【我在IG Shop買了一個流星少女】: 第四章(下 : 義工篇)

第二日朝早，我約左阿溢先去M記等，然後再一齊去社區會堂集合做義工。
 
「咁我去接男朋友先喇，一陣間M記見啦！」嘉琪笑說罷就與我同星瑤分道揚鑣。
 
「咁我地行啦！」星瑤望住我微微一笑。
 
「嗯......」我點一點頭。「一陣就會見到嘉琪個男朋友喇......」
 
er......我諗係到應該要大家講下發生咩事先。
 




話說琴日排完戲，我同星瑤番左屋企之後......
 
*****************************************************************
 
「做義工？！」嘉琪驚訝咁講。「又會咁突然既？！」
 
「係呀，我見阿溢介紹到，咪去做下囉！」我笑說。「我啦，星瑤啦，阿溢同詠琳都去喎，你有無興趣？」
 
嘉琪聽完之後諗左一諗，然後靈機一觸地望住我笑了一笑。
 




「即係點？」我問。
 
「唔好喇，你地兩隊情侶去做義工，如果我去既話咪盞做電燈膽！」嘉琪說。
 
「咁即係唔去啊？」
 
「咁又唔係喎！」嘉琪繼續望住我。「如果有人陪我去，咁咪得囉！」
 
「哥，你都好似無見過我男朋友架可？」嘉琪補充 : 「不如......聽日我帶佢黎俾你見下家長？」
 




*****************************************************************
 
成件事就係咁。
 
「洗唔洗咁緊張呀！」星瑤取笑我說。「見下細妹男朋友咋喎！」
 
「說話就唔係咁講喇！」我反駁。「我由細到大都好錫嘉琪架，當正佢女朋友咁！」
 
「所以佢每一次有男朋友，我都會盡量不聞不聽不視，廢事自己見到佢地親熱個陣會呷醋！」我繼續補充 : 「可恨既係，直到今日，終於都要破戒喇......」
 
「明明就係一件好普通既事，係你口中就變到咁誇張！」星瑤笑得不亦樂乎。「不過呢種咁錫呀妹既哥哥，我都幾欣賞既！」
 
「咩話？！」我勁開心咁望住星瑤。「你講真架？你真係欣賞我？」
 
「咩......咩喎！」星瑤立即意會到自己講多左，於是乎紅都臉晒咁講。「我...我...我唔知呀！」




 
望住星瑤呢個反應，我不禁會心微笑。
 
「笑咩笑，唔準笑啊！」星瑤望到我笑之後更是害羞臉紅。「笑笑笑，笑你呀媽瀨屎啊笑！」
 
就係咁，我同星瑤打下罵下就行到M記。
 
「喂！呢邊呀！」坐係M記角落處既阿溢向我揮手。
 
於是乎我同星瑤就行左埋去。
 
「星瑤你好！」阿溢打招呼道。「我係家樹既老死，你叫我做阿溢得架喇！」
 
「嗯！」星瑤微笑回應，然後視線就掃左落去阿溢旁邊既女子身上。「咁呢位一定係詠琳喇，你好！」
 




首先係到同大家介紹下詠琳先。
 
佢係一個典型可愛type既女仔，短短既馬尾，炯炯有神的雙眼，迷人既笑窩，158cm高，總之一句講晒就係個種人見人愛，車見車載既類型。
 
至於性格方面呢就更加唔話得，體貼啦，溫柔啦，簡直係每一範好處都涉獵到。
 
如果真係要講詠琳佢唔好既話，我諗就係眼光差，竟然揀左阿溢掛，哈哈！
 
「你好啊星瑤，家樹！」詠琳笑道。「嘉琪呢？佢琴日wtsapp我又話黎既？！」
 
「佢去左接男友，一陣過黎！」我回應。
 
於是乎我地就坐低左係到傾計。
 
過左一陣，嘉琪終於黎了！




 
「sorry啊遲左少少！」嘉琪抱歉道，然後就向我地介紹佢身後既男仔。「呢位就係我男朋友！」
 
「Hello咁多位！」男仔笑瞇瞇道。「大家叫我做阿明就得架喇！」
 
就咁望落，呢個阿明係典型既運動健將size，望落個樣仲幾有安全感。
 
不過對於我黎講，無論佢幾大隻都好幾靚仔都好，佢都只會係一個仆街！
 
一個搶走我嘉琪既仆街！
 
「咳咳！」我決定宣示主權。「阿明下話？我係嘉琪『親愛』既哥哥，馬家樹，你好。」
 
