和女神MSN

4年前, o個時好開心, 我當時應該都係兵長黎, 
女神有時會問我一唔一齊食lunch, 而我都可以接佢番工, 
仲記得有次好大風+落雨,佢捉住我手臂一齊行, 
我個心跳得好快, 感覺好幸福, 
自此之後, 佢時不時都會捉下我隻手, 挨一挨下我咁 
依家諗番, o個時係我呢世仔最開心o既時間, 
雖然…..雖然o個時佢係有男友…… 

佢住新界一個幾偏僻o既地方, 所以佢男朋友(一齊左7年)從來無接過佢番工, 
某一次聽到佢覺得有人接番工係一件幸福事, 我第二日就拿拿臨去接佢 




佢好開心, 話我好傻, 多謝我咩都會為佢做, 
係呀, 我心甘命抵見到你笑就得喇

講番少少background, 
我同女神4年前係一間audit firm 內遇上, 
佢男友係Big 4友, 而我地就只係一間中型班o既local firm, 
佢好尊敬佢男友, 覺得佢好勁好醒目, 
佢地係美國一齊讀U o既, o係o個邊一齊住左幾年, 
番來香港就各自住屋企, 都係做audit. 





我初初識佢時無咩特別感覺, 
靚女一個囉, 而本人不嬲同靚女都係絕緣o既,所以無咩特別留意, 
如是者就過左兩,三個月大圍食飯會同檯不過零交流, 
有一日, 我要做一個job 上年o係佢做ge, 咁就同佢交換左MSN收下file 同問下野咁 
同佢就係o個時開始會傾下計

有一日我地都o係office OT, 
做到累累地佢無啦啦MSN 我話一唔一齊去飲杯咖啡refresh 下, 
我無咩"狗衝"o既感覺, 只係有少少嚇親, 
因為呢樣野對我黎講好新奇, 同個靚女同事一齊去"refresh"下wor~ 





就係咁, 開始左第一次同佢o既"約會", 
人生第一次去Pacific Coffee 飲野, 
亦係人生第一次買左杯Latte俾個女仔, 
我諗呢d 係應有o既風度掛, 我成日幻想有女, 所以拍拖點哄女、要點大方呢d 野我好有信心 
奇就奇在佢覺得好出奇, 原來佢BF 同佢食飯飲野都係aa制ge 
坐低左無耐佢有講下對我o既感覺, 話我個人成日黑埋塊面, 做野好認真, 
我o個刻有d 飄飄然 (雖然唔係讚, 不過at least 佢有留意我) 
我放好糖之後飲第一啖, 大啖得滯又熱得滯, 咳左一下, 
d 咖啡倒左少少落個身度, 
佢笑起上黎, 話我好蠢, 
望住佢o既笑容, 我個心好暖, 係呀, 我係傻架

o個次之後, 
我地每一個星期都至少有一次一齊落pacific 飲野, 




而我地次次都係一人一杯Latte, 
有一日, 我MSN status 寫左: " 想用一杯Latte 把你灌醉" 
佢笑我咁小氣, 酒都唔買, 一杯Latte 就想灌醉人, 
我解釋番係歌詞黎ge, 唔知佢o個時feel 唔feel到呢? 

做左無耐, 過probation 加左人工, 
我話想請佢食飯多謝佢之前幫過我, 
佢o個晚男友家要做節食飯, 唔得, 
我就提議去happy hour 飲少少啦, 
佢帶左我去一個佢想試好耐o既地方, 
就係IFC 2 個平台, 
對住維港景色, 一張舒適o既沙發, 
開左支cheap cheap 地o既紅酒, 
我地傾下呢樣傾下o個樣, 
日落黃昏加埋美女在旁, 




其實唔使飲都醉啦 
話題去到佢男友身上, 
佢話佢男友好似有左第二個, d sms 好可疑, 
仲要已經唔係第一次 
我就9唔搭8安慰下佢然後送佢搭船過對面海, 
佢走o既時候, 我望住佢o既背影, 
發覺自己愛上左呢個人

之後時間一直過, 
我由間中同佢飲杯野到變左間中接佢番工, 
我話順便adjust 下自己作息時間, 早睡早起身體好, 
我諗佢知道我鐘意佢ge, 不過大家都無道破, 
甚至中間其實佢同佢男友分手左兩個星期, 
我都唔夠膽表白..... 因為我好驚同左佢一齊佢會發現我o既缺點, 
驚萬一有咩事分手連朋友都無得做, 不過其實我應該驚o既係佢會唔會同我一齊.... 




