狼人遊戲: 第二十七章 無間
狼人遊戲 最終章 無間
「對唔住...天佑.....係我.....」
剛說話的人正是一把熟悉的聲音.....我連忙轉身一看....不就是.....
傻強：「天佑....我就係一直係你隊入邊嘅卧底....」
我：「傻強....原來....你就係同狼人嘅情侶......」
思浩「就算俾你地而家知道又點....你呢個白痴無辦法投票...巫女小君又用晒兩枝針....得返小柔同小君可以投票....就算俾你地生存到又點....投票嘅票數極其量只可以2比2打和...打和...你係唔可以處決到我地...所以話....只有我地慢慢將你地一個一個殺死...哇哈哈哈哈哈哈！」
思浩說得沒錯...我們...難道真的輸了....？
我：「咁...點解....點解你上個回合要幫我潛去思浩果邊做卧底？最後又跳返過黎？唔通....你係做戲？」
傻強：「哈哈！講得無錯！呢場一直係我同思浩夾埋做嘅一場戲！」
我：「咁點解...你要咁樣做？明明思浩果時果邊有4票....(Winkie，吹波，巫婆，思浩)我呢邊得3票(傻強，小君，小柔)...你地明明贏緊.....」
傻強：「思浩....講唔講俾佢地知好？」
思浩：「咪講囉！橫掂佢地陣間都會準備死....咪等佢地死前知道啲真相囉！哈哈」
傻強：「嘿！因為我地一早已經知道巫婆嘅身份係替罪羊....」
我「下！唔通....你地嘅目的....就係專登要造成打和局面...？」
傻強：「無錯！天佑，雖然你都好聰明！不過始終都唔夠我地嚟！哈哈哈！」
我：「咁點解....你地會知道巫婆嘅身份....只有預言家先有能力去知道玩家的身份....係喇！預言家！」
思浩：「哈哈哈！你而家先估到太遲了！無錯！之前排骨捉咗Coie果時....我地已經叫佢用Coie部手機預測咗其中一個人嘅身份！咁岩就俾我地預測咗巫婆係替罪羊...我地就等緊呢一個機會....令到全場都造成打和嘅局面....」
我：「你咁樣做莫非......」
思浩：「目的就係令到巫婆失去理智....最後令到所有人都無得投票.....咁樣先可以創造對我地最大嘅利益....Winkie一早已經俾你地知道咗身份....巫女嘅毒針同救針都一直未用....而家正正好用晒嚟對付Winkie！哇哈哈哈哈哈...一切一切....都係我掌握之中！」
我：「唔通....吹波之所以投唔到票....都係你地嘅怖局？」
思浩：「當然啦！我表面上要同Winkie坐埋同一條船，打和局面可以令我地勝出嘅機會大大提升！我當然要佢幫手要係吹波嘅手機度做手腳....可以接近到吹波最快嘅方法就係色誘佢....」
小柔：「色..色誘佢？」
思浩再說：「Winkie尋晚應該同吹波去開房，好似聽講仲係五星級酒店添，途中只要換咗吹波張Sim卡，今日就可以神不知鬼不覺咁令到所有嘅事好似意外咁.......巫婆明明想住5對2嘅局面而家變成3對3....本來唔洗佢死突然要佢死....情緒控制唔到就會發顛亂嚟....結果當然係我地預測一樣....要你地個個無得投票！」
我：「冇可能架！咁點解頭先吹波仲會收到訊息？」
思浩：「哈哈哈！Winkie既然換到佢張SIM卡，想係佢手機做手腳有幾難？是但買多張太空卡，將個No.入落佢手機再改個名做MC，然後再用我部雙卡手機將收到嘅短訊轉發比佢，佢就當真！咁容易就呃到佢！真係蠢！」
我：「可....可惡.......」
不對！還有最後的希望！這個回合還沒出現指令，只有特殊的指令效果，還可以令我們得救....