「喔！你就係琪琪既哥哥！」阿明笑說。「我成日聽琪琪佢講起你架！」
 




屌你老味，琪琪？
 
琪你老母呀琪！
 
我呀妹叫馬嘉琪呀！唔撚係馬琪琪呀仆街！
 
不過算，我大人有大量，先唔會同d仆街嘈。
 
「係咩，」我睥一睥阿明。「但係我從來無聽過你個名喎，哈哈。」
 
「……」阿明苦笑咁望住我。「哦……原來係咁既……哈哈……」
 
        哼，想同我鬥，番屋企飲多兩年奶先啦！
 
「你……」就係我準備食住上既時候，星瑤突然間掩住左我個嘴！
 
「嘩！」星瑤裝作驚訝道。「原來都夠鐘去會堂架喇！」
 
「係喎！」阿溢道。「行多步喇，就遲到！」
 
於是乎「阿溢同詠琳」，「嘉琪同阿明」就徐徐步出m記，我同星瑤就跟尾。
 
星瑤見我無再講野，終於放番開隻手。
 
「呼~~~」我吸番一啖新鮮既空氣，然後望住星瑤道。「做咩岩先掩住我！」
 
「頭先你咁大火藥味，容不易講講下爆炸對罵起上黎架！」星瑤望住我沒好氣道。「到時呀咪盞令嘉琪左右做人難！」
 
我諗左一諗，發覺自己岩先又真係針鋒相對左少少。
 
「所以你今日就放過嘉琪男朋友一馬啦！」星瑤笑說。「最多......完左義工之後我請你食雪糕補番數喇！」
 
俾星瑤咁樣氹法，真係咩火都無晒。
 
「唉好啦！」我裝作失望道。「見在你杯雪糕份上，我今日就唔殺阿明啦！」
 
「咁咪乖囉！」星瑤拍一拍我個頭。「嘻嘻！」
 
於是乎我同星瑤就趕番上大隊，然後就到左社區會堂。
 
原來除左我地6個之外，都仲有為數8-10個既青少年參與。
 
等左一陣之後，終於有人出黎講野。
 
「噗噗！」主持拍一拍MIC，然後再用一把懶開心既聲線講 : 「在坐咁多位年青人，我代表青協歡迎大家前來參加今日既義工活動！早晨呀！」
 
「咦？點解無人應我既？係咪未訓醒呀？」主持再說。「早晨呀！」
 
於是乎阿溢玩野咁勁大聲喊 : 「早晨呀！！！」
 
搞到我地都笑左出黎。
 
「無錯喇，青少年就係要有活力先得架麻！」主持道。「所以接下落黎要做既義工服務，就係希望你地能夠將『活力』帶俾獨居既長者，等佢地能夠被關懷，從而積極面對晚年生活！」
 
「大家話好唔好！」
 
「好！」
 
首先，主辦單位將我地分成兩人一隊。
 
呢個情況之下，當然就係情侶分隊啦！
 
「得米啦哥，可以星瑤一隊！」嘉琪笑說。
 
然之後，我地每隊就被分派一個福袋，並需到各指定住所進行探訪。
 
我同星瑤被派往既探訪既係一個住係唐樓既葉婆婆。
 
「咁我地行先喇，一陣見啦！」我向其餘四人道。
 
於是乎我就同星瑤一齊起程。
 
「其實一陣間要做D咩架？」星瑤途中問道。
 
「er......我諗都係同婆婆佢傾下計咁掛。」我苦笑道。「因為其實我都未試過做呢d，哈哈......」
 
傾傾下計，終於都到了。
 
「10樓......」我望住張地址，真係標晒冷汗。
 
「黎啦！我地要行快d！」星瑤從後推住我。「唔可以要婆婆等架！」
 
唉屌......死就死啦！
 
於是乎我地一鼓作氣就踩左上去。
 
「痴線......」我攰到就斷氣。「唔理喇，我抖抖先......」
 
「都上到黎囉，不如直接入埋去先抖！」星瑤略有倦容，但仍然愛心爆棚。
 
「好啦，怕左你！」說罷我地就根據地址行左去一個鐵閘門口。
 
「係呢到喇，」我按一按門鐘。
 
「邊撚個呀！」門後傳黎一把老人家既聲音。
 
......無錯，佢真係講粗口。
 
正當我同星瑤仲為緊剛才個下粗口而驚嚇既時候，門突然「咔嚓！」一聲打開左。
 
迎面走來既，係一個握著拐杖既婆婆。
 
「我問你地呀，你地係邊撚個！」婆婆又重複一次。
 
「你一定係葉婆婆喇，你好！」我立即打醒十二分精神。「我地係義工黎架，想同婆婆你傾下計！」
 
說罷我就遞上證件俾婆婆睇。
 
婆婆睇完之後望一望我，然後好大聲同我講 :
 