一陣連手都未拖過就斷絕來往我會好傷心 
好似現狀咁撘車時會挨下我膊頭就夠喇, 
我有幾多料自己知, 無謂勉強 
講多少少, 佢男友係有第二個, 同左第二個一齊兩星期就散左番黎搵我女神, 
我有話過不如唔好理個衰人啦, 不過佢地都係一齊番, 
咁人地咁多年感情, 我理解ge....

到12月, 
佢條team 個阿head 結婚請飲, 無請我因為我係另一team o既 
我自己o個邊就有親戚由大陸落黎香港所以食飯, 
交待咁多野其實都係想話我地o個晚都飲左酒, 
到10點零鐘, 
女神打俾我, 
係星期日晚上10點幾打俾我! 我對眼當時應該發左光  
我地兩個都wing wing 地咁, 佢就講下頭先婚宴上各人o既好笑野, 




一路笑一路各自番屋企, 
我番到先, o係屋企樓下等埋佢到先收線啦, 
(我思想上真係拍拖專家黎喇) 

突然間, 

 : 你....係咪鐘意我呀? 
 :........... 係!我....... 鐘意你. 
 : 你想追我? 
 : 係!我想同你一齊 

唔好派 , o個時wing wing 地講野係咁上下 

 : 我有咩好呀? 你做咩鐘意我呀? 
 : 我都唔知, 但係你俾我一種好特別好特別o既感覺, 我好想同你一齊 
 : 我唔好架, 你唔好鐘意我啦.... 
 : 我諗唔得喇, 我真係好鐘意你, 我.....我會好好對你架 
 : 我有男朋友架, 你做咩仲鐘意我, 我係唔會同你一齊架 
 :................. 
 : 乖啦, 聽我話唔好再鐘意我啦 
 : 嗯....咁.....我到喇, 早d 瞓啦, 聽日見

第二日, 佢MSN 個Status 係 "Speechless" 
睇到o既時侯, 個心有d 難過, 但係又有少少沾沾自喜o既感覺, 
我諗如果閣下都係一個毒撚o既話應該會明呢種帶有少少SM o既感覺.... 
女神個MSN status 係為你而寫wor, 你幾撚有地位先得架  

不過到左下晝... 

 : 喂喂, sorry r, 尋晚wing wing 地, 唔好意思... 
 : 唔緊要, 都好多謝你俾左個機會我講左出黎... 
 : 對唔住, 我唔應該咁問... 
 : 算啦, 過左去喇, 係依家搞成咁有d 難過je.... 
 : 下.... 你唔再理我喇? 
 : 唔係... 我點敢唔理你丫..... 
 : 我見你成朝都唔同我講野, 以為你嬲左我.... 
 : 我見你個status 寫speechless... 咪唔打擾你囉.... 
 : 啊唔係呀.... 係阿K( 佢男友) 尋晚嘈我話我飲到醉晒之嘛~ 
 : 啊原來係咁, 太好喇, 仲以為你嬲左我添~ 
 : 傻ge, 就算係都唔會寫係度啦, 俾佢審死我都似 
 : 咁又係, 我真係諗多左  

嗯.... 其實我係連俾佢嬲o既資格都無

都係一件發生係12月o既事, 
咁我同女神慢慢開始左夜晚會講下電話先瞓, 
我都唔係好明當時究竟咩關係, 
佢一定唔會係貪我有咩好處, 
我都高ge, 不過又瘦又頹o個d 款,  
佢男友就有錢仔+ 白白淨唔算高不過都有d 肌肉o個類,  
我拼埋去真係輸到尾燈都見唔倒 

不過咁樣o既我, 都有幸得到女神青睞, 傾下電話接送番工放工都好滿足, 

有一個星期六o既夜晚, 我地傾下傾下佢話阿K 聽日唔得閒, 
咁我提議去佢屋企o個邊搵佢周圍行下, 
女神say 左yes ! 開開心心早d 瞓聽日去搵佢~  

第二日一早我去買左札花, 俾個surprise 佢~  
係一扎粉紫色o既玫瑰花, 都幾靚咁啦, 
但架地鐵差唔多到佢屋企時, 
佢打黎話阿K 又得閒, 
要女神依家上佢屋企.... 
我話我都差唔多到喇, 一齊出去囉  
去到站, 
我放低左扎花o係一張櫈上, 過番對面月台得佢, 
算喇....又何苦咁on 9 呢 

