《果日，我喺FB見到初戀嘅婚紗相》: 短訊(下)

回到我和Carla的故事，由新世界轉到3台後，我彷彿染上了毒癮，不時拿起褲袋內的Nokia手機，看看有沒有Carla傳來的短訊。每發生什麼有趣的事情，我也會馬上透過SMS告訴她。
 
堂課中途，我經常偷偷在櫃桶裡收發短訊。短短一個月的時間，練成不看按鈕打字的絕技，但同時亦被老師沒收了無數次手提電話
 
就算明天一早便要起床上學，卻忍不住發短訊給她，結果到三四點才願睡覺，醒來後又急不及待拿起枕頭旁的手機，對她說一聲「早晨」。
 
「中史堂好悶，個個都喺到釣緊魚。」
 
「我隔離位果個仲過份，上堂喺到織頸巾…」
 




「有無睇最新果套日劇？個男主角真係好靚仔！」
 
「今日唔記得帶數學書，等陣小息可唔可以借比我？」
 
「近排我果班，有個男仔成日望住我笑，好得人驚…」
 
「琴日打波跤柴，依家行路都痛…」
 
「啱啱上完體育堂，D男仔將PE衫掛晒喺冷氣機旁邊，搞到個班房好臭！」
 




諸如此類的短訊，一個月發送與接收不下千封。
 
總而言之，生活就像不能缺少手提電話。所謂教科書可以不帶，回條也可以忘記給父母簽名，但電話一定要緊握在手裡。有時候趕著出門忘了拿手機，整個人便會焦慮不安、悶悶不樂。
 
從前至愛的電玩遊戲，在我心中的地位亦下跌了好幾名。某個星期六，我和阿傑相約到阿昌家打電玩，因為阿昌的父母正好有事外出，而他家總供有兩部桌上電腦及一部手提電腦，剛剛足夠我們三人使用。
 
「淺井落緊下路，小心啊。」
 
「開大殺左阿市先啦。」
 




「對面直江隱大，快D搵人出洞寶。」
 
英雄聯盟尚未發行前，信長之野望曾經受不少電玩迷所歡迎。當時 Warcraft 3還有很多好玩的自製地圖，例如鬼捉人、金字塔大逃亡、強者大戰，於2015年的現在已慢慢成為歷史塵埃。
 
「屌！又輸喇！真係最怕豬一樣的隊友！！！」阿傑對著電腦螢幕豎起中指。
 
「軒哥，你快D上場，無咗你真係唔掂…」阿昌向我求救道。
 
「等等…」我的拇指飛快在手機按鍵上遊走。
 
「唉，以前就日日搵我哋打機，依家有異性，就無人性。」
 
此時，手提電腦響起「登登登」的聲音。
 
「哇！又SMS又MSN，使唔使咁痴纏？！」




 
「佢話啱啱學完琴返到屋企，手機無晒電，咪轉用MSN傾囉。」
 
「其實你淨係日Send夜Send，同Carla都只會止步係朋友階段。大膽D，約佢出嚟睇吓戲、食吓飯啦！」阿傑提議說。
 
然後，阿昌不知道在阿傑的耳邊講了些什麼，各自落出狡黠的表情，肯定不懷好意。
 
「今次就等兄弟幫吓你。」話音剛落，阿傑一把搶去手提電腦，而阿昌則緊捉我的一雙手臂，兩人簡直合作無間，不給我半點反擊機會。
 
「喂！等陣呀！唔好亂咁打野！！！」我瘋狂大喊。
 
但一切都已太遲，阿傑經已按下Enter鍵，將「不如我哋聽日去睇戲？」這句說話發送給Carla。
 
我唯一可以做的，就是祈求Carla不會一口拒絕邀請，「撲通撲通」的心跳聲大得連自己都可以聽到。
 




「登登登」MSN的提示音效再一次響起。
 
 「好啊，想睇咩戲？」看見Carla如此回覆道，我頓時高興得大叫起來，並且緊緊抱住阿昌，朝他的頸項咬了一下。
 
「仆你個街！好痛呀喂！」阿昌用力掙脫：「我知你心情好興奮，但係都唔洗發神經架！」
 
「喇，我哋就幫你幫到盡，依家可以專心同兄弟打機未？」阿傑指向手提電腦上的「Warcraft 3」圖示。
 
「講明先，我要用服仔。」
 
「Ok，fine。」
 
「看我1lv食強王！」
 
「…」