「我唔撚想同你傾計喎，係咁！」
 
「砰！」說罷門口就給關上了。
 
「......」我無奈咁望住個鐵閘。
 
WTF？！
 
「乜家下D老人家咁架！」我抱怨道。「好心去探佢都仲要罵我！」
 
「算啦家樹，」星瑤係後面拍拍我膊頭。「老人家就好似一個大細路咁，係要氹架！」
 
「咁大個人仲要人氹？！」我講。
 
「咁頭先唔知邊個又要我氹呢？」星瑤望住我，溫柔咁笑左一下。
 
嗚哇！星瑤你好衰架，又電我！
 
「咁依家點？」我放番軟個態度。
 
「等我黎啦。」說罷星瑤就上前再次按門鐘。
 
「咔嚓！」門又再次開了。
 
「做乜撚野呀，都話左唔想傾囉！」婆婆沒好氣咁講。
 
「婆婆，我帶左個福袋俾你呀，裡面有好多野架！」星瑤講。
 
於是乎婆婆對眼即刻好似發光咁望住我手上個袋。
 
「咁仲唔快D俾我？」婆婆道。
 
「嗯......俾你都得！」星瑤微笑。「但係要我俾地入黎同你傾計！」
 
嘩，咁咪即係威脅？邊忽氹呀！
 
「得！」婆婆諗都無諗就開左鐵閘。「入黎啦！」
 
......又真係得架喎。
 
於是乎我就同星瑤步入婆婆屋企。
 
「攞黎啦！」婆婆一手就搶左我個福袋，然後行左去飯枱到拆開。
 
婆婆既屋企簡單黎講就係一個長方形。
 
一入門口左邊就係床，右邊就係飯枱，再向前行就係騎樓，裡面係廚房同廁所。
 
不過呢到就真係......幾污糟。
 
唔係話地方唔整齊，而係話呢到好似好耐無打掃過咁。
 
我好奇咁問 : 「婆婆，呢到咁多塵，唔會住得好辛苦咩？」
 
「得我一個老人家住咋，邊有力做清潔呀醒目仔！」婆婆把口就答緊我，但對眼從來都無離開過個福袋。「辛苦都要住架，住住下就慣架啦！」
 
「婆婆！」星瑤說。「反正我地上到黎，不如就等我地幫你做清潔！」
 
「下？！」我O晒嘴咁望住星瑤。
 
喂大佬，D塵成寸厚喎！
 
「有工人我又唔拘呀！」婆婆毫無留情咁講。「抹布係廚房，自己攞！」
 
「嗯，咁開始啦家樹！」星瑤非常有活力咁望住我。
 
......Okay，you win。
 
我同星瑤一人一塊布，開始地顫式清潔起上黎。
 
老老豆豆，人呢就真係好犯賤既。
 
本來我就完全唔想抹，呀屌點知見到D野越抹越乾淨個陣，竟然好爽！
 
「星瑤你負責換床單！我抹窗！」
「D碗我洗！」
「風扇太重，一齊洗啦！」
 
結果，我越抹越落力，個幾鐘就已經搞掂晒成間屋！
 
「嘩......」婆婆全程都係到睇電視，所以當佢望到個成果個陣都嚇親。「你地兩個好犀利喎！」
 
「哈哈，我地先唔係港孩黎！」我大汗揼細汗咁講。
 
「婆婆你滿意就好！」星瑤講完之後望左過黎。「你洗唔洗流咁多汗呀傻瓜！」
 
然後......然後星瑤竟然徒手為我拭去臉上一滴流緊落黎既汗水。
 
係呢一刻，我心跳得好快好快！
 
於是乎我紅都臉晒咁呆望星瑤。
 
星瑤知道自己又做多左，所以勁怕羞咁講 : 「唔理你呀，我洗手！」
 
然後佢就鼓起腮子衝左入廁所。
 
「後生仔就真係後生仔，愛都愛得清澀過人既！」婆婆係隔離食花生道。
 
「咩...咩呀婆婆，我地朋友黎！」我立即反駁道。
 
「屌你老母，朋友你老母呀！」婆婆突然殺出一連串老母。
 
「......」
 
「我話你聽，係男人既就要主動D，人地都對你有感覺啦，仲唔上等幾時？」婆婆沒好氣說。「我呢世人最憎既就係你呢種唔嗲唔吊既男人，同死鬼伯爺一撚樣！」
 
當婆婆講到呢到個陣，我feel到佢眼神略過一絲落寞。
 
星瑤出黎黎之後我地兩個就坐左係sofa到同婆婆傾計。
 
「婆婆你住係呢到，出街上上落落咪好麻煩？」星瑤問。
 
