誰能逼我將就: Ch.71

「點解會咁？」我拿著這殘缺的信件，完全摸不清頭腦。外公說當年是娓媽對不起這位子俊叔，為什麼這信件中，會是他跟媽說對不起？

當我想再翻弄一下有沒有其他信件時，我聽到大門有開鎖的聲音。

「大獲！」不能被爸媽看見我，更不能讓他們看見偷看這信，我立即狼狽的跑回自己房間。

我躲在自己的房門後，然後慢慢聽到腳步聲。這種又大又急的走路節奏，不用看也知道是阿爸。

「唉，唔記得執返啲嘢就走咗出去。」阿爸邊自言自語，先發出收拾東西的聲音，然後是一輪來回走遍家裡大廳的聲音。





然後，是阿爸的電話又響起。

「喂，點呀點呀？得喇就出嚟喇，你地食住先啦，我屯門出碼頭出到嚟新蒲崗都要個幾鐘啦，你地唔使等我喇。」

阿爸把電話掛線之後幾分鐘，又再次離家外出了。我繼續留在自己的房間內差不多五分鐘，直到肯定他完全離去我才現身。

我立即跑回爸媽的房間，果然所有的東西都給阿爸清理掉了。我手上仍拿著那一角殘缺信件，心裡很矛盾，事情好像弄得愈來愈複雜，到時底我還要不要追查下去？

但那一晚阿媽的反應仍然是歷歷在目，我就站在當晚賞我耳光的同一位置上，思考著這個，可能影響我們一家人的問題。





「都係同大哥商量下先。」

不過，不是每一個人的想法也一樣，我把信件的事跟大哥說一遍，再將自己的想法向他拿取意見，但得來的反應是：

「唔好再搞喇純，上次阿媽激到咁，你仲想喺呢件事上面搞幾耐呀？」

「唔係呀大哥，你真係唔想知當年發生咩事？」

「你問我想唔想知，我想。但如果要去到咁大件事，搞到全家人都有唔開心，件事知定唔知都冇所謂。不如我地諗下，點同阿爸講唔好成日唔理阿媽仲好啦。」





「我嗰日聽到佢電話同人講，去新蒲崗等。」

「新蒲崗？冇聽過佢有朋友喺呢區喎。」

「我都唔知。」

「總之你唔好再搞落去啦，我開工喇，再傾。」

「拜拜大哥。」

大哥的態度令我有點遲疑，將這事暫且放下。過幾天便要到大陸作球隊的集訓，所以我特意在集訓之前，陪墨到澳門先見見她的家人。

墨是一個看似容易看透的人，就好像今天我們要到澳門，她便會一大早的起來，先弄好早餐，再把自己的打扮得漂漂亮亮，去迎接她心目中覺得快樂的事。

我們拖著手走到信德碼頭，愈近澳門，墨的心情便愈好，就像個小朋友一樣在跑跑唱唱。簡單的一途船程之後，我們便到達了澳門。





墨嫻熟的帶我坐計程車，沿途她還不忘跟我介紹這介紹那。原來大家的氣氛也不錯，直到墨的臉色開始變臭，我感覺到她的心情有點不爽。

「司機，你行咩路？」墨突然向計程車司機說

「另一邊路塞車呀，行呢邊快好多。」司機鎮定的說，換了是我點點頭便算。

「行第二條路你都要問聲我先呀。」墨惱火的說

「路我熟過妳啦妹妹，信我冇錯。」

「你熟過我係你幻想，但我係客人你要行第二條路就要問我。我見唔到你有聽收音機同問人，我唔知點解你覺得原來條路塞車；仲有呢條路兜遠幾多你知唔知？你點解要白白俾多幾十蚊車費？」

墨一輪的攻勢，把司機壓得透不過氣。





「得啦得啦，一陣收少妳地十蚊啦。」司機的敷衍態度，我知道墨會更加生氣。

「十蚊？你兜呢條路點止多十蚊？你一係就去碼頭同我重新行過，一係就收半價。」

「妳有冇野蠻啲呀小姐？」

「我野蠻定係你搶錢呀？」墨憤怒的說

「算啦，又唔係多錢，咁勞氣做咩？」我在旁勸解，以為這樣會比較好，誰知…

「你宜家幫我定幫佢呀？佢呃我地錢呀！」墨突然向我大聲的說。