誰能逼我將就: Ch.101

三千萬…可能是一個我們一家四口窮四輩子才可以賺到的數目，現在只要阿爸將真相說出來，他便可以擁有這筆錢。

子俊叔叔合上了嘴巴，慢條斯理的拿起桌子上的水杯，呷了一口開水。

我可以說他做錯嘛？最後我發現不能。他的確是大哥的生父，同時他沒有強逼我們去做什麼。

子俊叔叔是一個有歷練的人，他知道每個人的陰暗面是什麼，也知道世界上最吸引的東西是什麼。在巨大的利益之前，有很多事其實可以退很多步的。

阿爸疼錫大哥這個問題，我們都沒有否認；不過在三千萬面前，這份沒有血脈的疼錫，可以撐得住多久？





或許有人會覺得子俊叔叔很狡猾，用上三千萬來試一段三十多年的親情；如果處理得不恰當的話，所有的回憶隨時會灰飛煙滅。

「純仔，你係咪覺得子俊叔心地好差…用咁多錢去做一啲令你地難受嘅事…咳咳。」子俊叔叔問我。

「我冇咁諗，我只係覺得，阿爸會逼得好辛苦。」我坦然，因為我很疼惜這個父親。

「如果從來冇諗過接受我呢三千萬，韋信又點會覺得兩邊都有壓力呢？我已經將一千萬傳到去佢戶口，仲俾咗十日嘅限期俾佢。

會唔會係因為佢想接受，所以先覺得為難？」子俊叔叔提出這個說法，我完全沒有否認的空間。





我開始猜想，阿爸很想要下這三千萬；不過良心責備之下，他不敢將自己跟大哥的關係親手打破。阿爸最後一走了之，我不能猜疑他另有所圖，但他走了是一個事實。

「我可以有好多方法去得到我想要嘅，但最後我仍然將主動權交到你地手；我想用錢，去買返一個屬於你地同哲堯嘅回憶。」子俊叔叔續說

我沒有再說下去，因為事情已經清楚得很。一個動輒可以拿得出幾千萬的人，正準備來我們家，取回屬於他的東西。

「我明白喇，子俊叔叔。」

「純仔，你會唔會好討厭我？」





我看著子俊叔叔，半響也答不出話來。

「我三十幾年前要你老豆將就我，不問條件咁養到哲堯咁大；到咗今日我又話點就要點，一啲都冇諗過你地感受。

不過對唔住，因為我…就嚟死，所以…冇人夠我嘅心願重要。」

我不懂得接下去，只是發條式地一直點頭…

「我走先喇子俊叔叔，你保重。」

我用最快的速度跑回家，將子俊叔叔跟我的對話轉告阿媽。

「純，咁我地宜家報唔報警好？」

「如果阿爸真係拎咗子俊叔叔成千萬，我地仲報警嚟做咩？」





「你覺得你阿爸考慮收呢筆錢，再親口同你大哥講個真相？」

「三千萬呀阿媽，我真係分唔到，到底邊個啱邊個錯…」

阿媽走到自己的房間，像在找什麼出來似的。未幾，她拿著一張銀行提款卡到我面前。

「呢張係你阿爸銀行卡，佢一向要錢先拎出街，佢根本就冇諗過要拎啲錢。」

「阿媽…我唔係懷疑阿爸，不過阿爸會唔會一早已經拎咗啲錢出嚟，然後再放返張卡落妳度？」我竭力地找出誰對誰錯這個真相，我不希望阿爸因為錢而改變任何東西。

「我地落街睇下。」

我跟阿媽為免被其他人看見巨款，挑了一個沒有人的提款機去查帳。阿媽放入銀行卡，嫻熟地鍵入密碼，然後是查詢帳戶。





「阿媽，我好緊張…」

「唔好嘈啦衰仔。」

五秒之後，螢幕上顯示出一個令我吃驚的數字。子俊叔叔所說的一千萬，完好無缺的存放在阿爸銀行戶口中。

「你阿爸連成千萬都冇拎走，我講咗就算幾多錢佢都唔會放棄你大哥啦。」