「係架，所以我平時盡量都唔出街，係要買餸先落下去！」睇起上黎婆婆已經對我地放低左戒心。
 
此時婆婆望住星瑤，忽然講 : 「我個孫女，應該都有你咁大個囉。」
 
「你好耐未見過個孫？」我問。
 
只見婆婆苦笑左一下 : 「唔單只係個孫，我好耐未見過個仔添。」
 
「點解既？」我好奇追問落去。
 
「無咩點解既，人老就無人要架啦！」婆婆說。「呢個係香港社會既定律，我一早就接受左架喇！」
 
「只係......」婆婆越講就越down。「有時我都會掛住佢地姐。」
 
「唔好傷心啦婆婆，依家有我地黎陪你呀麻！」星瑤安慰道。
 
「哈哈，多謝......」婆婆握著星瑤既手。「岩先仲咁樣對你地添，真係唔好意思。」
 
「唔緊要啦！」星瑤微笑回應。「不過我都好想問，其實婆婆你咁平易近人，點解平時又要咁惡既？」
 
婆婆聽完之後諗左一諗，然後望住星瑤講 : 「不如等婆婆同你地講過故事？」
 
「嗯。」我同星瑤不約而同地點頭。
 
於是乎婆婆微微吸一口氣，開始憶述佢既故事。
 
*****************************************************************
 
呢個，係關於一個出生於有錢家庭既女孩，與一個窮困男孩的故事。
 
女孩由細到大都受住屋企嚴格看管，平時完全唔出得街玩，只可以留係屋企學習琴棋書畫。
 
女孩一直都好想出去闖盪一下，感受一個新既生活模式。
 
終於有一個寒冬，女孩受唔住屋企既壓力，毅然離家出走。
 
但由於女孩身無分文，又無朋友投靠，所以佢就只好露宿街頭。
 
試問一個貴族出身既柔弱女子，又點會承受到呢種又凍又餓既景況呢？
 
結果，女孩躲左係一個天橋底下飲泣上黎。
 
就係呢個最徬徨無助既一刻，男孩出現左係女孩眼前。
 
「屌，你喊乜撚野呀！」男孩一黎就係滿口髒言。「你坐住左我d紙皮呀小姐！」
 
於是乎女孩就讓開左俾男孩。
 
「喂，」男孩執執下紙皮道。「睇你d打扮，唔似係低下層喎。」
 
「做咩仲唔番屋企？呢到唔係你應該黎既地方。」
 
女孩覺得自己好似俾人睇死咁，所以大聲罵男孩 : 「唔洗你理我，我寧願係街餓死都唔會番去！」
 
「唉，唔知世途險惡既細路女。」男孩背起左d紙皮。「你咁靚女，係呢到訓一晚既話真係俾人熔左都唔知咩事呀！」
 
「如果唔介意污糟既話……」男孩說。「黎我屋企啦。」
 
「我俾你訓番晚，但聽日就好同我乖乖地番去。」
 
女孩哭著點頭回應。
 
事關女孩總覺得，跟住男孩一定會好安全。
 
或者，女孩佢真係一個唔知世途險惡既細路女，居然咁輕易就跟人走，哈哈。
 
女孩同男孩既緣份，就係不知不覺間暗暗種下了。
 
男孩住既地方係一個自己搭既小鐵皮屋，麻雀雖小卻五臟俱全。
 
第二日，女孩無番到屋企，仲要死跟住男孩唔放。
 
係一輪哀求之下，男孩終於都答應俾女孩繼續住係到。
 
傾談之下，女孩向男孩講出自己既苦況，點知卻遭到男孩駁斥。
 
「你呢d真係生在福中不知福。」男孩道。「我依家想搵個老豆老母管下自己都無呀。」
 
原來，男孩本來都有一個平凡的家庭，但係佢卻於14歲那年離開家庭，獨自生活。
 
不過無論女孩如何追問下去，男孩都唔肯講箇中原因。
 
在往後的相處下來，男孩與女孩漸漸喜歡了對方。
 
雖然女孩三番四次透露自己的愛意，但男孩卻故意壓抑自己的感情，甚至經常勸女孩回家，請她離開。
 
呢種唔肯面對自己，唔嗲唔吊既女兒郎當性格，令到女孩好苦悶。
 
「其實點解你講野要咁粗魯既？」女仔有一日問。
 
「點解？」男仔笑一笑。「因為當自己一個人生活既時候，如果唔扮惡d既話，就會俾人蝦囉！」
 
此刻，女孩鼓起了勇氣向男孩表白 :
 
