【我在IG Shop買了一個流星少女】: 第二章(下)
第二朝我一早就起左身梳洗，然後換衫準備去排戲。
由於我見阿妹同星瑤兩個都未起身，咁就廢事嘈醒佢地，所以就留低左張紙仔同條匙係枱面。
我番左學校排戲呀，星瑤你想出街既話就用呢條後備匙啦！
家樹
然之後我就出左門口慢慢行番學校。
番到禮堂一打開道門，阿溢就衝埋黎捉住我！
「今次仆街喇！」阿溢非常焦急咁講。
「搞咩呀？」我不解咁問。
「個班仆街管弦樂團呀恃住自己幫學校攞過幾個大獎，居然走去問校長可唔可以借個禮堂俾佢地練黎緊個咩公開比賽！」阿溢越講就越嬲。
佢繼續補充 : 「最慘係咩？就係校長竟然應承左，而且仲要俾成每星期4日佢地！」
「咁……即係點？」我都係唔明。
「咁即係話我地打後只可以一個星期練一次戲囉！」阿溢嘆息道。
唔撚係掛！咁我咪即係可以有多d時間陪星瑤囉！
天助我也！！！
「喂，」阿溢見我竟然仲笑笑口，於是乎懷疑咁講 : 「你以後只可以一星期見紫鈴一次咋喎，點解你仲可以咁開心！」
的而且確，雖然紫鈴係我心目中仍然係最重要既位置，之不過星瑤都好重要！
而且，仲要係越黎越重要！
點講好呢……事關我覺得呢兩個女仔都有個種令我第一眼就為之心動既力量。
佢地同樣都係勁吸引我既視線，令我好想不斷咁望住佢地。
咪住！話時話我咁樣算唔算係同時中意兩個女仔？！
死啦，咁咪好仆街……
「唔通！」阿溢既說話將我從思考中抽離番出黎。「你識左新既女女？！」
屌，有無咁聰明！
btw究竟同唔同阿溢講星瑤呢件事好呢……
算啦，以防萬一，都係保密好d！
「無啦傻既！」我笑一笑。「我純粹係覺得自己係時候要放低下紫鈴，然後見識下出面個世界姐！」
「嘩，馬生，你撞親個腦黎？！」阿溢真心驚訝咁講。「明明你前幾日都仲係當正世界上得番紫鈴一個女仔咁撚樣架喎！」
「咁……人係會變架麻！」我反駁。「話者你地講得岩，我應該要試下接觸多d人，見識多d新事物！」
「屌，你終於大個仔喇！」阿溢捏一捏我膊頭。「紫鈴呢d咁靚又多人溝既女仔，當女神咁觀賞得架喇，唔洗追到手！等我介紹下d女你識啦！」
「唔洗喇，你咁重口味！」我串阿溢道。「唔好當我唔記得呀，上次你話低一form個肥婆靚女！」
「屌！冤枉呀！」阿溢喊晒口咁講。「我係話佢隔離個女仔靚咋！」
「咁仲洗講既，人地係樓下既女神歐陽芷翹喎！」我搭住阿溢膊頭。「不過估唔到你會岩個架坦克車姐！」
「……屌！」
等到齊人之後，我地就開始排練喇。
「我唔會走架喇，我愛你！」紫鈴緊緊咁攬住我講對白。
哇哇哇屌！呢場戲真係好正，我先唔會刪走佢！
「好呀！今次唔錯！」阿溢做出個good既手勢。
紫鈴立即鬆開雙手，然後好唔好意思咁講 : 「sorry啊家樹，我係咪攬大力左？」
梗係唔係啦，我覺得未夠添呀！
請你狠狠咁攬實我，俾波餅我食啦~~~！
當然啦上面既句子我係唔會講出黎，呵呵。
「哦，唔會呀，做戲呀麻，係咁架啦！」我微笑道。
「咁就好喇，哈哈！」紫鈴都笑左一笑。
嗚哇！又黎呢招~~~我會頂唔順架~~~
「咔嚓！」就係呢個時候，禮堂既門口打開左。
