《相交的平行線》: 第十二話
「愛情是事外者所不能理解的。」──莎士比亞
妳竟在眾目睽睽之下親了我的面頰。
立即，班房總不能缺乏起哄的群眾，而我亦被妳這個舉動嚇到。群眾的聲音提醒了我倆，妳看著我，臉色瞬間轉紅。然後就跑出了班房，高佬見我仍然呆若木雞的模樣，拍了拍我。
「追啦，柒頭！」
「呀…呀！係喎。」
我立即衝了出去，見妳在門前不遠處，我便追上來了。
「淇淇。」我拉著妳的手。
「好醜怪呀我。」妳低著頭，對這事實不忍直視一般。
「唔係呀，妳都幾大膽呀。」
「我見你為我做咁多嘢，我真係好感動……」妳的聲音漸漸低了下去。
「傻妹。」我摸一摸妳的頭。
「你又知人地會信你個謠言？」
「嘻，簡單啦。人嘅心理好奇怪，愈係看似不可能嘅事，反而愈會相信，愈想搵原因去解釋佢。當人聽到willy周圍唱妳嘅時候，佢地會接受左妳移情別戀這個事實，然後就會去搵個原因。」
「咁佢地唔會信willy個版本多啲咩？」
「呢個就係重點，有啲人會因為懶得諗，而信左willy嘅版本，但有啲人會懶係有批判性思考咁，唔太信。而我呢一刻就提供左另一個答案，利用人追連續劇或者係故事嘅心態，令個啲懶嘅人信左，而懶係有批判嘅人都信到十足。當然我唔係想有心踩willy，但如果佢唔唱妳嘅話，我都唔會得手。」
此時，一個人向著我們走過來，他輕輕舉起了手掌。
「Nice, man.」
「 Thanks，汰。」說罷，我便舉起了手，跟他互相擊了掌。
「當然，呢個世界都會有啲好似呀汰咁心水清嘅人，綜觀整件事黎睇，就知係我嘅計劃。但呢類人唔多，而且呢種人多數都係不理世事，活係自己樂園嘅人。」
「佢就係次次考第一個個？」
「嗯，冇錯。」
「咁你唔怕俾人唱埋一份咩？」
「好啦，我只係答一次咋。」
「嗯。」
我深呼吸了一下「我在乎嘅，只係妳嘅感受；我在意嘅，只有出自妳把口。無論其他人點講點傳，我都唔會理，you are the apple of my eye.」
「妳真係唔會再講多次？」 妳會心微笑了一下再問道。
「唔啦，對我黎講已經肉麻到極限啦。」
「咁好啦，以你咁內向嘅性格都氹我，我真係好開心。好彩我錄左音姐，咁我上堂慢慢聽啦，嘻嘻。」
「下？？？咁好啦，比心機上堂呀。」
「但係你唔好再瞞住我做咁多野啦，有啲咩我地一齊分擔嘛。」
「嗯，妳都係呀。」
我見四下無人便親了傻妹的額頭一下，才斯斯然回到班房裡。
「 喂，呀單，原來傳言係真嫁？」
「妳真係搶左人番嚟呀？」
「妳幾時搶嫁？」
「拍左幾耐呀？」
「點溝人嫁？」
聽著他們有如滔滔江水，連綿不絕，更有如黃河氾濫，一發不可收拾的一條又一條的問題，我愕然的站在門口。幸好得左右護法捨命相救，要不然我得站到老師來了。
「喂，你地咁多問題叫人點答呀。」高佬一個地圖炮發下去。
「咪係囉，答得邊個姐。」肥仔亦幫忙吸引部分火力。
「你咁講得，姐係你知啦。」同學甲說。
「當然。」高佬答
「講啲嚟聽下。」
見眾人八卦之火有惹上左右護法的趨勢，我只能開口澄清：「相信大家都比我更清楚傳言嘅內容，我想同大家講，亦正如頭先所見，傳言係真嘅。That’s all.」
說罷，班主任便到來，開始說些有的沒的，總算把這把靠八卦生存的群眾給鎮壓下去。總之跟所有學校一樣，九月一日開學日，回去就是完全浪費時間，幸好有高佬發來的資訊給我研究解悶，而且正午就放學了。
不過一會，令人愉悅的鐘聲就響起了。
「喂呀單，有邊去呀？」肥仔問道。
「唔知喎，反正我地都會搵佢地嫁啦，問下佢地想去邊囉。」
「好呀好呀，一定要問J me想去邊呀。」肥仔囉唆道。
「得啦長氣。」高佬說。
於是我們便去找了妳們一同走了。
「而家我地有7個人，咁去邊好？」妳問 。
「不如食餐飯先啦，我有啲餓。」高佬答。