「咁如果以後有我陪住你生活，咁你咪唔洗再扮囉？」
 
結果，男孩發晒脾氣咁趕左女孩出去，仲叫佢以後都唔好番黎。
 
女孩唔明白男孩點解拒絕自己，於是乎失望極了，哭著在街上徘徊，不知不覺間走到自己家門前。
 
佢父母發現左女孩，並立即接佢番入屋。
 
然而，女孩父母仍然係冥頑不靈，繼續用個種壓逼既方式管教女孩。
 
女孩每日都好掛住男孩。
 
終於係情人節個一晚，女孩冒著大雨逃走出去尋找男孩。
 
男孩見到女孩之後，並沒有講過任何一句表白既說話，但卻緊緊擁著了女孩。
 
所以女孩都無再追問當初拒絕自己既原因，只有默默跟擁著男孩。
 
自此之後，男孩與女孩繼續一起生活。
 
縱使日子過得如何艱苦，佢地都覺得好開心。
 
佢地儲錢結了婚，然後申請了公屋，生活總算步入軌道。
 
正當女孩以為迎接佢既係幸福生活既時候……
 
男孩突然消失了。
 
女孩苦苦找尋多年不果，最終決定放棄，並且領養了一個小孩。
 
小孩長大之後無視養育之恩，將年老的女孩拋下不顧。
 
正當女孩打算結束自己人生既時候，男孩再次出現係佢面前。
 
係女孩眼前既男孩，仍然如當年離開時一樣年輕。
 
男孩徐徐向女孩道出所有。
 
原來，男孩在14歲時被證實有初期癌症，佢父母無力支付醫療費，所以男孩為左唔想父母操心，毅然離開。
 
本來平平無奇的生活，就係遇到女孩之後改變了。
 
男孩愛上了女孩，但卻怕自己的病情會惡化，唔能夠俾到幸福女孩。
 
所以男孩遲遲都唔肯接受呢段關係，趕走女孩之後都仲繼續呃自己無中意過女孩。
 
然後去到情人節個晚，女孩再次遇上男孩，男孩先發覺自己原來真係好愛，好愛女孩。
 
結果，男孩同左女孩係埋一齊，而男孩既病情一直都未有惡化。
 
直到，佢地結左婚之後。
 
男孩既病情開始惡化，而且應該離死期不遠。
 
於是乎男孩決定離開女孩，避免女孩擔心自己。
 
結果，男孩好快就離開了人世。
 
但佢仍然係唔放心女孩，所以一直係天上面守護女孩。
 
「應承我，以後要好好生活落去，好嗎？」男孩臉上流著淚水。「堅強d，唔好俾人蝦啊，傻妹。」
 
「嗯，我應承你。」女孩道。
 
「既然係咁，我走喇。」男孩微微一笑。「我愛你啊，葉婷。」
 
這次，是男孩第一次向女孩表明心意。
 
亦係，最後一次。
 
*****************************************************************
 
「所以婆婆你先至一直咁惡……」星瑤哽咽道。
 
「死鬼伯爺佢呀，個陣走又唔講聲，做乜都唔嗲唔吊咁，講起真係好嬲！」葉婆婆講下講下，藏在眼框既淚水終於都流了下來。「如果佢一直都唔嗲唔吊落去咪好囉……」
 
「係都要臨尾番番黎，同我講埋個句先滿足既……」
 
聽到呢到，我忽然覺得好心痛，於是乎眼淚不自覺咁湧出。
 
望向星瑤，佢一早就哭不成人。
 
「點都好啦，多謝你地肯聽我呢個老太婆發嗡風。」婆婆抹乾眼淚。
 
呢個時候，我先發覺婆婆佢原來都真係幾有個種貴族既氣質。
 
「點會呢，我地多謝你既故事就真。」我微微一笑。
 
坐多左一陣之後，我地就夠鐘番去社區會堂。
 
「我地走喇葉婆婆！」星瑤臨走前攬左婆婆一下。「你保重啊！」
 
「得架喇屌！」婆婆笑一笑。「得閑就黎探下我啦！」
 
此時婆婆望住我，講左一句好有意思既說話。
 
「後生仔，做人唔好再咁『唔嗲唔吊』，等人都走埋既時候先識去表白！」
 
「嗯，我明白架喇。」我笑一笑，然後望向星瑤。
 
星瑤剛好與我對望住，然後臉上立即紅了起來。
 
同婆婆道別之後，我地就趕番去會堂。
 
「係呢家樹，」星瑤說。「如果俾著你係個個男孩，你會點做？」
 
