誰能逼我將就: Ch.44

「公公。」

「阿爸。」

看到外公到來，我兩兄弟跟阿媽連忙走到老人家身前擁抱，外公也高興的摸摸我們的頭，這是外公的習慣，他最喜歡摸著小朋友的頭來逗他們玩。

「乖乖乖，坐啦。」外公身旁有一個男人，叫榮叔。自外婆去世後，外公的起居飲食也是由榮叔負責，他是外公的中醫門派入室弟子，對外公很尊重。

「呢個係咪樂兒？大個咗好多喎。」





「叫太公啦，阿女。」

「外公。」

「叻女。」

我們熱熱鬧鬧的在寒暄著，唯獨是阿爸一個人，擠起一副笑臉一直看著外公，準備隨時向外公問好。

但外公沒有看過阿爸。





我看在眼裡也覺得心痛，故意的為他們打開一個話題：

「係喎，我好似好耐冇見過阿爸同公公一齊飲茶喎。」

「老豆以前要養我地忙嘛，宜家退咗休大把機會啦。」大哥的走位不錯，總算是跟得上我。

兩位外孫這樣的高調配合，外公不得不把頭轉到阿爸的那一邊：「咦，係喎。阿信你都嚟咗，我年紀大睇唔到，哈哈。」

「係呀，外父你好精神喎。」阿爸差點僵硬成冰的笑容終於用得上場。





「你退咗休喇？咁以後咪可以陪多啲阿蓉囉。」

「係呀外父，飲茶外父。」阿爸為外公倒茶，阿媽也將自己的椅子向阿爸拉近一點，感覺上是維護阿爸多一點。

這一頓午餐的氣氛不錯，最後大家也是愉悅的離開。

「我會留喺香港兩個月，你地有時間記得搵阿公飲茶呀。」

「知道喇公公。」

「再見。」

把外公送走之後，我們一家也回到家中。我這時才想起墨托我送給阿媽的那一份禮物，連忙拿出來交到阿媽手上。

「阿媽，送俾妳。」





「咩嚟呀？咁乖仔送嘢俾我？咦…短褲，我都唔著短褲嘅。」阿媽的表情有點古怪，但仍然把短褲拿到身上拼湊一下。

「咁妳咪訓覺著囉。」

「你阿媽我有風濕，夜晚踢被驚俾風吹到腳，所以要著長褲訓。」

「哦……咁妳收好佢囉。」

「好啦，多謝你。」

之後，我跟墨在whatsapp閒聊了幾句，交代了我已幫她把禮物送到媽媽手上之後，自己不知不覺在沙發上睡著了。

誰知一睡便是晚飯，我一開眼睛的時候，一桌子也是飯菜。





「食飯喇二少。」阿媽端著白飯到我面前，我連忙站起來幫忙。就在大家正準備要晚飯之前，大哥把我拉到房間內，像有要事要商討。

「純，有啲好怪嘅事。」

「做咩？」

「你知唔知阿媽隻腳有條好大嘅疤痕？」

「疤痕？」

「你阿嫂頭先走咗入阿媽間房，阿媽咁啱喺度換緊你送俾佢嗰條短褲。佢話見到阿媽大脾上面，有條好長嘅疤痕。」

「我唔知喎。」我邊聽，邊再次想起那張報紙。