《完美犯罪手冊》 - 為了上進而失去一切的故事: 《突入》
而家時間九點半…Hyuna一早就去左搵趙政祺…到底有咩事要搵得佢咁密…
依趙政祺既性格，同hyuna絕對唔會做到朋友，甚至佢跟本就無朋友；所有人係佢眼中，都只係得利用既價值。
「hyuna…」
十點，我準時出門口開門既一剎那，已經見到一條車匙懸掛住係度。
行樓梯落到樓下之後，一輛黑色既房車早已經停泊左係我棟唐樓既正門之外。
同琴日接我果部一樣。
自從我二十歲考左車牌之後，我就一次都冇渣過車…估唔到我第一架渣既車竟然唔係屬於我自己既車，心底不禁酸了一下。
［噠－轟隆隆隆隆隆隆－］
當我坐係司機位啟動引擎時，內心不禁有一股莫名既興奮感覺湧現。
我終於明白果ｄ成功既人仕既自信係點樣黎。
就同跑車一樣，你既引擎聲愈大、愈沈實、愈雄渾，你既自信心就愈強。
正所謂人未到、聲先到，旁邊既普通橋車都會被你比下去，驕傲既感覺由然而生。
控制住軚盤既我，一邊望住手機，一邊計劃一下行程。
首先我要去阿dee位於長沙灣既總部出發，最快既路徑應該係：
總部出長沙灣道＞轉入彌敦道＞直去經梳士巴利道入紅隧＞過左海之後直踩東區走廊就可以到達銀行金庫。
而我今日要做既…最起碼要睇下邊度可以畀阿dee落手將錢散落係路面；
邊度人流最多…令到大量既人潮出現，吸引人群擾亂交通等等。
我踩行油，只需四十分鐘車程就到達左目的地－「筲箕灣」。
我將車窗降下，處於遠距離觀察果座神秘大廈。
適逢今日係假期，有一架旅遊巴停泊左係海防博物館門口，仲有好多公公婆婆跟旅行團。
而神秘大廈既保安依然打醒十二分精神戒備；同一般會恰眼訓既保安完全唔同。
我等左半個鐘，呢棟大廈都係完全冇動靜。
甚至我望住果啲公公婆婆入去參觀，參觀完後出返黎，呢個時間都冇其他既車輛進出呢座大樓。
呢個時候一群老人經過呢棟神秘大樓。
『伯野公呀…』一名婆婆指住大廈道：『呢座野係咪都係博物館黎架？』
老伯道：『唔知喎……問下囉。』
『呀…先生呀先生？』婆婆走近門口既看更。
「咩事。」看更冷淡的道。
『請問呢度係咪都係博物館黎架？可唔可以入去？』
「呢度唔係博物館。唔可以進入。」保安揮手拒絕。
『下…』伯伯追問：『咁呢度係咩地方啊…？』
「唔好意思，秘密唔可以透露，請離開。」
『乜咁架…咁冇禮貌既…』
旅行團既公公婆婆沒趣地離開後，我亦聽到一啲重要情報。
本來我都唔太相信呢度就係金庫，因為竟然設係咁公開既地方…真係匪夷所思。
但連個保安都唔透露既話，第一，呢度一定係非公眾能進入既大廈。
第二，攝錄機異常咁多，保安程度絕非尋常。
第三，竟然咁耐都冇半個人進出呢度，即係話入面地方咁大，都只會有好少數既工作人員，其他空間應該全部放哂銀行既財物。
睇黎我冇搵錯地方。
正當我準備開車走時，果個保安竟然同我有眼神接觸！
我身處既位置，大大話話都有五十米咁遠，佢警戒範圍竟然遠到咁？
唔係…佢咁諗係正常。
係我既存在唔合理先岩。
［咯咯］保安敲我車窗。
我徐徐搖下車窗：「咩事？」
『先生請問你停留係度做咩？』
係我未答佢之前，我留意到有三個保安留守係佢原來看守既位置…！
係幾時出黎既？唔通係我岩岩想得入神既時候…？
而且，佢地無一不將注意力集中係我身上。
「我等朋友入博物館……」我冷靜的道：「我有必要答你咩？」
保安笑言：『冇，我見先生你停留左咁耐，怕你畀警察抄牌姐。』
「哦，有心。」
『你……』
「咩事？」
『你唔諗住走？』
「有交警黎我先走都未遲啦，我朋友係博物館入面。」
『哦……』保安拿我沒輒：『咁唔阻你。』
保安離開左之後，就返回原位同果幾個人集合。
然而，另外果三個人見佢返左去之後，絲毫無諗住要走。
反而繼續留係度，而且三不五時就會望我一眼。
唔通佢地以為我有咩不軌既企圖？定抑或呢度平時跟本冇咩車出入，所以我行跡可疑？
［轟隆隆隆隆隆－－－－］
忽然間一聲沈實有勁既跑車引擎聲從我耳邊傳出。
我即時探頭一望倒後鏡，見到一輛高速既跑車向我駛近。
唔係，係向金庫駛近。
我打死火燈，示意讓路比佢行。
係聽到跑車聲後，除左我，就連同果四名保安都打醒左十二分精神。
將注意力全部轉移到果輛跑車之上。
慢慢地，架跑車開始駛入金庫範圍，車上既人同保安交頭接耳後，
一名保安返回本來既控制室，另外三人左右排開。
正當我以為佢係白撞既時候…忽然間，一直尤如鐵壁堡壘既閘門竟然打開左…！
咩人？
係咩人有權力將車駛入去？
能夠駛入去既，我初時以為只有解款車、貨車等等既車輛…
如果係私家車既話…咁果個係咩人？
正當我苦無頭緒，不自覺地望向倒後鏡時，
又一輛車駛入。
呢次既呢部車唔同之前，只係一部普通既寶馬。
毫無特別之處，於是，我將所有注意力集中係呢部車既車窗上…
當部車愈駛愈近，我先從倒後鏡見到司機座載有一男一女。
男既著住西裝，女既…
等等…
我望真少少…
呢個…
趙政祺？！
冇錯，我冇認錯，肯定係佢。
寶馬迅速地係我身旁駛過，趙政祺認得出我架車既車牌，不過佢冇同我打招呼，只係望左一眼就立即轉換視線。
呢個時候，我見到車後座仲有人。
果然…
Hyuna坐左係車後座。
點解佢地會係呢度出現？而且仲可以進入去金庫！？
我一啲頭緒都冇，就算我想扮白撞，都同唔到佢地入去。
就係呢個時候，我感到褲袋既手機震左一下。
『走』
呢個訊息，係hyuna發比我。
雖然佢只係打左一個字…但呢個字已經足夠說明佢而家既處境。
正常可以用電話既人，應該會打一句句子，絕唔會打一個單字。
而且我見佢側面只係用眼角既餘光望左我一眼，但同時佢係同車後座既另一人交談緊。
即係話，hyuna一邊傾計，一邊偷偷地伸手入袋發訊息比我。
我亦事不宜遲，即時開車離開呢個地方。
一路上我不斷係度諗…點解佢地會係度出現。
而且同佢地傾計既人…唔似係朋友，似係工作上既客人一樣。
但…hyuna點解…會係趙政祺架車出現？
我回想起今朝hyuna打比我，佢話佢係趙政祺身邊，即係話佢地一早準備黎呢個地方。
而我係一個意料之外既因素，佢地冇諗過我會係度出現。
因為hyuna冇預計過我會逗留係金庫門外，佢以為我只會去灣仔、銅鑼灣一帶勘察邊度人多就算。
所以佢先會發個短訊比我叫我走……
今晚…我一定要問清楚。