映入眼簾既，係兩個女仔。
「哇！點解會有靚女黎探班既？」我地劇社既其他男成員道。
「一個係低我地一form，家樹個妹黎架！」其中一個男成員講。「之但係佢隔離個個係邊個呢？」
「隔離個個真係好掂喎！」另一個又係到和議。「唔好理喇，一於一陣問佢攞電話！」
「點......點解......」我簡直不能夠相信自己既眼睛，腦海更加係一片混亂！
死啦！你叫我點同阿溢紫鈴解釋！
「點解你地會係到架！」我跑左落台，然後走到兩位少女既面前講。「嘉琪！星瑤！」
當我講完之後，全世界人都靜左落黎，等待事情既發展。
「拿，呢層你就要問星瑤喇，係佢格硬要我黎架咋！」嘉琪將個波推左落星瑤到。
於是乎全場既目光就落左係星瑤身上。
星瑤望住我，然後做出一個溝死仔既笑容講 : 「咁我見係屋企好悶麻，但自己又無咩地方想去，所以咪決定黎呢到睇你排戲囉！」
如果比著係平時聽到呢句既話，我諗我應該會好開心！
只不過依家就......哼哼，仆街了。
「唔係掛，個女仔同馬家樹好似好熟咁喎！」
「屌，俾我仲好啦！」
「咁唔公平喎，佢又有個咁靚既細妹，又有個咁靚既女朋友！」
身後個班花生友係到你一言我一語咁討論起上黎。
咪喇，勢色唔對路，都係駛走星瑤同嘉琪兩個先！
「但我地依家咁岩係到休息緊，所以就未有得睇排練住！」我打左個眼色俾嘉琪。「係喇妹，我見有d頸渴，不如你同星瑤落去canteen到幫我買枝野飲？」
「okay無問題！」嘉琪大概明白我既意思，所以就立即拉走左星瑤。
咦唔係喎......做咩我唔跟埋落去！依家咁樣我實會俾人公審！
「大家都攰架喇，休息一陣先啦！」此時阿溢一個箭步走上前，然後將我拉埋一邊，替我解圍。
「好兄弟！」我真係滾動到就黎流馬尿。
「你就唔方當我兄弟啦，竟然夠膽死呃我！」阿溢好似真係嬲咁！「岩先問你又話無識新女女，咁依家呢個咩『星瑤』究竟係邊個黎！你乖乖地就好從實招來！」
唉，事已到此，都無謂再呃阿溢呢個brother。
於是乎我就一五一十咁將星瑤同居呢件事同左阿溢講，並且包括埋我對星瑤既感覺。
「原來係咁既......」阿溢消化緊我既說話。「估唔到世界上居然真係有呢d動漫情節發生！」
「哈哈，其實我都覺得自己發緊夢！」我唔好意思咁講。「所以我先唔敢同你講呢件事，事關真係好難解釋！」
「家樹，」阿溢搭住我既膊頭。「所以依家即係話，你既目標係星瑤？」
「其實我都未知啊......」我真心咁講。「事關我對紫鈴同星瑤都有feel......」
「其實你洗咩咁煩姐！」阿溢沒好氣咁講。「兩邊做左朋友先再諗咪得！反正你同紫鈴一早就已經係朋友啦，咁咪試下俾多d時間去認識下星瑤，然後先再決定追邊個囉！」
呀屌，阿溢又幾中point喎！
「果然係我既好兄弟！」我笑逐顏開咁講。「一個我諗到頭都爆既問題，居然俾你咁輕易就解拆到！」
「咁又唔洗多謝我既！」阿溢裝作謙虛咁講。「係你on9姐！」
「......屌。」
呢個時候禮堂又突然變得嘈吵，於是乎我同阿溢就轉身望過去，發現原來係星瑤佢地番左黎。
「拿！」星瑤走左埋黎遞枝水俾我，而嘉琪就企左係後面。