就在這時候，所有人又收到了短信，我一看....
的確是今天的指令，但竟然是......
我：「.............................」
思浩：「哈哈哈哈哈！睇嚟個天都唔幫你地啦！準備受死啦！」
『這回合村民的投票和狼人的殺戮要在同一時間中進行，各玩家十分鐘後在操場執行』
思浩：「睇嚟呢個指令對你地一啲幫助都無....同一時間進行又點...我而家都唔介意俾你地知道晒啲身份...因為...你地跟本贏唔到我...哈哈哈」
我：「.......................」
傻強：「天佑....嚟到呢度...我都唔介意講多啲嘢俾你聽..記唔記得幾日前...阿風死嘅前一日...我同你一齊放學...」
我：「記得...果日你同我講你細細個偷人食蛋糕嘅故事俾我聽」
傻強：「無錯！其實...我係專登咁樣做，引導你去思考！」
我：「引....引導我？」
思浩插咀道「無錯！係我專登叫傻強咁樣做，引導你去想到毀屍滅跡嘅計劃目的，就係要你令想出阿風係有可疑！令你去查佢！」
我：「.......................」
思浩：「果然不出我所料！你真係懷疑到阿風！果時我地一早已經察覺到阿風對我地已經有異心！再加上我地係狼人同村民嘅情侶！係果一刻已經死咗好多村民，一定要死一啲狼人嚟平衡返個遊戲局面！」
我「所以，你就揀咗阿風...因為佢手機度一早裝咗偷聽系統！只要我一搵佢...同佢傾計...你就可以順理成章咁播出錄音！阿風就自然會俾人處決！」
思浩：「天佑啊天佑...你一直覺得自己好聰明，其實一切嘅嘢...都已經係我嘅計劃之中！哈哈哈！」
我：「原來我係你用嚟殺阿風嘅工具之一......」
說到這裡...我跪到地上...基本上已經崩潰...眼淚也慢慢地不禁流下來....
小柔：「天....天佑.....」
思浩：「哇哈哈哈！喊啦喊啦！我就係想見到你跪低係度喊！為你無能而喊！係你親手將你好友送去地獄架！哈哈哈！」
傻強：「哈哈！我叫傻強！但估唔到你個天佑比我傻一百倍！殺死自己好朋友！哈哈哈」
我：「阿風............」
傻強：「不過到到今日...我地都要多謝一個人先岩！」
我：「多....謝一個人？」
傻強：「無錯...佢就係一早死咗嘅瀨屎！」
我：「瀨屎！？丘比特？」
傻強：「因為佢令我地兩個變成情侶，其實係有原因架！」
我：「咩…咩嘢原因？」
傻強：「我都唔怕話埋俾你地聽！因為....我地跟本就係情侶！」
我「！！！！」
傻強：「無錯！我同思浩係同性戀者！」
思浩：「如果我無估錯，我地讀書嘅時候曾經係學校嘅後巷度ｋｉｓｓ...結果俾瀨屎睇到！佢果時就已經知道咗我地係同性戀，可能就係呢原因，佢今次將我地編入咗做情侶！」
我：「你....你地......」
傻強；「如果唔係我地邊有咁好默契！天佑...你係黃泉路上祝福我地白頭到老啦！哈哈！」
我「..................」
思浩：「好啦傻強！講完啦！係時候要玩下嘢啦！跟住...我想睇下一個男人睇住自己心愛嘅女人死係佢面前會係點...哈哈哈」
我：「唔好啊！你地停手啊！」
傻強：「小柔！我地殺你咁多次你都死唔去...今次...你無可能走得甩啦！」
我：「你地要殺就殺我先啦！」
小柔：「天佑...」
傻強：「你好心急咩？跟住都到你死架啦！咁心急做咩！只不過你愛人行先一步之嘛！」
小柔：「天佑...唔好咁啦...命中注定我地要一齊死係呢度，我地係天堂再見啦...」
我：「小柔！對唔住...我保護唔到你！對唔住....」
傻強：「哈哈哈哈！好感人啊！不過好可惜...唔經唔覺已經十分鐘了...受死啦！小柔！」
嗶嗶嗶...眾人也按下了手機....