同佢一齊出去, 都有講過下唔好意思之類o既野, 
我係失望, 但又點能夠怪佢呢... 
我無提到扎花, 反正換黎o既都只係多一句唔好意思, 
不提也罷 

o個日送佢送到佢男友屋企樓下, 
目送佢入大廈, 
呢個我最想抱住o既人... 我親自送佢黎到另一個人o既懷抱... 
o個刻個心好苦, 咬住唇轉身離去

時間來到2008年1月5日 (星期六), 
一個我永遠記得o既日子  

那天同事們約好了在小欖燒野食, 
我當然唔會錯過呢個可以陪足女神一日o既機會 
同事約左係5,6點左右去到小欖, 
我就12點零已經去左接女神, 
大家無無聊聊o係商場行左陣, 
之後去一間bar 仔度一人一杯Long Island Iced Tea 
同女神難得一個寫意o既星期六下午 

個商場真係無咩好行, 
我地見有時間就去睇套戲先, 
無咩戲啱就是是但去左睇驚天奪寶, 

入到戲院 , 除左件外套俾佢'褸"住, 
隻手就放係自己大脾上, 手心向上, 
呢下其實係等梗女神握住我隻手(信我, work 架) 
就算唔得, 都唔會有咩突兀o既感覺, 
果然一陣之後佢真係放左隻手過黎, 
盈盈一握, 說不出的喜悅 

好溫柔咁握下握下佢隻手, 
佢就成個人挨左過黎, (個冷氣真係有d 超現實) 
而小弟一個不為人知o既優點係全身不停發熱, 
可以俾到d 溫暖佢

呢套戲我真係零記憶, 
有點對不起尼古拉斯基治 

但我記得總統山一幕, 因為.... 

女神挨左落我度之後, 
我o既所有理性基本上已經唔存在喇  

輕輕挨番落佢個頭度....無反抗, 
轉少少索下佢d 頭髮.... 無反抗, 
側側地面鍚落佢頭度....無反抗, 

黎喇黎喇, 去到總統山喇, 
我再一次輕輕力用個嘴"high" 下佢個頭時, 
佢轉左個頭上黎, 四目交投, 
然後佢閉上眼, 送上一吻  

唔知o個日有無人咁啱都係o個間戲院, 
會見到有兩個人去到套戲高潮時, 錫足3,4個字 

恕我粗鄙都要寫一句: 女神條脷好香滑

出番戲院, 
大家都有d 唔好意思, 
佢應該都開心掛, 我本人就開心到顛左  
佢有少少撒嬌, 話我專登搞到佢忍唔住錫左我, 
是但啦, 咩都好啦, 錫左喇~~~~ 

去到小欖, 我地兩個遲左成個鐘... 
同事o既目光有少少不懷好意, 
佢地都有人私下傳過我地兩個可能有野, 
不過女神個男友比我好, 所以佢地都覺得無咩可能掛 

我地分左兩個爐坐, 印象中好似係男o既一個爐女o既一個爐, 
我地間中有互望下, sweet 
最正係其中有一段時間, 我地兩個行開左去沙灘o個邊, 
摟住佢坐低傾下計吹下海風 
同事點講唔理佢喇~

o係一月o既時候, 發生左另一件事, 
可能係最後女神始終都唔接受我o既原因, 
係呢個一生中的遺憾埋下o既一條伏線.  

W小姐, 係公司裡面o既一個靚女, 
身材較高, 長頭髮, 個人好溫柔o個種, 
佢o係公司有一堆狗公, 個個搖頭擺尾面而佢本人都似乎樂在其中, 
佢今年嫁左俾個金舖老細, 我都有去佢婚禮, 
而佢仲無啦啦叫我唔好為佢嫁人而唔開心  

呢位公司公認o既靚女, 就坐我對面, 
間唔中有一句無一句都會傾下計, 
咁佢實在又唔係我杯茶, 都無咩上心 

有一次, 佢知道我係CityU 畢業, 又唔會用library, 
就叫我幫佢申請一張library 卡等佢可以用自修室, 
我咁啱就要飛上海幾個禮拜, 
咁就飛之前幫佢整埋先啦, 
我係星期日夜機, o個日就約左W小姐o係又一城食過晏俾埋張卡佢, 
食完飯後我咁啱要買袖口鈕, 就一齊去左agnes. b. 度買... 
W幫我選ge, 都幾靚 

點知一出黎, 撞到女神 
女神望左我一望, 同我地兩個hi bye 就話唔阻我地走人先, 
我個心涼左半截

之後打番俾女神, 原來佢o個日咁啱去Esprit 整頭, 
 : 喂喂, 我同佢無野架.... 
 : 幾好丫, 飛之前都要見一見先 
 : 佢要考試, 叫我借張卡俾佢入自修室jar.... 
 : 幾好丫, 食下飯行下街, 唔錯r 
 : 我咁啱要買野, 咁City 個入口又係agnes b o個層, 所以佢黎幫下眼je.... 
 : 其實你唔使同我交待d 咩丫, 唔需要解釋wor 
 : 我驚你誤會嘛... 
 : 你o係邊, 我過黎搵你丫... 
 : 唔使喇, 我坐車去K 度 

最後都o係的士站見左一面... 我拖佢... 佢唔理我... 
我都唔知點算好喇....

