誰能逼我將就: Ch.65

「你講咩話？」阿爸臉上的表情又是憤怒又是尷尬，他應該想不到，我會在英琦面前說出這種向他衝撞的說話。

「純，唔可以咁同阿爸講嘢。」阿媽第一時間想走過來，把我和阿爸分隔開。

「阿媽，妳企喺度。」我伸出手，向阿媽作出一個抗拒的手勢。就在這一秒間，我看見她們三個人的焦點，都落在我的身上。我開始覺得，原來我用這個方法會得到成功，起碼不用老是給打壓。

但，「它」又來了…

它：「純，你想點呀？」





我：「我想表達自己，我想同阿爸講，我唔會同英琦一齊，我要嘅係阿墨。」

它：「但係你覺得，頭先自己嘅表現令佢地都對你改觀，你開始推翻以前你內歛嘅價值觀，係唔係？」

我：「咁有咩唔好？我以前咩事都俾人打壓。喺屋企俾阿爸鬧，喺英琦面前要俾佢同佢屋企人奚落。我做錯啲咩呀？點解唔係我去鬧，而每次都係俾人去鬧我？」

它：「錯，因為本來戴哲純嘅性格就係咁。」

我：「咁我點將自己性格改變囉。」





它：「你係因為事業上有成功，覺得唔使再靠面前呢幾個人，你先認為自己咁樣嘅改變性格，但你做錯。」

我：「我冇做錯。」

它：「呢種唔係叫改變，呢種係叫迷失，好自為之。」

「它」消失了，這種對話看似很久，但其實只是動輒幾秒的事。我的視點回到自己的跟前，我伸出手，把阿媽擋在我要說的話前面。

「阿媽，俾我講兩句。」我向阿媽點點頭，示意我會有自己的分寸。





「純，你唔可以頂撞世伯。」英琦一副好言相勸，但我沒有理會她。

「阿爸，其實你知唔知我對住你好辛苦？」阿爸表情陣紅陣綠，我繼續的說：「由細到大我都好聽你話，你講東我唔敢去西。但我已經二十八歲，你都已經退休，個世界唔一定好似你咁樣諗，我每日見嘅人同遇到嘅事，對我嚟講都係好珍貴。

我唔想再每一件事，都要等你批准先去做。如果你講一句唔可以，我個世界就好似乜嘢都係錯咁。

你成日鬧我踢波冇出息，但你記唔記得，細細個係你教我踢波，你教我鐘意做嘅事就要去做，做人唔好將就。

我嘅感情、我嘅事業，我都係用你以前教我嘅一句說話去做，唔將就…係你叫我做男人唔可以一世將就，但點解到大個咗，打擊我打擊得最多嗰個係你？」

我一股氣的把話說完，我以為阿爸會覺得感動，起碼表情上會有改變。但我猜錯，他的臉上只有更憤怒的表情。

「我冇逼你揀，我係教你做人要有始有終，唔好見一個就鐘意一個。」阿爸站起來，面對面的跟我對望。

「我點樣見一個鐘意一個？你問下李英琦，佢自己有咩問題。」





我把英琦逼上台，想她知難而退。可憐已經裝夠，今天我在爸媽面前說一次清清楚楚後，大家便不相往來。

我沒有把她的惡行說出來，是想她有個下台階，希望她可以知難而退。

「你唔使再拎幾年前英琦識過第二個男仔嚟講，既然你呢幾年都冇講，點解你宜家先拎出嚟？」阿爸突然把我說話攔住，我才驚覺原來他也知道這件事，英琦暗中所做的功夫原來一直也不少。

阿爸的論點是我反駁不了的，到底為什麼我能忍上幾年不發作，可能我自己也不太知道。

「幾年前嘅事，我一早已講咗對唔住。就算係上次茶新聞影到你同墨，我都冇打電話問你一句。戴哲純，我一路都係想同你喺返埋一齊，但點解你講到我每一件事都係錯咁？」

英琦梨花帶雨的把黑說成白，我再也忍不到情緒：

「李英琦，妳唔使再扮嘢，茶新聞記者係妳搵返嚟。」