事隔三年，有一晚一個來電正式完結

首先再一次多謝咁多位巴絲一直以黎對有一晚一個來電呢個故既支持， 
今次開post純粹只係為分享我同阿欣既近況，並無故仔出， 
要追故既可能會令你地失望啦（唔好屌我）。 

如果有人唔知發生咩事既，又唔介意阻你幾分鐘時間睇， 
我可以係度講下我既少少背景同故事。 

三年前我係高登寫左個故－有一晚一個來電，主要分享我中學時期既愛情故事， 
故事中有兩個女主角，第一位叫阿紫，係我同年同學，亦係第一位初戀對象； 
第二位叫阿欣，大我兩年級，因為我數學差所以老師安排補數底下認識，係暴力 




既關係下發展成好朋友，當時極力勸佢應該入特殊學校。 

我同阿紫拍左拖近兩年，因為佢要搬屋轉校同家庭背景既關係，最終導致分手， 
面對分手痛苦既日子之際，阿欣係中五畢業出國前同我表白，我一時唔識反應， 
但亦同佢好開心咁過埋剩底係香港既日子，事情以待續作結。 

如果你地對呢個故有興趣，可以上紙言睇睇 
https://www.shikoto.com/article/698/有一晚一個來電.html 
同時多謝紙言提供一個咁好既平台比讀者可以追文，同埋重溫。 





今次可能係我最後一次上黎交待，唔係因為我就黎死， 
而係將來既事可能要有一段長時間先再有更新， 
到時大家都未必再記得我啦。 
雖然高登每隔一兩個月就會有人搵我上水，問係咪有咩事或死埋， 
其實我仲係好生歐歐係度既，都多謝你地既慰問同祝福。 

至於大家最想知道既阿欣， 
其實佢就返左香港架啦，我同佢都有見過一次面。 

見佢果日，我仲遲到添。 




阿欣打黎催我：喂！你到未啊！又遲到，咁多年黎你都冇變既！ 

我：行緊啦，就到就到，咪催住晒啦！ 

阿欣：行行行，行去和合石啊！快D啦！ 

阿欣話人果種語氣，咁多年黎都無變。 

我：和合石變左軍事要塞啦，而家香港每個男仔都要服兵役， 
我見完你第二日就去架啦，要三五七年先出黎。 

阿欣離開香港咁耐，以為係真：下，真係架！咁咪有排先可以見？ 

我：你想見到我咩？ 





阿欣結結巴巴：痴線，邊係，最好唔好出黎添！ 

我：哦，咁我走囉。 

阿欣好急咁話：喂啊死人樂，咪玩啦，到未啊你。 

我：到啦，係你後面。 

我望住佢，依然留住黑色既長髮，連身長裙， 
膚色亦依舊咁白，淡妝，除左個樣變成熟左少少外， 
其他都冇咩點變（包括佢既高度），時光就好似倒流到 
我中三佢中五果年一樣，又或者一直都冇流走過⋯⋯

阿欣見到我之後微微笑住行埋黎：好耐冇見。 





我冇諗過我會定係度望住佢，咩都講唔出， 
就好似連言語都唔能夠表達咁多年黎內心心底 
一直隱藏住想見佢既渴望，佢終於實實在在咁 
出現係我眼前。 

阿欣拉一拉我手臂：阿樂，行啦，咪傻左咁望先得架。 

果晚我有同佢傾左好多近況，亦都有提起我係高登寫左個 
故係關於我同佢。 

阿欣初時有少少驚訝：你寫左個故比人睇，咁人地咪知晒我地 
D野？ 

我：啊，哈哈⋯⋯係啊⋯⋯ 





阿欣再問：好close果D都有寫？ 

我：我唔記得，哈哈，好似有，又好似冇（果刻費事有生命危險） 

阿欣有少少面紅：點會唔記得啊，一定有啦睇你個衰樣！ 
但點解你會寫？ 

我：可能想趁仲有記憶時保留住果份感覺掛，人愈大就好似愈唔記得 
初時既戀愛果種感覺係點，而且亦都冇可能再返轉頭。 

言談間我知道阿欣而家係單身，而之前有冇拍拖，我就冇再追問。 
咁多年冇見，大家依然一見如故，送佢返到屋企樓下時， 
佢同我講左句：香港比我既一切感覺都好陌生， 
惟獨你最能夠比到一種親暱感我， 
令我有返安全感。 





我冇回應，只係望住佢點頭微笑。 

然後互相擁抱左一下，佢就上左樓。 

果晚，我收到佢既來電。 

阿欣：阿樂，你記唔記得你講過， 
我返黎果時，你話你再有信心令我愛上你多一次？ 

我：記得啊！ 

阿欣有少少怕醜：咁⋯⋯ 

我：咁租約咪要延期囉，哈哈。 

阿欣笑住話：哈哈，你仲記得啊？咁延到幾時先。 

我：今次唔會再有限期啦。 

阿欣甜甜咁話：我會等你呢一日，阿樂。 

去到呢度，有一晚一個來電正式完結， 
我同阿欣都多謝大家出故三年以黎既支持。 
雖然我同佢仲未係情侶關係， 
但我地會努力朝住呢個方向出發。 
無論大家有冇睇過個故都好， 
希望你地都可以係度留個言， 
正皮又好咩都好， 
代表對我地送上祝福。 

如日後小弟有幸結婚，一定會為大家牽上喜帖。 
再一次，多謝大家。