「即係點？」我笑左一笑。
 
「即係話，你有病係身，而且就死，咁你會留係女孩身邊，定係一走了之？」
 
「嗯……」我諗一諗。「我諗……」
 
「我諗……如果大家係真心相愛既話，我會選擇留係女孩身邊，然後更加珍惜彼此相處既時光。」
 
「因為好多野錯過左，就追唔番。」
 
星瑤無再回應我，只係莞爾一笑。
 
話咁快我地就番到去喇！
 
「頂！」阿溢衝左埋黎。「岩先我地去探一個伯伯啦，點知佢無啦啦攬住我係咁喊，然後係咁叫我呀仔！」
 
「唔係掛！」我笑說。
 
「仲虧你笑得出！」阿溢罵道。「好彩詠琳幫手安撫伯伯，佢先肯放手咋！」
 
呢個時候阿明同嘉琪都走左埋黎。
 
阿明首先開聲 : 「其實都唔怪得佢地既，無親無物又無人理，見到有人關懷佢既時候自然會激動d！」
 
「阿明講得岩，係阿溢你太大反應姐！」我講。
 
就係我講完之後，全世界都O晒嘴咁望住我。
 
「做…做咩？」我驚訝道。
 
「你…..」星瑤說。「你居然認同阿明！」
 
咦，係喎，我唔係嬲鳩佢架咩？！
 
不過算啦，聽完葉婆婆既故事之後，我衷心希望天下間所有情侶都可以長長久久！
 
「哈哈！」我R著頭講。「我從來都無唔認同過阿明喎，可？」
 
「哈哈……係既係既……」阿明苦笑道。
 
之後我地就開始食Lunch喇。
 
不過所謂既Lunch其實就係飯盒一個加枝水。
 
我地一行6人係禮堂圍左個圈，傾住計食飯。
 
當我放低左成見之後，我先發覺阿明份人都幾健談，講野有point得黎又好笑！
 
果然我細妹揀得既都有番咁上下！
 
不過當然就唔夠我咁好啦，哈哈！
 
食完之後，主持又開mic講野。
 
「咁多位食得飽唔飽呀？」
 
「飽！」
 
「飽既話即係話大家都要消化下啦！」主持笑一笑。「既然係咁，不如就一齊黎做d唔劇烈既運動啦！」
 
「下？！」我有種不詳預感！
 
「我地，」主持大聲道。「一齊黎打掃會堂啦！」
 
「……」
 
屌！又要清潔！
 
於是乎我又重複番今朝做既野，拖地啦，抹窗啦，@!%#@$^%^&#%^&#%^！
 
搞左一大輪，終於都做完喇！
 
「唉屌，濕撚晒！」阿溢已經熱到除左上半身衫。
       
        「唔撚驚啦！」阿明同樣除左衫，露左大大舊胸肌出黎。
 
「肥……肥冬？！」我驚訝道。
 
        拿，唔洗係到幻想喇，我無除衫架！
 
        「咁多位青少年，你地真係好落力喎！」主持又黎發嗡風。「唔知道大家仲有無體力呢？」
 
「有！」眾人既心情係不知不覺間已經變得高昂起來。
 
「既然係咁！」主持道。「我地一於就開始最後一樣任務------去託管中心同班小朋友玩啦，大家話好無！」
 
「好！」我地一齊大叫。
 
我地執齊野之後，就向中心進發！
 
臨走前，我見到主持抽住一大個紅白藍膠袋去，唔知道係咩黎架呢？
 
喔，我知啦！一定係同小朋友玩既道具黎！
 
***
 
「拜託晒你喇！」主持說。「咁我走先喇，一陣我會黎攞番走！byebye！」
 
「……」我望住主持遞俾我既紅白藍膠袋，一粒聲都出唔到。
 
「加油呀哥，我知你得架！」嘉琪忍著笑道。
 
「咪臭係！」阿溢直頭笑左出黎。「呢d野你做得黎啦！」
 
「家樹，」星瑤拍一拍我膊頭。「我會幫你搞氣氛架喇！……『噗嗞』！」
 
個下『噗嗞』，係星瑤忍唔到笑爆出黎既一聲。
 
我徐徐打開個袋，然後係裡面抽出一個熊啤啤頭套同一件熊啤啤衫。
 
        「……」我深呼吸左一下。
 
「點解會係由我黎扮熊仔架！！」
 
        不過無計啦，為左氹班小朋友，死就死啦！
 
我穿好整件套裝之後，就跟住星瑤行出去中心既禮堂。
 
老老豆豆，真係好撚熱。
 