「但係難得齊人，去玩啦不如，況且遲下都冇乜機會玩。」妳說。
「好喎，咁不如唱K啦，又有野食又有得玩又坐得耐。」呀喬提議。
「好呀，好耐冇唱喇。」
「你去唔去呀？溫少一日書啦。」妳問著我。
「見妳呢半個暑假都咁勤力，好啦。」
「好嘢！你係最好嫁啦。」
「我唔去啦，我約左人。」Pinky說。
「約左邊個咁巴閉呀？」J me問。
「仲要問嘅。」
所以，我們一行六人便去了K 房了。進去期間，那個熟悉的身影再次在我身前走過。
進了K 房，3 位女士純熟地一面拿著遙控器點著歌，一面說笑著。
此時，我示意高佬出一出去談些事，我們走到了廁所，我檢查了所有廁格有沒有人。
「做咩呀？你個樣咁凝重嘅。」高佬問。
「你今日俾我啲資料我全部睇哂。」
「咁快，個度十幾廿版嫁喎。」
「嗯，稍微了解過條友，同埋知道條友開始左下一步。」
「你又知。」
「因為你個度有佢張相，我認得相中人，第一次見到佢係我地去完camp之後係café 度見到。但我認為個次係偶然見到，當時見到佢不斷向我地個方向望，我已經好留意佢。第二次係我同淇淇去溫書個時見到，我有問過淇淇有無同邊個講個我地係度？佢話得J me 同Pinky，而我為左避開佢，之後轉左場，就再冇見過佢。但啱先我又見翻佢，同埋我相信佢好快會搵其他人黎跟蹤我地。」
「你肯定？」
「嗯。」
「咁我地之間應該有人通風報信。」
「我都係咁諗。」
「咁你應為係邊個？」
「Pinky。」
「點解？」
「Pinky每次唔係度個時，條友先係度。如果有個咁好嘅針，根本唔需要佢出嚟。但佢係度，而pinky唔係度。反證了pinky嘅身份。但我相信佢係因為佢男朋友先會講我地嘅位置。」
「咁我收下風睇下佢男朋友咩料先。」
「好，順便，搵機會話我地性格其實唔夾。」
「下，你又當眾踩自己呀。」
「咁又唔駛，只要傳到俾willy知就得啦。」
「有啲難。」高佬皺一下眉頭。
「其實唔難。」
「點做呀大佬，係佢面前做戲呀？」
「唔駛，你搵呀喬同pinky講咪得囉。」
「又啱喎。」
說完我們便回了K房。
「去邊呀，你唔係同高佬去搞基呀？」 妳問。
「我只係鍾意妳嫁咋。」
「口花花。」
我們各人玩的極興奮，每到一些情歌的時候就好像解high一樣。而興奮過後，終於到了妳的首本名曲「只要和你在一起」。妳立時唱道
「人來人往擦出喧嘩吵鬧夜城景況
停在一角靜靜回望
原來這里路蕩來是那麼匆忙
多想牽著你不放 能愛你 是我的一線光
現時只想 吻得火燙
別理這危城 誰的懷疑眼光」
我欣賞著妳的表現，看著妳唱歌，那專注的樣子，帶有感情的唱出歌詞，像是真的向我唱般。而當妳唱到「沿途幾多障礙 埋頭撞向未來 閉上呼吸跟你墮進深海」時望了我一下。我明白了，怎樣我都不會放棄愛妳，只要和妳在一起，我什麼也不怕。
唱完，因為K房很大，我抱著淇淇依偎在旁。而另一邊的呀喬跟高佬正情到濃時。令J me跟肥仔坐在中間落得一副難為情的情況在唱歌。
而我見及此，我立即叫淇淇跟我裝睡，因為肥仔應該會受現場情況影響，於氣氛帶動之下做出奇怪事，情況相信會爆笑，所以妳偷笑並點頭配合。
我們裝閉著眼，環抱著妳又躺在梳化上，我又打了個眼色給高佬他們，示意留意肥仔。
肥仔起初也沒有什麼動作，但見到我們好像睡了，又大膽了很多。
「呀單佢地好似瞓左呀。」肥仔說
我心想，你想說什麼呀，別離題啦，說重點啦。
「嗯，係呀。」
此時，肥仔的手蠢蠢欲動的掙扎著，來來回回好幾分鐘，仍然不好意思的放下去似的。雖然我很想笑，但妳伸到我腰間輕輕一掐……我還是默默的看戲。肥仔再開聲了「我…我…可唔可…可唔可以錫…錫啖..你…你呀？」
說完，肥仔沒有等J me回答，就慢慢的靠近了J me，我聽了差點又笑了出來。那有人會問完才親呀，還要說到像是口吃似的，這肥仔真是銀槍蠟燭頭呀。