傻強「哈哈！你地仲投票嚟做咩？2對2只會係打和，打和係唔會有人死！你地係殺我地唔到架！咪做無謂嘅反抗啦！」
思浩「一班蠢才！嘿嘿嘿！」
就在這個時候，所有人也收到了短信，看來是投票和狼人處決的結果...
傻強「天佑！你心愛嘅人準備死啦！哈哈哈！下！！咦！？」
思浩「.......」
傻強「點....點解會咁？」
『狼人殺戮已經結束，這回合沒有任何人死亡』
「點...點解...會無人死？點解殺唔到？唔通...系統出錯？」傻強
「點...點解...會無人死....點解殺唔到...唔通...系統出錯？」傻強
「系統無出到錯，你地睇埋第2條短信先啦！」我
「第2條？」傻強
『村民投票已結束，這次村民投票的玩家
6號玩家小柔..投票人為：13號玩家思浩，22號玩家傻強
13號玩家思浩..投票人為：6號玩家小柔，11號玩家小君，15號玩家子俊
其13號玩家思浩與22號玩家傻強為情侶，均以受到火炙之刑
13號玩家思浩身份為狼人，22號玩家傻強身份為村民』
「子俊？」思浩
「佢..佢...唔係死咗架啦咩？？點解？？」傻強
「咳咳咳咳.....邊個話我死咗.....」
就在此時，在校園的其中一個陰暗處傳出一把聲音
「你..........」傻強
一個身影慢慢從陰暗處走出來，正是一位男子坐在一輛輪椅上
「無錯...就係我.....咳咳咳」子俊
「子俊！點解你....仲係度？明明我地一齊睇住你...」思浩
「呢個時候，我都唔介意將我地嘅事講返你地聽」我
8月22日 遊戲第六日 21：00瑪嘉烈醫院
「子俊！！你點啊！！撐唔撐得住？」我
「我撐得住...為咗保護小君...我一定撐落去....」子俊
「你一定要撐住啊！」我
「只有咁樣做...萬一小君有咩不測...我先可以暗地裡用侍衛嘅功能去保護小君...」子俊
「辛苦晒你，子俊！」我
「我做咗呢場假死嘅戲，而家人人都以為我已經死咗。放心，我會梅花間竹咁每個回合保護小君同小柔...因為呢兩個人..係對你同我最重要嘅人...」子俊
「好...好多謝你....」我
「小君同我講過..佢就係巫女..我相信佢！！」子俊
「我明白，雖然佢係咁講。但係我地都無辦法核實佢係咪真係巫女！！」我問道
「咁你都無辦法核實小柔係咪同狼人係情侶啦？？咁點解你仲咁信佢..」子俊
「..................」我
「可能你同我諗法都係一樣...就萛佢地真係想殺我地...我地都心甘情願...就當..為左自己最愛嘅死...」子俊
「嗯....」我說
「就當今次賭一鋪！！」子俊
「好！！！」我說
「之後你再同小君佢夾定好..係必要嘅時候令狼人佢地以為小君已經用左救針..實際係我用左侍衛效果！！」子俊
「好！！話事話...果日個醫生點解會話你死咗...」我問道
「果日果個著白色衫嘅...唔係醫生，係我另一位好朋友！！」子俊
「估唔到你受左咁重嘅傷仲可以咁冷靜去安排去場戲」我說
「我會係關鍵嘅時候出返嚟....放心天佑...我地一定會無事！」子俊
「所以！Winkie上個回合殺小柔係子俊保護咗佢，所以佢就無事。而今個回合，巫女小君先係用救針去救小柔！所以，你地今次輸咗啦！」我
「點解....點解會係咁....啊.....」傻強
就在此時，傻強和思浩的身體同時慢慢開始著火
「思浩！！你你明講過我地唔會輸架！點解...啊..好痛啊！！」傻強