一出到去，就已經見到成班細路仔坐晒係地下。
 
驟眼望落，佢地大部份都應該係讀緊小學低年班，只有少數係再細個d。
 
不過令我在意既，唔係佢地既年齡，而係……
 
佢地望住我個種，虎視眈眈既眼神。
 
媽呀！我好驚呀！！可唔可以走呀！！！
 
「喂，班塞豆窿好似想食左我咁款喎！」我驚嚇道。
 
「放心啦，人地得個幾歲，慌佢打得死你咩！」阿溢串道。
 
屌，一個打十個就話姐，依家簡直係趙子龍百萬軍中藏阿斗喎！
 
而且最慘既係咩？
 
就係我唔係趙雲，我係阿斗啊仆街！
 
話雖如此，但我始終都係要上台。
 
「我地接下落黎有請今日既嘉賓，熊寶寶黎同大家講幾句野！」主持道。
 
「啪啪啪！！」一陣響如雷既拍手聲仿佛在為我前往死亡既道路而鼓掌慶祝！
 
我接過mic吸了一口氣，然後裝作可愛道 : 「咳咳……大家好<3 ~~~！」
 
「……」場面鴉雀無聲。
 
屌！無理由既！再黎！
 
「大~~~家~~~好~~~<3！」
 
「……」靜到好似連風聲都聽到，哈哈。
 
就係呢個時候，星瑤走過黎搶左我支mic！
 
「咁多位小朋友，熊寶寶今日黎探你地喎，開唔開心先！」星瑤微笑道。
 
「開心……」只有少部份人係到講野。
 
「我聽唔到~~~！」星瑤做出一個順風耳手勢。「再大聲d！『開~~~心~~~！』」
 
        「開心~~~！」小朋友們終於都有反應！
 
「再~~~大~~~聲~~~d！」
 
「開~~~心~~~<3~~~！」小朋友興高采烈咁講。
 
「好喇，依家熊寶寶會落黎同大家玩遊戲，記得落力d去玩！」星瑤笑得好似個小朋友咁，非常可愛。
 
「好！！！」小朋友回應。
 
於是乎星瑤就轉過頭黎俾番支mic我。
 
「唔該晒！」我說。
 
只見星瑤向我伸一伸脷，然後就跳下彈下咁行開左。
 
嗚哇，kawaii！
 
落番台之後我地成班義工就開始同小朋友玩起d團體活動上黎。
 
以訛傳訛啦，糖痴豆啦，大風吹啦，樣樣都玩齊晒咁滯！
 
雖然著住呢套衫玩games搞到我流晒汗，不過當望到小朋友笑得好燦爛既時候，真係咩辛酸都被拋諸腦後。
 
玩左一大輪，終於都黎個小休時間。
 
「嗚啊……」我攰到坐左係到。
 
當我準備除頭套既時候，忽然有個好細個既小男孩走左埋黎！
 
「做咩啊小朋友？」我重新戴番個頭套。「有事想搵我熊寶寶傾？」
 
小男孩並無回應我，只係眼甘甘咁望住我。
 
「er……」我一時之間都唔知點好。「你係咪想同我玩？」
 
「熊寶寶……」呢個時候小男孩終於出聲。「我…….」
 
「嗯？」我試著引導佢。「你想點？」
 
「我想……」小男孩忽然笑左一下。「我想玩超人打怪獸！」
 
「……」
 
今次仆街了。
 
「我想玩超人打怪獸！」小男孩又重複左一次。
 
「你……」我苦惱道。「你想做怪獸？」
 
「我係超人，係超人！」小男孩一下子竟然想哭起上黎！
 
唔係下話，咁化學！？
 
「得得得，我做怪獸！」我立即安撫道。
 
點知係我講完呢句之後，小男孩就立刻一個箭步上前，然後一個side kick踢左落我小腿到！
 
雖然咁細個小朋友踢落黎唔會話好痛，但佢踢個個位岩岩好就係我最少肉既部份，所以異常咁痛！
 
屌！犯規啊！呢個塞豆窿肯定食過夜粥！
       
        「受死啦！」
 
        當我仲回緊氣既時候，個塞豆窿突然跳起左，然後用飛踢衝埋黎！
 
「督！」
 
呢一腳，不偏不倚咁踢左落去我子孫根到。
 
Fucccccccccccccccccccccccccccccck！
 
都係個句，本身唔大力，但踢既位好應……
 
「頂……」我跪左係到望住眼前呢個強勁既對手。「估唔到，我今日終於都見到你喇，呂布！」
 