於是乎我就接過星瑤手上枝水。
「wow~~~！」身後隨即傳黎個班花生友既歡呼聲。「收埋個靚女都唔講聲？快d介紹下人俾我地識啦馬家樹！」
死啦！咁搞法星瑤會唔會覺得尷尬架？！
萬一搞唔好既話，話唔定仲會俾星瑤知道我對佢有意思！
咁到時候佢一定會覺得我份人好隨便，好輕易就中意人啦！
咁樣既話我既印象分到時就一定會跌穿恆生指數既低位！
唔好呀！！！
「哈哈！你劇團d人都幾風趣架喎！」星瑤笑說。
……唔係掛，星瑤你係咪真係天然呆黎！
班花生友以為你係我女朋友呀！
就係呢個時候，星瑤見我好似無咩反應咁，居然自己介紹起上黎！
「大家好，我係劉星瑤，住係長洲，依家讀緊長官中五級，大家叫我做星瑤就得架喇！」
「哇掂呀！」
「陽光女神！」
「come on baby！」
個班花生友已經打晒飛機咁……
「咁我同嘉琪坐去後面先喇！」星瑤望住我笑一笑，然後就轉身拉左嘉琪走。
「星瑤真係唔錯咁喎！」阿溢忽然係我後面冒出黎，然後搭住我膊頭講。
「拿你少心d講野呀，如果咪一陣呢我就同細妹講呢件事，留名等你仆街！」我威脅阿溢講。
點解？事關阿溢個女朋友詠琳其實就係嘉琪個閨蜜！
所以只要我向嘉琪放料，嘉琪再向詠琳告密，咁阿溢就九死一生了。
「拿，唔好亂黎呀大佬！」阿溢立即勁驚咁講。「最多就幫你收晒班花生友皮喇得未？」
「deal！」
於是乎阿溢就即刻大喊 : 「各位準備！繼續排戲！」
就係咁，我地就開始重新run through左套戲一次。
不過唔知道係咪因為有星瑤在場呢，當我同紫鈴演親密戲個陣我硬係覺得勁唔自在！
辛辛苦苦左成個鐘頭之後，終於都排完喇！
我同左阿溢紫鈴講byebye之後，就行過去星瑤嘉琪個邊。
「走得喇！」我笑說。
「正！去食飯！」嘉琪彈左起身。「我去個洗手間先，門口等！」
呢個時候我望向星瑤，忽然發覺佢個樣神不守舍咁，仿佛若有所思。
「星瑤？」我係星瑤眼前揮一揮動右手，於是乎佢立即嚇左一嚇。
「做咩？！」星瑤好驚訝咁望住我。
「我話我排完喇，依家可以去食飯！」我有d好奇星瑤係到諗緊咩。「諗咩諗到入晒神啊？」
「哦……無啊……」話雖咁講，但星瑤既視線一直都無離開過舞台既方向。
我隨住佢既視線望過去，赫然發現佢望緊既原來係紫鈴！！！
「你望緊個個女仔？」我問。
「嗯……」星瑤聽到之後有d難言之隱。「係啊。」
「乜你識紫鈴架咩？」我再問。
「原來佢叫紫鈴……」星瑤喃喃自語咁講，但由於接下落黎既句子太細聲，所以我一d都聽唔到！
「下？！」我不解咁講。
「哈哈！」星瑤忽然大笑左一聲，然後就企左起身推我出禮堂。「快d走啦，如果咪要嘉琪等就唔好！」
……究竟有無人可以講俾我知發生咩事！
鏡頭一轉，我地就已經坐左係大排檔到食緊飯。
雖然係離開左學校之後星瑤已經變番平時咁樣，之但係我總係形住形住佢有d心事。
究竟點解星瑤對紫鈴咁有興趣架呢？
唔通係因為星瑤見到我同紫鈴傾計，所以怕我俾人搶走而呷醋？哈哈哈！！！
「搞咩呀你，食食下野都可以笑到咁樣衰既！」星瑤突然望住我講，搞到我嚇左一嚇。
