對可以破例一次。當然，妳身邊依位小妹妹，都可以加入我地。」
孖根聞言頓時眉頭皺起，然後女皇身旁其中一個近身護衛在女皇耳邊悄悄說：「．．．係接納呀女皇。」
女皇想了一想說：「是但啦，點都好啦。」
孖根說：「我從來都唔會加入任何組織。」
女皇拉下孖根的披風說：「痴孖根，妳睇下妳自己個樣啦．．．．．．妳幾耐無做過愛啦？十年？二十年？定二百年呀？哈哈哈哈！！」
孖根說：「唔係個個都好似妳咁淫蕩嘅。」
女皇說：「哼，唔好自欺欺人啦。妳諗諗．．．只要妳加入我地，我即刻就比妳喺我啲性奴入面隨意挑選一個，專係用嚟服侍妳，妳想幾時做都得！」
孖根笑說：「聽落唔錯，咁我就要頭先比妳帶走嗰個。」
女皇惱羞成怒，立即拔出金屬棒，孖根當然也隨即拔槍！正常來說，孖根拔槍的速度快得可以媲美子彈，女皇絕對快不過她。可是，這次卻發生了意料之外的事，女皇的兩個近身護衛竟然比孖根更快，一個按住她的手，另一個則拔出手槍指著孖根！！
「痴孖根，妳有雙槍，我身邊都一樣有。」女皇笑說著，便狠狠地用金屬棒打向孖根的臉頰！
「咳．．．」孖根被打得跪在地上吐血
「哈哈哈，我最鍾意食屍鬼一樣嘢，就係只要有輻射，傷勢就會自動復原，我可以日日都打磨妳嚟解悶啦！」女皇笑說
孖根聞言頓時眉頭皺起，然後女皇身旁其中一個近身護衛在女皇耳邊悄悄說：「．．．係折磨呀女皇。」
女皇想了一想說：「是但啦，點都好啦。帶佢兩個入監倉！聽日再玩過！」
無從反抗的孖根和鎖匙萱就這樣被帶到一間小屋．．．BK們把她倆的武器和鎖匙萱的開鎖器沒收，並用一條牢牢扣在地上的鐵鍊鎖住她們的頸項。
鎖匙萱無奈地說：「唉．．．今次真係蠢蠢啦．．．竟然自投羅網．．．我點解會讚成主主話嚟依度嘅決定架．．．」
「定啲喎，流主會諗辦法架啦。」孖根說
「佢都自身難保啦．．．唉．．．」鎖匙萱垂頭喪氣說