「最後一擊！」塞豆窿走到黎我面前將右手拉弓。「升龍拳！」
 
喂……乜超人最後一擊唔係死光咩……
 
結果，佢一拳打左落我個頭套到。
 
當然啦，呢下一d都唔痛。
 
「嗚啊！」我裝模作樣咁訓低。「我輸喇！」
 
「yeah！」小男孩好開心咁跳下跳下走左出去。「超人成功捍衛地球喇！」
 
等到小男孩離去之後，我先夠膽起番身。
 
「依家d小朋友真係恐怖……」我終於都除左個頭套。
 
「咁唔知道岩先邊個又同人地玩得咁開心呢？」突然一把甜美既聲音從我左邊傳黎。
 
我一望過去，原來係星瑤！
 
「係佢迫我玩咋！」我苦笑道。「乜原來你一直係到食緊花生架？！」
 
「哈哈，係啊！」星瑤莞爾一笑。「不過見你俾人虐得咁緊要，咪廢事阻住晒囉！」
 
我立即醒起剛才被踢子孫根個下。
 
「咩…咩喎！」我不甘道。「我讓佢咋！」
 
「okay okay！」星瑤笑得好窩心。「我實信你架，哈哈！」
 
小休好快就過左，於是乎我地就開始玩d靜態活動，好似係摺紙鶴，講故事咁。
 
玩左一輪之後，我地都差唔多夠鐘走。
 
「熊寶寶，你要走喇？」有個小女孩捉住我隻手。「唔好走啦！」
 
其他小朋友見到，隨即衝埋黎攬住我。
 
「唔好走啦！」
「玩多陣啦！」
「我會好掛住你架！」
 
一把把純真既聲音，真係令我唔想走。
 
「好對唔住啊，但熊寶寶我真係要走喇！」頭套下既我，真係有d想喊。「下次再見啦，好無？」
 
「咁姐姐呢？」有個小朋友衝左埋去星瑤身邊。「姐姐你唔好走啊？」
 
於是乎其他小朋友都照板煮碗咁攬住身邊既哥哥姐姐。
 
我地6個望住呢個情景，都覺得份外感動。
 
「姐姐真係要走喇，」星瑤笑一笑。「不過臨走前，姐姐都可以彈琴俾大家聽既！」
 
「真係架？」小朋友滿懷期待咁望住星瑤。「好呀好呀，我要聽姐姐唱歌！」
 
「乜原來星瑤你識彈琴架？」阿溢道。
 
「識少少咁啦！」星瑤一路講一路行上台，然後徐徐掮開部琴。
 
「呼，」星瑤坐低左，並且伸出雙手放於琴鍵上。「今日呢首歌，我希望可以唱俾一d唔嗲唔吊既人聽。」
 
「下？」眾人不解。
 
而我，就甜甜咁笑左出黎。
 
全場屏息以待，準備聆聽星瑤既歌聲。
 
「我送俾大家，」星瑤笑一笑。「《惡作劇》。」
 
說罷星瑤便開始彈起前奏。
  
星瑤既歌聲，不斷在我腦海中徘徊。
 
原來一直以黎星瑤都只係hea唱歌，今次認真唱起上黎真係好好聽。
 
好甜，好有韻味，好觸動人心。
 
「啪啪啪！！！」台下傳黎一段段既掌聲。
 
「雖然我聽唔明普通話，不過唱得好！」阿溢係台下大叫，於是乎眾人都笑左出黎。
 
同一眾小朋友道別之後，我地6個就企左係門口。
 
「我同詠琳走先喇！」阿溢說。「今日多晒大家，拜拜！」
 
佢地走左之後，嘉琪好識做咁拉住阿明 : 「我地都去行下啦！」
 
於是乎嘉琪同阿明都走埋，得番我同星瑤。
 
「岩先首歌，你係唱俾我聽既？」我裝作挑逗說。
 
「我係唱俾個d唔嗲唔吊既人聽架喎！」星瑤裝作漫不經心咁講。「除非你自認囉！」
 
「如果以前既話，我絕對會承認自己係。」
 
「不過……」我伸出右手，緊緊咁拖住了星瑤的左手。「從今日起，我諗我唔係喇。」
 
星瑤與我十指緊扣著，傻傻咁望住我甜笑了一下。
 
「正一大傻瓜。」
 
「咁……」我笑一笑。「不如我地都去行下？」
 
星瑤莞爾一笑 : 「嗯……」
 
「好啊<3。」
 
究竟依家係咪即係代表星瑤係我女朋友呢？
 
我唔知。
 
不過有一樣野我知道既就係，
 
我地都好想珍惜同彼此相處既時間。
 
 
 
 
 
『全神貫注望真你，然而喜不喜歡我忘記問你。』
(愛上你是我眼睛的錯 – 陳奕迅)