我在上海o個幾個星期的時間, 
頭o個幾日有哄下佢, 
之後我地兩個都keep 住MSN contact, 
只係佢pass左個msg 我, 
就係佢好想趁呢段見唔倒對方o既時間冷靜一下, 
讓呢段一早就唔應該出現o既感情慢慢冷掉 
這個月o既MSN, 我地o既身份係一對好朋友, 
我講野一過左分寸佢就會ignore 我一陣, 
冷卻一下我. 

感情係雙方ge, 我單方面再想都無用, 唯有尊重佢, 當留番個好印象俾佢.  

一個月後, 我一落機就打左個電話俾佢, 
喧寒問暖幾句就收左線, 心諗...都好o既.... 
但係佢幾分鐘之後send 左個sms 俾我, 
"好奇怪, 一個月無聽過你把聲, 但係頭先你打俾我, 我發覺原來我好掛住你....." 

收到! 拿拿臨放低行李去搵佢食飯, 以慰相思之苦

時間去到當年o既2月14…… 
我唔係好記得由我上海番來到2月14日有幾多時間, 大慨2個星期掛~ 
呢段時間裡面我地根本同拍拖無分別, 
一齊番工, 一齊食飯, 攬攬錫錫, 
晚晚都講完電話先瞓, 有時仲成3,4點先收線, 
成日都要我傾傾下落番床去差住電黎講 
仲試過一次佢帶埋我同佢d 老死食飯, 
係佢中學d 老死黎ge, 
我唔記得女神點解釋, 總之呢班老死有d 都未見過佢男友, 
但係見左我先~ 

當晚走時佢個best friend N 小姐同我講左句: "我唔知你點諗, 但係你唔好玩佢wor" 
難道佢暗示梗女神大人都有d 動搖?

上篇扯遠左tim, 我係要寫2月14o既 

2月14...情人節嘛, 
我呢d唔見得光o既都無可能約到女神同度良宵, 
但係lunch 始終係我同佢ge ~ 
我地去左一間o係上環九如坊o既餐廳度食飯, 
間餐廳幾好feel, 唔知執左未, 
嗯... 我都無咩刻意整d 咩浪漫野... 個人無咩心機, 
個心唔知點解覺得... 
眼前呢個人,啱啱同我錫完, 但係今晚又會投入另一人o既懷抱.. 
心裡面很不是味兒, 甚至有點厭惡  

番到公司, 佢男友courier 左扎花黎, 
女神個樣唔多nike, MSN同我講佢男友根本只係做出黎俾人睇, 
即係好似插支旗warn 下人女神有男朋友. 
啱ge, 俾我都會啦 

o個晚送佢上船去男友家, 有點生離死別般o既悲涼, 
情人節就係咁, 開心o既人多左個理由開心, 傷心o既人就多左個理由傷心 
佢走左無耐send 左個sms 俾我, 
"對不起, 我也想給你我的溫柔, 只是現在還不容許我這樣做吧..." 
愁上愁, btw, 真係越來越不能自拔了

打多一篇瞓喇, 寫d 開心野先 

3-6月期間係我地o既"熱戀期", 
我地成日都一齊, 我會無啦啦夜晚貢入去佢o個邊, 
企響佢屋企對住o個條橋度同佢揮手, 
(之後佢講過自此之後佢望親出去,見到橋上有人都會想起我) 
佢會帶埋兩隻狗仔落黎同我散下步, 
俾我攬下佢, 鍚下佢, 
如果係放工送佢o既話我地會o係佢屋企門口纏綿一番, 
次次都唔捨得走. 