「無呀，我覺得個飯好好味，所以咪開心囉！」我求其搵個藉口。
「之但係你食緊個個係車仔麵……」嘉琪把口講。
「係喇星瑤！」我立即轉移話題。「距離暑期完結，即係8月31號其實仲有成6個星期喎，你諗住點樣用？」
星瑤諗左一諗，然後輕鬆咁講 : 「我都唔知呀，哈哈！」
「我既目的其實就只有一個，就係趁呢兩個月唔洗俾父母束縛住既時間，好好咁重新認識呢個世界！事關我由細到大太多野都未試過，未接觸過！」佢繼續補充道 : 「所以去邊到做d咩其實戾唔係咁重要，最重要既就係可以經歷到一d我以前未試過既生活！」
「但點解你會特登揀係呢個暑假先黎試既？」嘉琪講。「而且點解你屋企會俾你咁做既？事關佢地平時管得你咁嚴，應該唔會俾你呢個只得17歲既少女獨自出去闖盪世界先岩架！」
「er……」星瑤突然變得吞吞吐吐。「咁係因為我同父母之間有個協議……」
「我記得你之前都同我講過！」我立即道。「不過究竟係咩協議黎，點解會有咁大效力既？」
聽到呢到，星瑤既臉容竟然一下子變得苦惱起上黎，感覺上就好似我地督中佢地穴咁。
嘉琪見勢色唔對路，於是乎立即更改道 : 「er……其實我地都係好奇下架咋！所以……哥！不如都係快d食飯仲好啦！哈哈……」
「嘩，個麵好好味！」我都立即回應道，然後大啖大啖咁吞嚥起上黎。
「其實都唔係咩大秘密黎既……」星瑤此時嘆左一口氣。「好啦，我講俾你地聽啦。」
於是乎我同嘉琪都放下左筷子，專心聽星瑤既故事。
「其實我父母並唔係由細到大都管得我咁嚴架。」
「細個個陣我係住天水圍既，個時呀爸呀媽好中意帶我周圍去玩！南生圍野餐啦，海洋公園啦……總之就去過好多好多地方啦！」
「本來一切都好開心好完美既……但直至我小四既時候……」星瑤苦笑左一下。「原諒我呢part唔講得要skip左佢，哈哈！」
「嗯。」我同嘉琪都明白，始終我地都只係互相認識左幾日，難免有d野係好難啟齒。
於是乎星瑤就繼續講 : 「總之就係我小四既時候發生左一d小插曲，所以最終就導致左我父母變成依家咁，凡事對我都加倍著緊……啊唔係，係過份著緊。」
「自此之後，我既生活就好似坐監咁，每日就係番學放學回家食飯做功課訓教，無得出去玩，無得識朋友。」
「直到我升中個陣，佢地居然決定搬去長洲，結果就搞到我變成一個『在孤島坐監的少女』，哈哈。」
「當然啦佢地都知道唔可以永遠監視住我既，所以係我升左高中之後佢地就決定放寬番個規例，俾我逢星期六自由活動，但就要每小時打電話俾佢地，而且唔準夜番咁囉。」
「不過老實講啊，我朋友本身就唔多，而且仲要住長洲咁遠，試問有咩地方好去先得架，唔通真係自己一個人走去南生圍野餐，又或者單機去海洋公園咩！」
「所以無聊之下我就係高中開始製作起diy飾物上黎，最後仲開埋ig shop添！」
「雖然自從diy飾物以黎我既生活好似無咁苦悶咁，不過我個心始終都係屈住屈住，希望他朝有一日我能夠隻身離開屋企，出去外面認識新既朋友，見識一下呢個世界！」
「而終於，直到今個暑假，終於俾我等到呢個機會。」
