誰能逼我將就: Ch.47

這次的事畢竟太大，大得我認為會影響我跟墨之間的感情，所以我不敢掉以輕心。離開了墨的家後，我在回家途中發了一個訊息給她，大概意思是心情好了點之後就找我。

不過她沒有打電話給我，這一晚我是帶著擔憂入睡的。

第二天，墨發了一條回覆給我。

「對唔住，我處理好所有事，就會打電話俾你，墨。」

我想再回覆自己的感覺給墨，但又覺得身為一個大男人這個做法有點矯情，所以最後還是放棄了。



轉會南華後，操練已經正式開始。轉了間大球會之後的我，整個職業生涯也好像燃點起一盞燈似的。我有自己的貯物櫃，也有自己的贊助球鞋，練球的時候有最好的草地，不用擔心很多本來就不應該由擔心的事情。

「阿純同小春，有時你地中間拎到波，望多啲兩邊。我同艾華好多時都會盡量拉空啲位，等你地中場可以前插。」練習時，陳肇麒經常向我和小春教路。

「哦，知道。」

「純，做咩今日好似好多嘢諗咁？」陳肇麒突然問我。

「哦…冇呀。」我胡亂的拉走話題，我不覺得應該把自己的私事帶到工作上。



練習後，我獨自一個人在球會門口等計程車。陳肇麒駕著他的名貴跑車，出現在我的面前。

「純，我入屯門呀，車埋你。」陳肇麒探頭說，我也沒有什麼考慮，便打開車門上車。

「呢個時間銅鑼灣邊有的士，以為有需要就話我知，我順路可以車埋你。」

「唔該哂，肇麒。」

「叫我阿七咪得囉，再唔係叫我韋拿喇。」



「哈哈哈哈，好多高登仔咁叫你，但你唔嬲咩？」

「邊嬲得咁多？叫我韋拿好過喺旺角場啲阿伯兜口兜面鬧我老豆老母啦下。宜家上網啲人講嘢都幾好笑，下下放到自己咁高，乜都要嬲一大餐我咪好唔得閒。」

陳肇…我還是叫他陳七吧。陳七嫻熟的駕著跑車，風趣的跟我談天說地。突然他看著倒後鏡眉頭一皺，好像發生什麼事似的。

「好似有狗渣車跟我地喎。」陳七跟我說，我連忙往車的後方看，我不太會看，只是看見一輛白色的私家車開得比較接近我們。

「係咪平時跟你新聞嘅記者？」

「唔知呢。」陳七邊說邊加速，幾個起落之後，我已看不見後面的那部車。差不多二十五分鐘的時間，陳七把我由銅鑼灣送到屯門。

「唔該哂呀阿七，聽日球會見。」

「好呀純，再見啦。」



看見陳七的跑車遠去，我站在原地覺得有點神奇。才短短幾個月的時間，為什麼我的生活好像完全不同了。

想得入神之際，電話響起。

英琦：「喂，係我。」

我：「妳幾好嘛？」

英琦：「最近好忙？點解唔搵我嘅？」

我想跟英琦說分手，因為我跟墨已經開始了。但這時我又有點卻步，英琦的聲線有點落寞，我不太應該這樣子落井下石。

我：「係呀…轉咗會好多人同事都要重新適應。」



英琦：「咁我呢？你有冇打算重新適應？」

英琦的問題很尖銳，尖銳得讓人很小心翼翼。生怕一不小心，會惹怒她的神經。

我：「呢啲遲啲先講啦。」

英琦：「點解？嗰個女仔喺你身邊？」

我：「冇，我喺屋企樓下咋。」

英琦：「純。」

我：「點呀？」

英琦：「我地係咪已經算分咗手喇？」