有一次星期六同佢行又一城log-on, 
我星期日自己再番去買晒佢當日所有拎過上手o既野, 
星期一特登8點零就番左公司收埋o係佢個位度, 
佢番黎之後 -->  
唔係好貴, 1千蚊度, 不過佢好appreciate 我o既心思, 
真係所有拎過上手o既(好似係7樣野, 另外買左份俾狗仔)都買晒  

另一次, courier 左扎花俾佢, 
係佢最鐘意o既花同色, 我無署名, 不過佢一收到時望我o個眼... 
真係想睇多一次, 
最重要o既係我預左佢可能唔會拎走, 
但係o個晚佢拎左番屋企, 仲要同佢媽咪講: 唔準話俾K知, 唔係就唔俾家用 
我....好似見到d 曙光

去到6月左右, 上了一課"貪字得個貧" 

o個排K 先生去深圳公幹, 
我有一晚約左女神去愉景灣食飯, 
o個日好似係星期五晚, 
總之係放工去然後第二日唔使番工o個隻, 
大家知晚上o既愉景灣真係好鬼浪漫, 
避世拍拖真係一流, 
就算撞到熟人都未必死硬, 因為好大可能對方都係同你做梗一野o既野,  
[真人真事] 撞到個溝梗我女上司o既男人, 點知同梗第二條女一齊  

晚餐都係例牌d 扒呀沙律呀加支紅酒, 
餐廳柔和o既燈光襯托住女神微微泛起紅暈o既臉頰, 
每當想起呢個情景我都諗起黎明首"今生不再" 
後來o係上海重現呢一幕, 同一隻歌都o係我腦海纏繞左幾天 

餐廳等埋迪士尼個煙花後, 
我地o係沙灘旁o個條路到漫步, 
月色下相擁沙灘上, 
風聲海浪聲以外, 
世界就只剩下我倆

嗯... 酒精影響? 環境氣氛? 定係因為K 唔o係香港? 
o個晚我地o係沙灘上擁吻, 
女神俾我o既感覺有d 唔同, 
平時會攬會車, 不過都係好正常咁... 唔識點講.... 
o個晚佢會擺動身體, 同我有多d摩擦, 
會追住黎錫, 會多d "嗯..呀..." o既聲... 

最後, 佢望住我: "你今晚想做咩都得架" 
我頂... 

去到佢屋企, 
佢媽咪瞓左, 家姐唔o係屋企, 
黎喇, 呢一步就好似係劇本中寫好左要注定發生咁... 
(同埋小弟已經3年無做過  ) 

我唔想寫同女神o既甜故 , 唔好意思, 
最多下次寫番同女神同名o個個人俾大家睇  

反正.... 到第二日, 佢彈左句" 原來你最終目的都係想攪我", 要我走.... 
嗯... 唔攪都攪左... 我又可以講d 咩呢.... 
不過後尾知道, 原來女神有d 驚我會唔會同K 一樣, 
都係周圍滾人上床o既人..... 
我唔係, 但係俾左一個咁o既印象佢, 或多或少可能都因為W 小姐o個單野

還有1件事情, 加速了最後時刻的來臨…. 

7月頭左右啦 
老細約晒成班人去佢屋企燒野食, 
約左5點左右, 早一批o既就3點入左去踩單車先, 
自從上次愉景灣之後女神同我疏離左少少, 
我知係自己衰, 咁呢d 野希望又哄下又等下佢幾時睬番我啦... 

o個日都俾我去接佢, 不過兩個人一齊慣左有d 惰性, 
最後就me me more more 遲左成粒鐘先到, 
d 同事都好似慣左我地成日一齊, 都係笑笑口就無咩野, 
女神都慣左  
只係, 今次原來仲有一個人都有留意呢樣野 ---- 老細 

老細o個晚無咩野, 係介紹自己隻狗時嚇左我一下... 
原來女神屋企隻狗係佢o個隻生ge… 
個心有d 嚇窒左...究竟咩事... 
個晚整體黎講都幾開心, 正正常常公司gathering 啦 

之後o個個星期, 有一日個junior partner叫我入房(佢人幾nice ge) 
 你知唔知女神係邊個? 
 唔係好明你講咩wor... 
 佢係X生個親戚 (X生係我地公司一個掛名o既consultant, 以前係一間幾大o既上市公司o既集團主席) 
 啊....係呀... 
 佢同老細講話你騷擾佢外甥女, 佢話o個日bbq你攬住女神條腰 
 我無呀... (堅無) 
 呢d 口同鼻嗌, 我信唔信你都無用, 一早叫左你唔好圍內搵食啦, 要玩玩遠d 嘛 
(個junior partner 其實好人黎, 好睇我) 
 我明..... 
 女神走喇, 去老細另外個friend 度做 
 啊... 都好o既 (都唔知講咩好) 
 你自己執生啦, 老細同女神屋企人好熟gar ..... 
 呀係呀, 你呢個月借去另一間office 番工, 番黎大家再傾下啦 

原來... 女神o係公司係咁有地位.... 我真係on 9 
呢個故事就去到呢度了, 仲有一篇2011年上海重遇ge 後記, 遲d post 

8月12日, 女神last day 
8月30日, 我o既last day 

像有了默契一般, 之後都無再聯絡了 

遺憾才會令你珍惜得徹底