「由於我父母好想我係中五呢一年裡面完成一件事，所以我就用呢件事要脅佢地，繼而同佢地達成左一個協議。個協議就係------」
「只要俾呢兩個月時間我出去見識下個世界，咁番到黎之後我就會絕對跟從佢地既意思。」
聽完之後，我腦裡面開始係到思考。
首先，究竟星瑤係小四發生左咩事呢？點解會令到佢父母轉變咁大，仲要搬埋去長洲咁q遠？
第二，究竟星瑤父母想佢今年做d咩呢？唔通件事係好重要既？如果咪佢父母點會肯因為呢件事而放低晒以前個d嚴苛既規矩！
而最後一樣就係……
明明星瑤由細到大都受住咁大壓力，但點解佢既性格都仲可以咁陽光？究竟佢係真係咁樂觀啊，定抑或只係扮出黎？
不過當然啦，呢d問題我都無問到出口。
事關我知道，星瑤唔想講自然有佢原因，強迫都係無謂，最後盞令自己吃力不討好。
而且更加重要既就係，我知道只要我能夠係呢兩個月打動到星瑤既心既話，佢一定會願意自行向我坦白！
到時候我一定會為佢分擔壓力，令佢成為真正既「陽光流星少女」！
所以依家最重要既就係，帶星瑤重新認識呢個世界！
啊唔係，唔應該咁講。應該係話……
「星瑤，」我望著星瑤說。「無論以前既事係點都好，其實都已經成為過去。所以我都唔會迫你去講，因為既無需考究，亦都已經唔重要。」
「反而值得你去留意，亦都係最重要既野，就係黎緊呢六個星期你希望點樣寫出一個屬於你自己既故事。」
「講樣野俾你知呀，其實我同你一樣，都係好想重新去認識呢個世界。」
「所以恭喜晒你，因為你已經認識到新既朋友，就係我喇！」我微微一笑，然後堅定咁望住星瑤，講出心中既說話 :
「不如未來就等我陪伴係你既身邊，然後一齊去探索，去感受，去經歷一切啦，好無？」
星瑤聽完之後，先是一呆，然後臉微微泛紅地與我對望著。
「……嗯！」星瑤點點頭。「既然係咁，接下落黎既呢六個禮拜就勞煩晒你喇！」
星瑤莞爾一笑 :
「多謝你啊，馬家樹。」
今次，係星瑤第一次因為我而臉紅。
望住星瑤清澈既眼珠，白裡透紅既臉蛋，我既心立刻莫名其妙地急速跳動起上黎。
真係好想輕輕撫摸星瑤既面頰，然後吻佢一下！
「咳咳！」嘉琪突然一聲，我先記得佢係到！！
「仲有多謝你呀，嘉琪！」星瑤轉過頭黎攬住嘉琪隻手。
「幾驚你唔記得我！」嘉琪沒好氣咁笑道。「好啦快d食野喇！食完我地就計劃下黎緊d行程！」
「嗯！」我同星瑤一齊回應道，於是乎我地望住大家，互相又笑左一笑。
經過呢次對話之後，我feel到星瑤對我既感覺唔同左。
雖然之前佢對我都好似朋友咁，又會開玩笑又會好多野傾，不過感覺上就硬係有一種無形既距離感。
但係依家，呢幅牆就好似被攻破左咁，令我確切感受到星瑤實實在在咁係我身邊。
唔單只係咁，我地雙方仲好似無左個種要格硬搵野講既壓力咁，好自然就傾到計。
而且最特別既就係，我地眼神交流多左好多，而且對望時間仲越黎越長。
呢種感覺好特別，令我個心跳得勁快，有一種難以壓抑既興奮。
究竟呢種係咩關係黎架呢？
既唔係我同紫鈴個種顧忌暗戀，又唔係我同阿溢個種兄弟相稱，更加唔係我同嘉琪個種兄妹親情！
唔通……呢種就係所謂既……「好感」？
『難堪的不想 只想痛快事情』
『時間尚早 別張開眼睛』