「哈哈哈！！啊...估唔到.....最後竟然係輸係子俊手上....哈哈哈...啊...」思浩
「思浩！今次你輸得心服口服啦！今日！你就乖乖地落去地獄啦！」我
「我唔想死啊....思浩...我唔想死啊！救我啊...！啊啊啊....」傻強
「天佑....你唔好開心得咁早...啊....雖然今日你贏到我....但只要...一日....人類有貪念....呢個遊戲...啊...都會一直...繼續...落去...呢個咀咒....永遠...永遠都唔會停...」思浩
「思浩！！落去你嘅無間地獄啦！」我
「真....正...嘅...無間....地獄...係係...人間....哈哈哈....哈哈哈....」思浩
我「.......................」
我們慢慢思浩和傻強慢慢都燒成火人
這一切，終於都結束了。阿風，Coie，翠兒，還有所有的人！！我終於把所有人狼人都剷除了，我們...勝利了！
「子俊！你無事就好啦！」小君
「放心小君，我應承過你...會一直保護你...唔會離開你...咳..」子俊
就在這個時候，我們的手機也響了
『恭喜勝利者：天佑，小柔，小君，子俊 4位玩家，每人都可以獲得一個願望，請於一個小時內以手機短信發放給系統』
小君「係啵！！我地可以許願望！我地許咩願望好啊子俊」
子俊「思浩...啱啱...死果時講嘅嘢好有道理...人只要有貪念...呢個咀咒就會繼續落去...受害只會係更多嘅人...咳...」
小君「我而家咩都唔要，我剩係要你，子俊！！」
子俊「小君.....」
小君「我相信，只要有你係我身邊，我以後食wasabi唔會再覺得啃，只會覺得甜」
子俊「我以為....你已經忘記咗果件事....」
小君「我永遠都唔會忘記！！」
我「見到你地真肉麻...」
小柔「係囉係囉...哈哈」
子俊「不如咁啦，我有個提議，天佑，你幫我地代表許呢個願望得唔得？」
我「咩嘢願望？」
子俊「就係...要呢個咀咒同遊戲消失係呢個世界上！」
我「哈，其實你唔講，我都想許。因為之前我應承過翠兒，如果我地贏咗呢個遊戲，佢又唔好彩已經離開咗我地，就想我幫佢許下呢個願望！」
子俊「好好，就咁決定！！」
我「不過我自己仲想幫一個人許一個願望」
子俊「邊個？？」
我「就係令到阿風媽咪嘅病好返！！不如咁啦，遊戲永遠消失呢個願望就由子俊你代我地許啦！我就幫阿風完成佢個遺願！！」
子俊「好！！就咁決定！！咁小君同柔你地有咩願望？？」
小君「咩願望對於我嚟講，已經唔再重要，而家我身邊嘅人先係最重要！」
小柔「我都無所謂，天佑點，我跟住點就得」
我「好！我就要証明俾思浩睇！呢個世界！佢嘅理念係錯嘅！」
我和子俊把願望的訊息發送去系統
我和子俊頓時也收到了短信
『玩家的願望指令已成功發出，願望會在一小時後生效』
一切都完結了，所有事都完結了
「好啦，終於大團圓結局啦！典型TBB式劇情啊！」小柔
「嗯...一切都結束啦！！狼人遊戲將會從此係呢個世界上消失！！阿風，Coie，翠兒，仲有死咗嘅人，希望你地可以安息啦！」我
連日來的殺戮終於到結束了，在這九天裡，我死了很多朋友，我不知道我未來的日子要面對什麼，更不知道警方如果查到這件事我們會不會變成殺人犯，這麼恐怖的日子我們也可以挨過去，我相信，未來的事情，我們一定可以面對！狼人遊戲...正式結束了！