（適量甜）是咁的，我竟然響公園執到本Sex note: 52

本身我想繼續追問落去，但我無意中gum着左部手機，發現條MK妹足足遲左成個鐘都未出現，所以我決定去搵佢翻黎先，有咩事遲下再算。
 
阿寧：「宜家咁黑，你真係唔洗我陪？」
 
我：「無事既，咪咁多心。你自己落山都小心d。」
 
阿寧：「嗯。」
 
我：「啊，仲有..今日既事..唔好同嘉欣講。」
 


阿寧：「放心..我會光明正大咁響佢手上搶你翻黎。」
 
講真個句，好勝心咁強既女人我真係第一次見，呢種復仇心態同嘉欣既大仁大愛真係好恐怖，有機會真係要叫教會d牧師幫手洗下佢腦。
 
我：「你慢慢加油啦，我仲好愛我女朋友。」
 
阿寧露出一抹詭異既笑容，彎腰，個人拱前，諗住比個goodbye kiss我。
 
我好自然咁伸前個頭，就響我就錫落去個剎那，突然醒起佢奶個我屎忽，於是襯佢合埋對眼既時候，毫不猶豫咁轉身離場。
 


「喂！你去邊呀！你仲未除..」
 
「我急屎，遲下再傾。」我一邊跑一邊叫。你老味，差d就比你個死人嘴坤鳩左。
 
確認左同阿寧保持兩秒既距離之後，我首先去圍欄到搵思思收埋既啤牌。
 
因為我清楚，以王雅琳既性格，佢唔擰到張牌就絕對唔肯落山。
 
思思果狠毒，為左令雅琳響墳場逗留更耐，佢將張牌收埋響最後果排圍欄既底部，搞到我搵左十分鐘先搵到。
 


搞掂好所有野之後，我先至行翻正路落山。
 
前面好黑，雖然有電筒響手，但只可以勉強咁辨別方向。我追隨昆蟲既聲音舉步前行，因為真係好撚黑。

行下行下，見到前面有個瑟縮既身影。
 
我本能上後退左幾步，話就話唔怕鬼姐，但岩先響墳場口爆阿寧，點講都係對先人不驚，唔會咁快就奶野下話..
 
我不發一言，慢慢響佢步近。
 
一個啡色頭髮既女仔正抱住膝頭，踎響地上面，個身震震下咁。
 
望到把啡髮，我即刻安落曬。原來佢響度，等我仲以為自己用口爆技召喚左夏蕙BB。
 
「喂。」我烏低身拍下佢膊頭。


 
佢慢慢咁抬高頭，塊面青曬，然後好驚訝咁望住我個樣。
 
「呀！」
 
大家對視左半秒之後，佢毫不猶豫咁拎起手上既燈筒兜野車落我個頭度！
 
仆你個街，個頭好似比達瑞斯招大撼左野咁，當堂痛到我跪曬地。
 
「唔好埋黎呀！」
 
佢將個頭縮響膝頭之間，唔敢望住我。
 
「屌你咩.. 扑我做乜春啊…」
 


「矮…矮仔？」佢偷偷地咁響伸個頭出黎，右眼撐開一絲裂縫望住我。
 
「係啊雅琳姐…」
 
「但..點解你個樣…」
 
「我個樣？」我摸下塊面，瞬間知道自己硬食一棍既原因。
 
原來岩先我太大意，連面具都無除就落左黎。呢一刻，我仲係一個相貌醜陋既科學怪人..

我死死氣咁扯低個面具：「咁得未？」
 
佢呆左兩秒，然後秒速彈起：「妖！差d比你嚇死..」
 
「咁你都唔洗問都唔問直接扑濕我架..」


 
「鬼叫你嚇鳩我呀！」
 
屌，早知救左你仲要比你爆頭，岩先就應該屌埋阿寧，再同佢一齊落山，由你一個自生自滅好過。
 
「唉，真係無你乎。走啦..」我掩住腫痛既額頭，慢慢企翻起身。
 
「唔得…我要上去擰埋張啤牌先！」
 
佢握住拳扮大膽，但對腳仍然響到震緊。
 
「啤牌響度啊，滿意未啊，大小姐！」我將張輕輕力咁拍落佢額頭到。
 
「真既？」
 


佢雙手掩住額頭，小心翼翼咁將張牌拎落黎，露出驚喜既眼神之後嘴角微微上揚。
 
「算你有d用啦。」
 
「何只d咁簡單啊！你細膽到咁，未等到天光都唔敢上山啦。」
 
「收皮！」
 
佢一下如來神掌呼嘯而至，但手掌響我既膊頭側邊生硬咁停低左。
 
「哼，天咁黑，我睇唔到路咋嘛。」
 
「你好似有電筒架wo。」
 
「咩呀..個電筒..好似用黎打你個頭個陣整壞左，所以用唔到..」
 
「喔，一定係咁啦。」我苦笑搖頭。
 
「笑咩呀你！」
 
「無啊，走啦。」
 
正當我準備轉身離開既時候，佢突然扯住我既衣袖。
 
「矮仔！」
 
「嗯？」
 
「手指尾..」
 
「咩啊？」
 
「比你手指尾我。」
 
「無啦啦講呢d做乜？」
 
「妖！咪問咁多啦煩人。」
 
「OK …」
 
我停低，然後向後伸出自己既手。呢個時候，一隻柔軟溫暖既手指搭左響我既尾指上面，然後緊緊咁勾住。
 
「行得…」佢企到好埋，幾乎貼住我背脊。
 
「哈哈，原來有人驚驚，要哥哥拖手仔。」
 
「收皮！」我既右腿又硬食左腳。